1. (a) Iehova be dahaka gau namodia do ia karaia? (b) ‘Iehova ita abidadama henia’ ena anina be dahaka? (“Hereva Ena Anina” itaia.)

 IEHOVA be ia idia lalokau henia taudia totona gau namodia momo do ia karaia. Kahirakahira ia ese gorere, lalohisihisi, bona mase do ia haorea. (Apok. 21:3, 4) Ia idia abidadama henia “manau taudia” do ia durua tanobada be paradaiso ai idia halaoa totona. (Sal. 37:9-11) Bona Dirava ese dala do ia kehoa, ita ta ta ese ia do ita tura henia namonamo totona. Unai be moale gauna, ani? To dahaka dainai ita abia dae, Dirava ena gwauhamata be do idia vara momokani? Iehova be hanaihanai ena gwauhamata ia badinaia. Badina namodia idia noho ‘Iehova ita abidadama henia’ totona. * (Sal. 27:14) Bona unai ita karaia dalana be mai haheauka bona moale ida iseda Dirava ita naria iena ura ia hagugurua totona.​—Isa. 55:10, 11.

2. Iehova be dahaka ia karaia vadaeni?

² Iehova ese ia hamomokania vadaeni ia be ena gwauhamata ia badinaia. Mani haheitalai namona ta ita laloa. Apokalupo bukana ai, Iehova ia gwauhamata iseda nega lalonai bese, iduhu, bona gado idauidau taudia do ia haboua, unai amo mai lalotamona ida ia do idia tomadiho henia. Hari, unai taudia idia gwauraia “hutuma bada.” (Apok. 7:9, 10) Ena  be unai tatau, hahine, bona natudia be tanobada ena kahana idauidau amo idia mai, to idia be lalotamona ai idia noho ruma bese badana. (Sal. 133:1; Ioa. 10:16) Unai hutuma bada be haroro goadagoada taudia danu. Idia be hanaihanai idia noho hegaegae kamonai taudia dekenai tanobada matamata idia herevalaia totona. (Mat. 28:19, 20; Apok. 14:6, 7; 22:17) Bema oi be hutuma bada tauna ta, oi dekenai vaira negai do idia vara gaudia be mai anina bada.

3. Satani ia ura dahaka ita karaia?

³ Diabolo ia ura lasi vaira nega ena hahenamo oi moalelaia. Ia ura oi abia dae, Iehova be oi ia laloa bada lasi bona ena gwauhamata do ia badinaia lasi. Bema Satani ese iseda abidadama karana ia hadikaia, do ita lalomanoka bona Iehova ita hesiai henia lasi. Inai stadi ai do ita itaia bamona, Diabolo ia ura Iobu ena abidadama ia hadikaia bona ia koua Iehova ia hesiai henia lasi totona.

4. Inai atikol ai dahaka do ita herevalaia? (Iobu 1:9-12)

⁴ Inai atikol ai, do ita itaia Satani be dala idauidau ia gaukaralaia Iobu ese Dirava ia badinaia karana ia hadikaia totona. (Iobu 1:9-12 duahia.) Danu Iobu ena haheitalai amo do ita dibaia gaudia, bona dahaka dainai ita laloatao Dirava ese ita ia lalokau henia bona ena gwauhamata do ia hagugurua karana do ita herevalaia.

5-6. Nega kwadogina lalonai, Iobu dekenai dahaka ia vara?

⁵ Iobu be mauri namona ia noholaia. Ia ese ena hetura karana Iehova ida ia moalelaia. Iena ruma bese badana be mai moale ida idia noho, bona ia be mai ena kohu momo. (Iobu 1:1-5) To dina tamona lalonai, Iobu be kahirakahira gau ibounai ia haboioa. Ginigunana be, ena kohu ia haboioa. (Iobu 1:13-17) Bena, ena natudia ibounai idia mase. Ia davaria dika badana mani ita laloa. Tama sina be edia natuna ta ia mase neganai, idia lalohisihisi bada. Unai dainai, Iobu bona ena adavana idia kamonai edia natudia 10 idia mase neganai, mani idia mamia hisihisi oi laloa. Oibe, Iobu be ia lalohisihisi dainai ena dabua ia darea bona tano dekenai ia moru!​—Iobu 1:18-20.

⁶ Satani ese Iobu dekenai gorere dikana ia henia. (Iobu 2:6-8; 7:5) Unai ia do vara lasi neganai, ena gabu dekenai idia noho taudia ese ia idia matauraia bada. Taunimanima be sisiba abia totona ia dekenai idia lao. (Iobu 31:18) To gabeai ia idia ura henia lasi. Oibe, iena tadikaka, ena tura namodia, bona ena hesiai taudia ese ia idia dadaraia!​—Iobu 19:13, 14, 16.

7. (a) Iobu ia abia dae ia davaria hisihisi be daika amo, to dahaka ia karaia lasi? (b) Edena dala ai Keristani tauna ese ia davaria hekwakwanai be rau 22 ena laulau ai ita itaia gaudia hegeregerena?

⁷ Iobu be hisihisi ia davaria neganai, Satani ia ura Iobu do ia abia dae Iehova ese ia badu henia. Hegeregere, Satani be lai badana ia gaukaralaia Iobu ena natudia 10 idia aniani noho rumana ia hadikaia. (Iobu 1:18, 19) Danu ia ese guba amo lahi ia hadihoa, bona Iobu ena animal bona animal idia naria hesiai taudia ibounai ia hadikaia ore. (Iobu 1:16) Lai bona lahi be guba amo idia diho, unai dainai Iobu ia laloa unai gaudia be Iehova Dirava ese ia havaraia. Unai dainai, ia abia dae ia ese Iehova ia habadua. Ena be unai ia vara, to ia ura lasi ena guba Tamana ia gwauraia dika. Iobu ia laloparara lagani momo gunanai ia abia gau namodia momo be Iehova amo idia mai. Ia laloa bema idia vara namo ia abia dae, vadaeni  idia vara dika ia abia dae danu be namo. Unai dainai ia gwau: “Iehova ena ladana ita hanamoa noho be namo.” (Iobu 1:20, 21; 2:10) Ena be Iobu ese ena kohu bona natudia ia haboioa, bona gorere badana ia abia, to Iehova ia badinaia noho. To Satani ese dala ma ta ia gaukaralaia Iobu ia tohoa totona.

8. Edena dala ma ta ai Satani ese Iobu ia tohoa?

⁸ Satani ese tura koikoidia toi ia gaukaralaia, unai amo Iobu do ia mamia ia be anina lasi. Unai tatau idia gwau Iobu ena kara dika be momo dainai hisihisi ia davaria. (Iobu 22:5-9) Danu idia ura ia abia dae ena be kara namodia momo ia karaia, to Dirava ese unai ia laloa bada lasi. (Iobu 4:18; 22:2, 3; 25:4) Momokani, idia ura Iobu do ia laloa Dirava ese ia lalokau henia lasi, ia naria lasi, bona Ia hesiai henia karana be anina lasi. Idia gwauraia herevadia dainai, Iobu ia mamia heduru abia dalana ta be lasi.

9. Dahaka ese Iobu ia durua ia lalogoada totona?

⁹ Mani oi laloa. Iobu be kahu lalonai ia helai, bona ia hisihisi noho. (Iobu 2:8) Ena turadia idia gwau ia be tau namona lasi bona ia karaia gaudia ese namo ia havaraia lasi. Iobu ese ia davaria hekwakwanai idauidau bona ia mamia hisihisi mani ita laloa. Matamanai, Iobu be hereva ta ia gwauraia lasi. (Iobu 2:13–3:1) Unai dainai reana ena turadia idia laloa Iehova do ia rakatania, to edia lalohadai be kerere. Iobu be ena kwarana ia abia isi bona turana koikoidia ia itaia, bona ia gwau: “Lau ese egu Dirava do lau badinaia noho ela bona lau mase!” (Iobu 27:5) Iobu be hisihisi momo ia davaria, to dahaka ese ia durua ia lalogoada totona? Ena be Iobu ia lalomanoka, to ia abia dae ena lalokau Diravana ese ena hisihisi do ia haorea. Ia diba bema ia mase, Iehova ese do ia hatoreaisi lou.​—Iobu 14:13-15.

10. Iobu ena sivarai amo dahaka ita dibaia?

¹⁰ Iobu ena sivarai ese ita ia hadibaia Satani ese ita ia doria diba lasi Iehova ita rakatania totona, bona Iehova be idia vara gaudia ibounai ia diba. Danu, Iobu ena sivarai ese ita ia durua idia vara gaudia ita lalopararalaia totona. Iobu amo ita dibaia gaudia haida mani ita laloa.

11. Bema Iehova ita abidadama henia noho, dahaka do ia vara? (Iamesi 4:7)

¹¹ Iobu ese ia hamomokania bema Iehova ita abidadama henia noho, hahetoho ita haheaukalaia bona Satani ita dadaraia diba. Bona dahaka do ia vara? Baibel ia gwau Diabolo be ita amo do ia heau siri.​—Iamesi 4:7 duahia.

12. Edena dala ai toreisi lou helarona ese Iobu ia hagoadaia?

¹² Namona be toreisi lou helarona dekenai iseda abidadama ita hagoadaia. Atikol 26 ai ita herevalaia bamona, nega momo Satani ese mase dainai ita gari karana ia gaukaralaia Dirava ita badinaia lasi totona. Satani ia gwau Iobu be gau ibounai do ia rakatania, bona ena mauri ia gimaia totona Iehova hesiai henia karana do ia hadokoa danu. To Satani ena hereva be kerere. Ena be Iobu be kahirakahira ia mase, to Iehova ia badinaia noho. Bona Iehova ena kara namodia bona Ia ese gau ibounai do ia hamaoromaoroa karana ia laloa neganai, unai ese ia durua ia haheauka totona. Iobu ia abia dae ena be ia mauri noho lalonai Iehova ese ia durua lasi, to vaira nega ai do ia hatorea isi lou. Iobu ia diba toreisi lou helarona be do ia vara momokani. Bema ita dekenai unai helaro be momokani, mase garina do ita gari lasi bona Dirava do ita badinaia noho.

13. Dahaka dainai Satani ese Iobu dekenai ia gaukaralaia koikoi daladia ita diba be namo?

¹³ Satani ese Iobu dekenai ia gaukaralaia koikoi daladia ita diba be namo, badina hari unai gaudia ia gaukaralaia noho. Satani ena koikoi herevana mani ita laloa, ia gwau: “Tau ta [Iobu sibona lasi] be ena gau ibounai do ia henia ena mauri ia dogoatao totona.” (Iobu 2:4, 5) Unai amo Satani ia gwau, ita be Iehova Dirava ita lalokau henia momokani lasi, bona iseda mauri ita gimaia totona Ia ita rakatania diba. Danu, ia gwau Dirava ese ita ia lalokau henia lasi bona Ia hamoalea totona ita karaia gaudia ia itaia lasi. Satani ena koikoi daladia ita diba dainai, ita ia koia diba lasi.

14. Hahetoho ita davaria neganai, dahaka ia vara?

¹⁴ Hahetoho ita davaria neganai, unai ese dala ia kehoa iseda manoka gaudia ita diba totona. Iobu be ia davaria hahetoho ese ia durua ena manoka gaudia ia diba bona ia hamaoromaoroa totona. Hegeregere, ia laloparara iena manau karana ia habadaia be namo. (Iobu 42: 3) Ita danu be hahetoho ita davaria neganai, iseda manoka gaudia momo ita dibaia. Ena be tadikaka ta ladana Nikolay * be gorere badadia haida ia davaria, to dibura ruma ai idia atoa, bona ia gwau: “Dibura ruma dekenai lau noho neganai, unai ese lau ia durua egu manoka gaudia lau diba bona hamaoromaoroa totona.” Oibe, iseda manoka gaudia ita diba neganai, do ita gaukara goada ita hamaoromaoroa totona.

15. Daika ita kamonai henia, bona dahaka dainai?

¹⁵ Namona be Iehova ita kamonai henia, to iseda inai taudia lasi. Iehova ese Iobu ia hereva henia neganai, ia kamonai namonamo. Dirava ese Iobu dekenai henanadai haida ia  henia, unai amo Iobu do ia laloparara Dirava ese ia laloa bada. Iobu ia manau bona Iehova ena kara namodia ia laloa bada. Ia gwau: “Lau ese emu sivarai lau kamonai, to hari oi lau itaia.” (Iobu 42:5) Iobu be unai hereva ia gwauraia neganai, reana ia be kahu lalonai ia helai noho, ena tauanina be toto amo ia honu, bona ena natudia edia mase dainai ia taitai noho. To, Iehova ese ia hahedinaraia Iobu ia lalokau henia bona lalonamo henia.​—Iobu 42:7, 8.

16. Isaia 49:15, 16 hegeregerena, hekwakwanai idia vara neganai dahaka ita laloatao be namo?

¹⁶ Hari inai negai danu, ita be anina lasi taudia bamona idia kara henia bona gwauraia dika. Idia ura ita ta ta eiava iseda orea ena ladana idia hadikaia bona “hereva koikoi idauidau idia gwauraia.” (Mat. 5:11) Iobu ena sivarai amo ita dibaia gauna be, Iehova ia diba hekwakwanai ita davaria neganai, Ia do ita badinaia noho. Iehova ese ita ia lalokau henia bona ia dekenai idia tabekau taudia do ia rakatania lasi. (Isaia 49:15, 16 duahia.) Dirava ena inai taudia ese idia gwauraia hereva koikoidia ita kamonai henia lasi! Turkey dekenai tadikaka ta ladana James ena famili be hekwakwanai badadia momo idia davaria. Ia gwau: “Ai laloparara Dirava ena taunimanima dekenai idia gwauraia hereva koikoidia ai kamonai neganai, do ai lalomanoka. Unai dainai Basileia ena hahenamo ai laloa bada bona Iehova hesiai henia karana ai goadalaia noho. Unai ese ai ia hamoalea noho.” Iobu hegeregerena, Iehova ita kamonai henia! Iseda inai taudia edia koikoi herevadia ese iseda abidadama ia hadikaia lasi.

17. Heberu karoa 11 ai abidadama tatau bona hahine edia haheitalai amo dahaka oi dibaia?

¹⁷ Iobu be Iehova ena hesiai tauna ta bona hekwakwanai idauidau ia davaria neganai, ia gini goada. To ia sibona lasi, aposetolo Paulo ese Heberu taudia dekenai ia torea revareva lalonai unai bamona taudia momo ia herevalaia, idia ia gwauraia “witnes orea badana.” (Heb. 12:1) Idia be hekwakwanai badadia idia davaria, to edia mauri lalonai Iehova idia badinaia noho. (Heb. 11:36-40) Edia haheauka bona gaukara goada karana be anina lasi, a? Lasi. Ia be mai anina bada! Ena be edia mauri lalonai Dirava ena gwauhamata idauidau edia guguru karana idia itaia lasi, to Iehova idia abidadama henia noho. Bona idia diba Iehova ena lalonamo idia abia dainai, idia abia dae unai gwauhamata namodia do idia itaia. (Heb. 11:4, 5) Edia haheitalai ese ita ia hagoadaia Iehova ita abidadama henia noho totona.

18. Emu lalona oi hadaia dahaka oi karaia totona? (Heberu 11:6)

¹⁸ Hari ita noho tanobadana ai kara dika ia bada momokani. (2 Tim. 3:13) Satani ese Dirava ena taunimanima tohoa karana ia hadokoa lasi. Ena be vaira nega ai hekwakwanai badadia do idia vara, to iseda lalona ita hadaia Iehova totona ita gaukara goada, badina ita be “mauri Diravana ita abidadama henia.” (1 Tim. 4:10) Laloatao, Dirava ese Iobu dekenai ia henia hahenamo ese ia hamomokania “Iehova be lalokau bona hebogahisi bada Diravana.” (Iam. 5:11) Namona be ita danu ese Iehova ita badinaia noho, badina ita diba ia ese “mai momokani ida ia idia tahua taudia edia davana do ia henia.”​—Heberu 11:6 duahia.