Gen moun k ap mande si yo pa chanje Pawòl Bondye a. Pwofèt Ezayi te di Pawòl Bondye a ap “la pou toutan’’. (Ezayi 40:8.) Kòman n kapab kwè Bondye te byen pwoteje pwomès ki nan Pawòl li yo?

Bondye gen pouvwa pou l pwoteje Pawòl li a, epi anpeche moun chanje l. Nan tan lontan, mesye ki te konn kopye maniskri yo te konn konte chak lèt nan liv sakre yo avèk prekosyon pou yo sèten yo pa t ajoute, chanje oubyen retire anyen ladan yo. Men, lefètke lèzòm enpafè, gen kèk nan mesye ki te konn kopye maniskri yo ki te fè kèk ti erè.

Gen plizyè milye kopi ansyen maniskri Ekriti sakre yo. Si gen yon ti diferans nan yon kopi, yo kapab konpare l ak lòt kopi pou yo jwenn sa k bon an. — Pou w jwenn plis enfòmasyon, gade atik “Èske yo chanje sa ki nan Bib la?’’ ki sou jw.org.

Ann pran egzanp ansyen maniskri ki rele Woulo Lanmè Mòt yo, bedwen yo te dekouvri nan kèk gwòt toupre Lanmè Mòt nan ane 1947. Ansyen maniskri sa yo gen kèk pati nan Ekriti sakre yo ki la depi plis pase 2 000 an. Espesyalis yo te konpare ansyen maniskri sa yo ak liv ki nan Pawòl Bondye a jodi a. Ki sa yo te wè?

Biblis yo te wè sa ki nan Pawòl Bondye a jodi a se menm bagay ak sa ki te nan tèks orijinal yo *. Lè n egzamine ansyen maniskri yo avèk atansyon, yo fè n wè sa n ap li nan Bib la se pawòl Bondye. Nou kapab sèten Bondye te fè tout sa l kapab pou l byen pwoteje mesaj egzak ki nan Liv sakre l yo pou n ka jwenn li jodi a.

Se sa k fè, nou kapab li Pawòl Bondye a ak yon konfyans total e nou kapab gen asirans li egzak. Pandan sa nan lespri nou, ann egzamine sa pwofèt Bondye yo ka aprann nou sou Bondye.