•  Nama runding nuan pasal diri empu?

•  Baka ni chara nuan mutarka runding ti enda manah?

•  Nama utai ke patut digaga nuan

•  Pansik mayuh agi

•  Nama ku nembiak serambau nuan

•   Manah

   “Aku nguji gaga ati belama. Aku deka seruran tuchum sereta berasai gaga ninting hari.”—Valerie.

•   Enda manah

   “Lebuh bisi utai manah nyadi, tusah aku deka pechayaka utai nya. Tiap kali utai manah nyadi, aku selalu ngumbai nya tentu bisi kebuah.”—Rebecca.

•   Pengumbas iya

   “Orang ke selalu ngembuan runding ti manah, jampat asa lebuh pelan iya enda mujur. Orang ke kelalu ngembuan runding ti enda manah, selalu dilamun ati ti tusah. Nya alai, aku patut ngembuan runding ti pengumbas iya napi penguji ba pengidup.”—Anna.

 Bup Kudus madah, “orang ke lantang ati endang seruran nyamai diau.” (Jaku Dalam 15:15) Tu nunjukka, orang ke ngelaban runding ti enda manah enggau runding ke manah deka gaga ati. Ke suah iya, orang ke baka tu deka bulih mayuh kaban. Nuan tentu enda rindu bekaban enggau orang ke selalu masam mua.

 Taja pan runding nuan selalu manah, taja pia nuan patut napi penanggul ke enda manah. Ngambika chunto,

•   Nuan engka ninga mayuh berita pasal perang, penyai, tauka jenayah.

•   Nuan engka patut mutarka penanggul ba diri sebilik.

•   Nuan ngereja penyalah, lalu patut mutarka pengelemi diri.

•   Kaban ngemediska ati nuan.

 Anang rari ari penanggul tauka kelalu berundingka nya. Tang, mutarka meh penanggul nuan enggau chara ti manah. Enggau nya, nuan ulih nerima utai ke nyadi ba pengidup, lalu nyeliahka runding ti enda manah sereta lemi semengat.

•   Anang kelalu ngarapka utai ti lebih ari diri empu.

   Bup Kudus madah, “Nadai orang di dunya tu ti nadai kala ngereja utai ti salah.” (Pengajar 7:20) Nya nunjukka, nuan tentu ngereja penyalah. Tang, nya ukai reti iya nuan seiku mensia ti enda beguna.

   Chara berunding enggau penumbas iya: Belajar meh ari penyalah diri, lalu anang ngarapka semua utai deka nyadi manah magang. Seiku nembiak lelaki ke benama Caleb madah, “Aku nguji enggai berundingka penyalah ti udah, ngambika aku enda asa ati. Tang, aku belajar ari penyalah nya, lalu ngemansangka pemanah diri.”

•   Anang manding diri enggau orang bukai.

   Bup Kudus madah, “Anang sumbung; anang nyemekih pangan diri; anang ngining pangan diri.” (Galatia 5:26) Ngambika chunto, nuan meda gambar bala kaban nuan ke benung gaga ati, lalu mandangka nya ba media sosial. Nuan engka berasai tusah ati laban nuan enda dibai. Tu ulih ngasuh nuan berunding, sida enda rinduka nuan.

   Chara berunding enggau penumbas iya: Nuan patut nemu, ukai dalam semua pekara nuan deka dibai. Kelimpah ari nya, ukai semua utai ke dipeda nuan ba media sosial madahka semua cherita. Seiku nembiak ke benama Alexis madah, “Gambar ke dipandangka dalam media sosial, nunjukka maya ti ngerinduka ati seseiku orang. Gambar ke enda tentu manah tentu enda diayanka.”

•   Bebendar ngemansangka pemaik, kelebih agi ba diri sebilik.

   Bup Kudus ngajar, “Enti ulih, seagi-agi utai nya bepanggai ba kita, diau bebaik enggau semua orang.” (Rome 12:18) Nuan enda ulih nguasa ulah orang bukai, tang nuan ulih nguasa ulah diri empu. Nuan ulih milih deka nyadi orang ke ngemansangka pemaik.

   Chara berunding enggau penumbas iya: Lebuh bisi penanggul nyadi ba diri sebilik, bebendar meh anang ngasuh utai ke nyadi nya majak balat. Tang, nuan patut bebendar ngemansangka pemaik ba diri sebilik baka enggau bala kaban nuan. Seiku nembiak ke benama Melinda madah, “Semua kitai enda sempurna, lalu kekadang kitai endang ngasuh orang bukai ringat. Tang lebuh utai nya nyadi, kitai ulih milih nama patut digaga diri, sekalika kitai deka ngetanka pemaik tauka belaya.”

•   Belajar beterima kasih.

   Bup Kudus madah, “Seruran beterima kasih.” (Kolosi 3:15) Ulah ti selalu beterima kasih nulung nuan beberatka utai ti manah ba pengidup, ukai ba utai ti enda manah.

   Chara berundingka enggau penumbas iya: Tapi meh penanggul ke ninggang nuan, tang anang nejuka penanggul nya ngasuh nuan enda ingatka utai manah ke kala nyadi ba pengidup. Seiku nembiak ke benama Rebecca madah, “Ninting hari, aku nulis siti utai ke manah dalam bup nota aku. Aku deka ngingatka diri empu, kelimpah ari penanggul ke ditapi, bisi mega mayuh utai manah ke bukai nyadi ba pengidup aku.”

•   Pilih meh kaban nuan.

   Bup Kudus ngelalau, “Orang ke jai ngerusak moral ti menyana.” (1 Korint 15:33) Enti nuan selalu bekaban enggau orang ke ngembuan runding ti enda manah, selalu bejai orang, sereta nyindir orang bukai, nuan mega deka nunda ulah sida.

   Chara berunding enggau penumbas iya: Maya kaban nuan bisi penanggul, sida engka bisi runding ti enda manah sereta tusah ati. Tang, utai tu engka nyadi enda lama aja. Uji meh meri tulung ngagai sida ke benung napi penanggul, tang bejimat enggaika sida ngachau runding sereta ulah nuan. Seiku nembiak ke benama Michelle madah, “Anang semina begulai enggau orang ke ngembuan runding ti enda manah. Baka matematik, enti negatif tambah negatif, tu ngujungka nya balat agi negatif.”

 Bup Kudus nunjukka kitai benung idup “ba hari ti penudi mayuh macham penusah deka nyadi.” (2 Timoti 3:1) Dunya tu udah penuh enggau utai ti enda manah. Nya alai, kati nuan tusah deka mengkang ngembuan runding ti manah? Bacha meh “Nama Kebuah Mayuh Pemerinsa?”