•  Utai ke patut ditemu nuan

•  Utai ke ulih digaga nuan

•  Nama ku nembiak serambau nuan

 Pengawa ngachau senang agi dikereja nengah Internet. Nitihka bup CyberSafe, “Indah anak mit ke manah pan ulih mansutka jaku ti jai dalam Internet, laban sida enda ibuh ngayanka mua diri.”

 Sekeda orang senang dikachau. Kesuah iya, orang ke selalu kena ngachau nya, orang ke enda mayuh bejaku. Laban sida nyelai ari orang bukai, tauka enda pechaya diri.

 Orang ke kena ngachau senang trauma. Sida engka enggai begulai enggau orang, bisi depression, indah bisi ati deka munuh diri.

 Keterubah, tanya diri empu: “Kati aku amat dikachau? Kadang-kadang, orang bisi nyebut utai ke ngemediska ati, tang iya ke bendar ukai baka ke disangka aku. Enti nya nyadi, titihka lalau ari Bup Kudus tu:

 “Anang lengkar. Nuan beli enti nuan bedendam.”—Pengajar 7:9.

 Tang, enti orang nya sengaja ngachau, ngelese, tauka meri jaku tangkan nengah Internet, nya amat pengawa ngachau.

 Enti nuan dikachau nengah siber, kingatka lalau tu: Chara nuan napi tu, ulih ngasuh utai nya nyadi manah agi tauka balat agi. Uji beberapa iti chara ba baruh.

 Anang ibuhka orang ke ngachau nya. Bup Kudus madahka, “Orang ke mereti, enda seruran kutap-kutap. Orang ke enda bemunyi nya orang ke bepenemu-dalam.”—Jaku Dalam 17:27.

 Peratika siti ari kebuah tu: Nitihka seiku penulis bup Cyberbullying and Cyberthreats, “Orang ke ngachau sengaja deka ngasuh mansa sida ringat. Enti mansa nya enda ulih sabar agi, sida nunjukka diri senang agi dikachau.”

 Utai ke dipelajar: Kadang-kadang, manah agi enda ibuhka sida.

 Nagang diri ari malas. Bup Kudus madah, “Anang malas penyai ngena penyai.—1 Peter 3:9.

 Peratika siti ari kebuah tu: “Pengeringat nunjukka pengelemi dalam seseiku orang, lalu chara nuan tu ngasuh orang ke ngachau senang agi deka ngachau nuan.” Tu baka ke ditulis dalam bup Cyber-Safe Kids, Cyber-Savvy Teens. Enti nuan malas maya nuan dikachau, nuan mega engka dikumbai besalah.

 Utai ke dipelajar: Anang nanjahka minyak ngagai api.

 Ngiga chara bukai. Bup Kudus madah: “Anang alah laban penyai, tang alahka penyai ngena pemadas.” (Rome 12:21) Bisi chara ke ulih digaga nuan kena ngetuka pengawa orang ke ngachau, tang enda ibuh ngasuh pekara nya majak jai.

 Ngambika chunto:

•    Nyekat orang ke nganjung mesej ngagai nuan. “Nuan enda ulih dikemediska enti nuan enda macha mesej nya,” baka ke ditulis dalam bup Mean Behind the Screen.

•   Simpan semua mesej ke enda manah, SMS, email, penerang ke dipload, pesan jaku, tauka sebarang chara media ke bukai. Simpan nya nyadika bukti taja pan nuan enda macha iya.

•   Padahka ngagai orang ke ngachau ngetu ari ulah sida. Simpan mesej nuan ngagai orang ke ngachau nya, tang enda ibuh kelalu nitihka ati nuan ke pedis. Ngambika chunto:

  •  “Anang nganjung mesej ngagai aku agi.”

  •  “Padam semua utai ke dipload nuan ba media sosial.”

  •  “Enti nuan majak ngachau aku, aku deka madahka orang bukai pasal tu.”

•   Pechaya diri. Peratika pengering nuan, ukai pengelemi nuan. (2 Korint 11:6) Orang ke ngachau ba siber kesuah iya ngiga orang ke lemi, sereta senang nyadi mansa.

•   Padahka ngagai orang ke besai tuai. Padahka ngagai apai indai nuan. Nuan mega ulih ngeriput penanggul nya ngagai orang ke gawa ba laman web, tauka nengah media sosial ke dikena orang ke ngachau nya. Enti penanggul tu majak balat, bai meh apai indai nuan madahka bala pengajar, polis, tauka minta lalau ari piak bekuasa.

 Utai ke dipelajar: Bisi chara ke ulih dikena nuan ngetuka pengawa orang ke ngachau nya. Pia mega, bisi chara kena nuan ngurangka pengawa orang ke ngachau nengah siber ngagai nuan.