DAMDAMAG ITI LUBONG
Maipapan iti Relihion
Ti relihion ket maysa koma a puersa iti panagkaykaysa. Ngem masansan a dayta ti pakaigapuan ti gulo ken kinaawan panagtalek.
Lubong
Nasurok a 75% iti populasion ti lubong ti agnanaed kadagiti pagilian a nainget dagiti restriksionda iti relihion, gapu man dayta kadagiti pagannurotan ti gobierno wenno pananggura ti kagimongan. Iti nabiit pay a lima a tawen, dandani nagdoble ti bilang dagiti nasion a pakapaspasamakan ti panangabuso iti babassit a grupo ti relihion.
PANUNOTEM: Ania ti agduduma a rason a kagura ti dadduma a tattao ti relihion?—Mateo 23:27, 28; Juan 15:19.
England
Iti diario nga Observer, insurat ti dati a Prime Minister a ni Tony Blair a ti “di umiso a panangusar iti relihion” ti gagangay a makagapu kadagiti nabiit pay nga aramid ti terorismo. “Dagiti gubat ita a siglo,” innayonna, “ket saan a kangrunaan a maigapu iti nakaro a napolitikaan nga ideolohia—a kas idi maika-20 a siglo. Ti panagduduma ti kultura wenno relihion ti masansanen a makagapu.”
PANUNOTEM: Apay a ti relihion ti masansan a pakaigapuan ti panagsisina?—Marcos 7:6-8.
Australia
Impadamag ti Australian Bureau of Statistics a kinuna ti 1 iti kada 5 nga Australiano nga awan ti relihionda. Uray pay no “adda relihionda, dina kayat a sawen nga aktiboda a makipaspaset kadagiti narelihiosuan nga aktibidad,” kuna ti report. Kinse la a porsiento kadagiti lallaki ken 22% kadagiti babbai a miembro ti relihion ti mangibagbaga nga aktiboda a makiparpartisipar iti narelihiosuan wenno naespirituan a grupo.
PANUNOTEM: Ania dagiti dakes a kababalin a makita iti kaaduan nga organisado a relihion ita?—Mateo 7:15-20.
Baka Kayatmo Met ti
TI PAGWANAWANAN
Adda Kadi Relihion a Mapagtalkam?
Adda kadin relihion a nakaupayam? No kasta, mabalin a saankan nga agtalek iti aniaman a relihion. Kasano a makatulong ti panagadal ti Biblia?
MASANSAN A MAISALSALUDSOD
Apay a Saan a Makiramraman iti Politika Dagiti Saksi ni Jehova?
Pangta kadi ida iti seguridad ti pagilian?
