AGAR-ARAMID dagiti uyokan (Apis mellifera) iti pagurnonganda iti diro a maawagan iti rara. Agus-usarda iti allid (wax) nga aggapu kadagiti glandula nga adda iti makimbaba a paset ti tianda. Ti rara ket maibilang a maysa a pagsidsiddaawan iti tay-ak ti inhenieria. Apay?

Usigem: Ginasut a tawenen nga impagarup dagiti matematiko a dagiti partision nga innem ti sulina wenno sukog hexagon ket nasaysayaat ngem kadagiti trianggulo wenno kuadrado—wenno iti dadduma pay a sukog—tapno mausar ti amin nga espasio ken makaekonomia kadagiti materiales iti panagaramid kadagiti estruktura. Ngem dida naan-anay a mailawlawag no apay. Idi 1999, nangipaay ni Propesor Thomas C. Hales iti matematikal nga ebidensia a nasaysayaat ti sukog hexagon. Impakitana no kasano a dagiti regular a hexagon ti kasayaatan a pamay-an tapno mabingay iti agpapada a rukod ti maysa nga estruktura a sumagmamano laeng dagiti kasapulan a materiales a pagpalagda.

Yantangay hexagon dagiti partision ti rarada, mausar a naimbag dagiti uyokan ti amin nga espasio, makaaramidda iti nalag-an ngem nalagda a rara a saan unay nga agkasapulan iti allid, ken makaurnongda iti nagadu a diro iti espasio. Di pakasdaawan a ti rara ket nadeskribir kas “maysa nga obra maestra iti arkitektura.”

Ita, tultuladen dagiti sientista ti rara dagiti uyokan tapno makaaramidda kadagiti estruktura nga agpadpada a nalagda ken nainut iti espasio. Kas pagarigan, dagiti inheniero ti eroplano ket agus-usar kadagiti panel nga umasping iti rara tapno makaaramidda kadagiti eroplano a nalaglagda, nalaglag-an, ken nain-inut iti gasolina.

Ania ti makunam? Babaen kadi iti ebolusion a timmaud ti nagsayaat nga estruktura ti rara? Wenno nadisenio dayta?