AGTULTULOYKAYO NGA AGBANTAY!

Inyabante Dagiti Sientista ti Doomsday Clock—Ania ti Ibaga ti Biblia?

I-PLAY

Idi Enero 24, 2023, inyabante dagiti sientista ti Doomsday Clock a iti alas dose ti rabii, tapno ipakitada nga asidegen nga agpatingga ti lubong.

“Ti ‘Doomsday Clock’ a mangisimbolo iti asidegen a pannakapukaw dagiti tattao gapu met laeng iti ar-aramidenda ket in-adjust dagiti sientista idi Martes. Daytan ti kaasitgan nga oras sakbay ti tengnga ti rabii gapu kadagiti pasamak a kas iti gubat idiay Ukraine, pangta ti nuklear a gubat, ken iti kumarkaro a climate change.”—AFP International Text Wire.
“Idi Martes, imbaga dagiti sientista a nai-adjust ti ‘Doomsday Clock’ iti 90 a segundo sakbay ti tengnga ti rabii—a mangipakita a nakaas-asidegen ti armagedon.”—ABC News.
“Impakdaar ti maysa a grupo dagiti sientista manipud iti agduduma a pagilian ti nagdakkel a posibilidad a maibus dagiti tattao gapu met laeng iti ar-aramidenda.”—The Guardian.

Talaga kadi nga asidegen a madadael dagiti tattao ken ti planetatayo? Talaga kadi a masapul a pagbutngantayo no ania ti mapasamak iti masanguanan? Ania ti ibaga ti Biblia?

No ania ti mapasamak iti masanguanan

Ibaga ti Biblia a “ti daga [ket] agtalinaed iti agnanayon” ken addanto dagiti tattao nga ‘agyan iti dayta iti agnanayon.’ (Eclesiastes 1:4; Salmo 37:29) Kayatna a sawen a saan nga interamente a madadael dagiti tattao ti daga iti punto a saanen a mapagyanan dayta.

Ngem adda ibagbaga ti Biblia nga agpatingga. Kas pagarigan, ibagana a “ti lubong ket aglabas.”—1 Juan 2:17.

Tapno maammuam no ania ti ibagbaga ti Biblia maipapan iti panungpalan ti lubong, basaem ti artikulo a “Dandani Kadin Madadael ti Lubong? Ania ti Apocalipsis?”
Tapno maammuam ti ibagbaga ti Biblia maipapan kadagiti pasamak iti lubong, basaem ti artikulo a “Kaano ti Panungpalan ti Lubong?”

Agtalinaed a positibo

Matulongannatayo ti Biblia nga agtalinaed a positibo uray adda dagiti problema iti lubong ita. Kasano?

Adda dagiti praktikal a balakad ti Biblia. (2 Timoteo 3:16, 17) Kas pagarigan, basaem ti artikulo a “No Kasano a Makontrol ti Panagdanag” tapno makitam no kasano a matulongannaka ti Biblia nga agtalinaed a positibo uray adu ti problema.
Masiguradotayo a pumaysonto ti ibagbaga ti Biblia a nasayaat a masanguanan. (Roma 15:4) Mailawlawag ti Biblia no ania ti manamnamatayo ita ken iti masanguanan. Makatulong dayta tapno agtalinaedtayo a kampante aniaman ti mapaspasamak iti lubong ita.

Tapno ad-adu pay ti maammuam iti Biblia, padasem ti iyaw-awismi a libre a panagadal iti Biblia nga adda tumulong kenka.

a “Ti Doomsday Clock ket maysa a simbolo a mangpakdaar kadagiti tattao no kasanon kaasideg ti pannakadadael ti lubong gapu kadagiti delikado a teknolohia a datayo met laeng ti nangaramid. Maysa daytoy a metapora, maysa a palagip a masapul a masolusionan dagiti problema tapno saantayo a madadael ken ti planetatayo.”—Bulletin of the Atomic Scientists.