ფსალმუნი 23:4: „წყვდიადით მოცულ ხევში დავაბიჯებ, მაგრამ არაფერი მაშინებს, რადგან შენა ხარ ჩემთან“.

 რას ნიშნავს ეს სიტყვები: როცა დახმარებისთვის ღმერთს მივმართავთ ლოცვით და მისი სიტყვის, ბიბლიის, ხელმძღვანელობას მივყვებით, გასაჭირის დროს მხნეობას არ ვკარგავთ.

 ეკლესიასტე 9:10: „არც საქმე, არც ჩანაფიქრი, არც ცოდნა და არც სიბრძნე არ არის სამარეში, სადაც მიდიხარ“.

 რას ნიშნავს ეს სიტყვები: გარდაცვლილები არ იტანჯებიან; მათ არც არანაირი ზიანის მოყენება შეუძლიათ ჩვენთვის. ისინი უგრძნობ მდგომარეობაში არიან.

 ფსალმუნი 86:5: „იეჰოვა, a რაოდენ კარგი და მიმტევებელი ხარ; სიყვარულს არ იშურებ მისთვის, ვინც გიხმობს“.

 რას ნიშნავს ეს სიტყვები: ღმერთი პატიობს მათ, ვინც გულწრფელად წუხს ჩადენილი დანაშაულის გამო და გადაწყვეტილი აქვს, აღარ გაიმეოროს მსგავსი შეცდომები.

 ფსალმუნი 31:7: „დაინახე ჩემი გაჭირვება; შენ უწყი, რა მიფორიაქებს სულს“.

 რას ნიშნავს ეს სიტყვები: ღმერთმა იცის, რა გვაფორიაქებს და რა გვიკარგავს მოსვენებას. ის კარგად ხედავს, რა ხდება ჩვენს გულში მაშინაც, როცა უახლოეს ადამიანსაც კი არ ესმის ჩვენი ბოლომდე.

 ფსალმუნი 41:3: „იეჰოვა მხარში ამოუდგება მას ავადმყოფობის დროს“.

 რას ნიშნავს ეს სიტყვები: სერიოზული ავადმყოფობის დროს ღმერთს შეუძლია მოგვცეს შინაგანი სიმშვიდე, ძალა და მოთმინება; აგრეთვე, სიბრძნე გონივრული გადაწყვეტილებების მისაღებად.

 ფსალმუნი 94:19: „როცა საფიქრალმა მოსვენება დამიკარგა, შენ მანუგეშე და დამამშვიდე“.

 რას ნიშნავს ეს სიტყვები: თუ სტრესულ სიტუაციაში ღმერთს მივმართავთ დახმარებისთვის, ის გვანუგეშებს და სიმშვიდეს გვაპოვნინებს.

 ფსალმუნი 46:9: „ის წყვეტს ომებს მთელ დედამიწაზე“.

 რას ნიშნავს ეს სიტყვები: მალე ღვთის სამეფო ყველანაირ ომს დაუსვამს წერტილს.

 იერემია 29:11: „ვიცი, რასაც ვიზრახავ თქვენთვის, — ამბობს იეჰოვა, — მშვიდობას ვიზრახავ და არა უბედურებას; მინდა, რომ მომავლის იმედი გქონდეთ“.

 რას ნიშნავს ეს სიტყვები: ღმერთი შესანიშნავი მომავლის იმედს აძლევს თავის ხალხს.