Pɩmʋnaa se Ɛsɔtɔm takayaɣ ɛwɛɛ ndɩ nɛ takayɩsɩ lɛɛsɩ, nɛ mbʋ ɖɔɖɔ Bibl wɛɛ. Palɩzɩ Biblwaa miiliyaarɩwaa sakɩyɛ kʋnʋmɩŋ sakɩyɛ taa. Lɔŋsɩnɖɛ nɖɩ ɖɩwɛ Bibl taa yɔ, ɖɩwɛnɩ ɖoŋ se ɖɩsɩnɩ ɛyaa nɛ pɛlɛɣzɩ pe-wezuu caɣʋ.—Kalɩ 1 Tesalooniki 2:13; 2 Timootee 3:16.

Ðɩnawa se Bibl lɩnɩ Ɛsɔ cɔlɔ, mbʋ pʋyɔɔ yɔ kɩyɔɔdʋʋ ɖeyi ɖeyi mbʋ pɩkaɣ labʋ cee wayɩ yɔ. Ɛyʋ nɔɔyʋ ɛɛpɩzɩɣ nɛ eheyiɣ-ɖʋ mbʋ pɩkaɣ labʋ cee wayɩ yɔ, ɛ-maɣmaɣ e-ɖoŋ taa. Ðɩna tɔm ndʋ Izaayii takayaɣ kaayɔɔdaa yɔ. Palɩ Izaayii takayaɣ hɔɔlaɣ nakɛyɛ yɔɔ ɛwaɣ pɔʋ nakʋyʋ taa Teŋgu Kɩsɩbʋʋ cɔlɔ. Pamaʋ-kɛ yɔ, pɩcɛzɩ pɩnzɩ mɩnʋʋ pʋcɔ nɛ palʋlʋʋ Yesu. Pama ka-taa se Babilooni tɛtʋ kaɣ pɩsʋʋ njɛyɛ. Yesu kɔma nɛ esusi tɔm tɛtʋ yɔɔ nɛ pɩla pɩnzɩ sakɩyɛ pʋwayɩ pʋcɔ nɛ tɔm ndʋ tɩla.—Kalɩ Izaayii 13:19, 20; 2 Pɩyɛɛrɩ 1:20, 21.

Pakpaɣ pɩnzɩ ɛzɩ 1600 mbʋ yɔ na nɛ pamanɩ Bibl. Ɛyaa 40 mbʋ yɔ manɩ-kʋ, nɛ tɔm ndʋ pamawa yɔ tɩɩkaɖɩɣnɩ ɖama. Ɛbɛ sɩnɩ-wɛ nɛ pɔ-tɔm tɩkaɖɩnɩ ɖama? Ɛsɔ ɖiyini-wɛ nɛ pama-tʋ.—Kalɩ 2 Samɩyɛɛlɩ 23:2.

Nabʋyʋ taa lɛ, Ɛsɔ yɔɔdɩnɩ Bibl mayaa pɩtɩŋnɩ e-tiyiyaa, natʋ yaa ɖoza yɔɔ. Ɛlɛ ɖoŋ ɖoŋ lɛ, Ɛsɔ ɖʋʋ ɛ-lɩmaɣza Bibl mayʋ ñʋʋ taa, nɛ ɛha-ɩ nʋmɔʋ se ɛ-maɣmaɣ ɛñɩnɩ tɔm pee nɛ ɛma tɔm ndʋ Ɛsɔ sɔɔlaa yɔ.—Kalɩ Natʋ 1:1; 21:3-5.