Ta hũũra mbica ũrĩa andũ mangĩgunĩka marĩ rungu rwa thirikari ĩmwe thĩ yothe. Ũmũthĩ andũ nĩ manyamarĩkaga tondũ wa gũkorũo marĩ athĩni mũno, o rĩrĩa kũrĩ na angĩ atongu mũno. No thirikari ĩreciria ũhoro wa maũndũ ma andũ no ĩtigĩrĩre atĩ andũ othe marĩ na mabataro mao. Hihi nĩ ũkuona ta kũrĩ hĩndĩ andũ magathondeka thirikari ta ĩyo?—Thoma Jeremia 10:23.

Kwa ihinda rĩa mĩaka mĩingĩ, thirikari nĩ iremetwo na njĩra nyingĩ kũrũmbũiya raiya, makĩria arĩa athĩni. Thirikari imwe nĩ ihinyagĩrĩria andũ. (Kohelethu 4:1; 8:9) No Ngai Mwene Hinya Wothe nĩ eranĩire atĩ nĩ akaarehe thirikari ĩkeheria iria ingĩ ciothe. Mũtongoria wayo nĩ akaarũmbũiya andũ biũ.—Thoma Isaia 11:4; Danieli 2:44.

Jehova Ngai athuurĩte Mũtongoria wa thĩ ũrĩa mwagĩrĩru biũ, nĩwe Mũrũwe, Jesu. (Luka 1:31-33) Rĩrĩa Jesu aarĩ gũkũ thĩ, nĩ eendete mũno gũteithia andũ. Arĩ Mũthamaki, nĩ akaanyitithania andũ a kuuma mabũrũri mothe na amaniinĩre mĩnyamaro yao yothe.—Thoma Thaburi 72:8, 12-14.

Hihi nĩ andũ othe metĩkagĩra Jesu atuĩke Mũtongoria wao? Aca. No Jehova nĩ mũkirĩrĩria. (2 Petero 3:9) Nĩ aheete andũ kamweke ga gwĩtĩkĩra Jesu atuĩke Mũtongoria wao. Ica ikuhĩ, Jesu nĩ ekweheria andũ arĩa oru thĩinĩ wa thĩ na arehe thayũ thĩinĩ wa thĩ yothe.—Thoma Mika 4:3, 4.