Sooq taama uumissuisoqartigiva?
Sooruna inuit taama uumissuitigisut? Tamanna akissutissarsiumallugu uumissuineq sunaasoq, sooq inuit uumissuilertartut aamma sooq sumi tamani uumissuisoqartoq paasisariaqarparput.
Uumissuineq suua?
Uumissuineq tassaavoq inummik inunnilluunniit eqimattanik nuannarinninngilluinnarneq assulluunniit akerarinninneq. Iluarinninngittuarneruvoq.
SOOQ INUIT UUMISSUILERTARTUT
Assigiinngitsorpassuit pissutigalugit uumissuilertarput. Amerlanertigut inuit sulerinerat pissutiginagu kisianni kinaanerat pissutigalugu uumissuisarput. Uumissorneqartut ajortutut, ajoqusiiniartutut pitsanngoriarfissaqanngitsutullu isigineqartarput. Nikanartutut, aarlerinaatilittut ajornartorsiutaasutulluunniit isigineqartarput. Uumissuisut immaqa nakuuserfigineqaramik, eqqunngitsumik pineqaramik arlaannilluunniit pisumik nalaataqaramik akeqqersimaalertarput.
QANOQ SIARUAATTARTOQ
Ilaasa naapissimanngisaannakkatik allaat uumissortarpaat. Assersuutigalugu ilaat ataqqisamik qanigisamilluunniit isiginnittaasiat eqqarsaqqaaratik pigiliutiinnartaramikku kinaassusersiulertarput. Ataasiakkaat inuit eqimattat pillugit uumissuinerat taamaalilluni tamanut siaruaatipallassinnaavoq.
Uumissuinerup siaruaatipallassinnaanera ilisimagutsigu paasisinnaassavarput sooq taama amerlatigisut uumissuisartut. Uumissuinerujussuarli unitsinniarlugu uumissuineq sumit aallaaveqartoq paasisariaqarparput. Tamanna Biibilimit qulaarneqarpoq.
UUMISSUINERUP AALLAAVIA BIIBILIMI QULAARNEQARPOQ
UUMISSUINEQ INUNNIT AALLAAVEQANNGILAQ. Qilammi inngili, Saatanimik Diaavulumik ilisimaneqalersoq, Guutimut pikitsitsimmat uumissuisoqartalerpoq. Diaavulu pikitsitsilerami “toqutsisunngorpoq”. “Sallutuujugami sallumullu ataataagami” uumissuinermik akeqqersimaarnermillu siammarsaajuarpoq. (Johannesi 8:44; Johannesimit 1. 3:11, 12) Biibilimi ajortutut, kamassaqartutut akeqqersimaartutullu allaatigineqarpoq. – Jobi 2:7; Saqqummersitat 12:9, 12, 17.
INUIT NAAMMALLUINNANNGITSUT UUMISSUEQQAJAASARPUT. Inuup siulliup, Adamip, Saatani ajortulioqatigilermagu inuit tamarmik ajorti naammalluinnanngissuserlu kingornuppaat. (Romamiut 5:12) Adamip ernerata angajulliup, Kainip, nukkani Aabeli uumigalugu toquppaa. (Johannesimit 1. 3:12) Soorunami inuppassuit asannittuullutillu nallittuisuupput. Ajortili kingornukkamikku amerlasuut namminissarsiortuupput, usoruttarput makitallutillu – pissutsillu taakku uumissuilersitsisarput. – Timuutiusimut 2. 3:1-5.
AKUERSAARTUUNNGITSUT UUMISSUINERULERTARPUT. Naakkittaatsumik ajortumillu isiginnittaaseqarnermik pissusilersornermillu siammarsaasoqarmat uumissuisoqalertarpoq. ‘Diaavulup inuit allat tamaasa pissaaneqarfigimmagit’ inuppassuit akuersaartuunngillat, siumut isummiussereertarput, nikassaasarput, pimmatiginnittarput sequtserisarlutillu. – Johannesimit 1. 5:19.
Biibilimili uumissuinerup aallaavia aaqqiissutaalu allaatigineqarput.