តើព្រះមាននាមអ្វី?
ពេលអ្នកព្យាយាមស្គាល់អ្នកណាម្នាក់ មុនគេបង្អស់អ្នកទំនងជាសួរថា «តើអ្នកឈ្មោះអ្វី?» បើអ្នកសួរសំណួរនេះទៅព្រះ តើលោកនឹងឆ្លើយយ៉ាងណា?
«[ខ្ញុំ]ជាយេហូវ៉ា នេះហើយជាឈ្មោះរបស់ [ខ្ញុំ]»។—អេសាយ ៤២:៨
តើឈ្មោះនេះថ្មីសម្រាប់អ្នកឬទេ? ប្រហែលជាដូច្នេះ ដោយសារអ្នកបកប្រែគម្ពីរជាច្រើននាក់មិនសូវប្រើឈ្មោះរបស់ព្រះ ឬមិនប្រើសោះតែម្ដង។ ច្រើនដង ពួកគេជំនួសឈ្មោះរបស់ព្រះដោយឋានន្តរ«ព្រះអម្ចាស់»។ ក៏ប៉ុន្តែ តាមពិតឈ្មោះរបស់ព្រះមានជាង៧.០០០ដងក្នុងឯកសារគម្ពីរភាសាដើមទាំងមូល។ ឈ្មោះនោះជាអក្សរហេប្រឺបួនតួដែលបានត្រូវតំណាងដោយអក្សរយហវហឬចហវហ ហើយតាមធម្មតាបានត្រូវបកប្រែជាភាសាខ្មែរថា«យេហូវ៉ា»។
នាមរបស់ព្រះមាននៅក្នុងឯកសារភាសាហេប្រឺនិងសេចក្ដីបកប្រែជាច្រើនទៀត
ហេតុអ្វីឈ្មោះរបស់ព្រះគឺសំខាន់?
ឈ្មោះនោះសំខាន់ចំពោះព្រះផ្ទាល់។ គ្មានអ្នកណាដាក់ឈ្មោះឲ្យព្រះទេ លោកគឺជាអ្នកជ្រើសរើសឈ្មោះនោះដោយខ្លួនលោក។ ព្រះយេហូវ៉ាបានប្រកាសថា៖ «ឈ្មោះអញនៅអស់កល្បជានិច្ច ហើយក៏សំរាប់ជាសេចក្ដីរំឭកពីអញ ដល់គ្រប់ទាំងដំណរៀងរាបតទៅ»។ (និក្ខមនំ ៣:១៥) ក្នុងគម្ពីរ ឈ្មោះរបស់ព្រះមានច្រើនដងជាងឋានន្តររបស់លោក ដែលមានដូចជាព្រះដែលមានឫទ្ធានុភាពខ្លាំងក្លាបំផុត បិតានៅស្ថានសួគ៌ លោកម្ចាស់ ឬព្រះជាដើម ហើយក៏មានច្រើនដងជាងឈ្មោះរបស់បុគ្គលផ្សេងទៀតទាំងអស់ក្នុងគម្ពីរ ដូចជាលោកយេស៊ូ អាប្រាហាំ ម៉ូសេ ឬដាវីឌជាដើម។ ម្យ៉ាងទៀត ព្រះយេហូវ៉ាមានគោលបំណងចង់ឲ្យឈ្មោះរបស់លោកបានឮសុសសាយ។ គម្ពីរចែងថា៖ «ដើម្បីឲ្យគេបានដឹងថា គឺទ្រង់តែ១អង្គ ព្រះនាមជាយេហូវ៉ា ដែលជាព្រះដ៏ខ្ពស់បំផុតលើផែនដីទាំងមូល»។—ទំនុកតម្កើង ៨៣:១៨
ឈ្មោះនោះសំខាន់ចំពោះលោកយេស៊ូ។ ក្នុងសេចក្ដីអធិដ្ឋានដែលគេហៅថាសេចក្ដីអធិដ្ឋានលោកម្ចាស់ឬសេចក្ដីអធិដ្ឋានបិតារបស់យើងនៅស្ថានសួគ៌ លោកយេស៊ូបានបង្រៀនអ្នកកាន់តាមលោកឲ្យអធិដ្ឋានទៅព្រះដោយពាក្យថា៖ «សូមឲ្យនាមរបស់លោកបានបរិសុទ្ធ»។ (ម៉ាថាយ ៦:៩) លោកយេស៊ូផ្ទាល់បានអធិដ្ឋានទៅព្រះថា៖ «បិតាអើយ សូមលើកតម្កើងនាមរបស់លោក»។ (យ៉ូហាន ១២:២៨) លោកយេស៊ូបានលើកតម្កើងនាមរបស់ព្រះដោយចាត់ទុកនាមរបស់ព្រះគឺសំខាន់បំផុតក្នុងជីវិតរបស់លោក ហេតុនេះហើយបានជាលោកអាចមានប្រសាសន៍នៅក្នុងសេចក្ដីអធិដ្ឋាននេះថា៖ «ខ្ញុំបានសម្ដែងឲ្យពួកគាត់ស្គាល់នាមរបស់លោក ក៏នឹងសម្ដែងឲ្យស្គាល់តទៅទៀត»។—យ៉ូហាន ១៧:២៦
ឈ្មោះនោះសំខាន់ចំពោះអ្នកដែលស្គាល់ព្រះ។ នៅអតីតកាល រាស្ដ្ររបស់ព្រះយល់ថាការការពារនិងសេចក្ដីសង្គ្រោះគឺជាប់ទាក់ទងនឹងនាមដ៏ពិសេសរបស់ព្រះ។ «ព្រះនាមព្រះយេហូវ៉ាជាប៉មមាំមួន មនុស្សសុចរិតរត់សុភាសិត ១៨:១០) «អស់អ្នកណាដែលអំពាវនាវដល់ព្រះនាមព្រះយេហូវ៉ានឹងបានប្រោសឲ្យរួច»។ (យ៉ូអែល ២:៣២) គម្ពីរបង្ហាញថាអ្នកដែលបម្រើព្រះត្រូវតែទទួលស្គាល់នាមរបស់លោក។ «ទោះបើអស់ទាំងសាសន៍ប្រព្រឹត្តតាមឈ្មោះរបស់ព្រះនៃគេរៀងខ្លួន គង់តែយើងរាល់គ្នានឹងប្រព្រឹត្តតាមព្រះនាមនៃព្រះយេហូវ៉ា ជាព្រះនៃយើង ជាដរាបរៀងតទៅវិញ»។—មីកា ៤:៥; សកម្មភាព ១៥:១៤
ចូលទៅពឹងជ្រក ហើយមានសេចក្ដីសុខ»។ (តើឈ្មោះរបស់ព្រះបង្ហាញយ៉ាងណាអំពីលោក?
ឈ្មោះនោះបង្ហាញអំពីលក្ខណៈរបស់ព្រះ។ បណ្ឌិតជាច្រើននាក់សន្និដ្ឋានថាឈ្មោះរបស់ព្រះយេហូវ៉ាមានអត្ថន័យថា «លោកដែលធ្វើឲ្យក្លាយជា»។ ព្រះយេហូវ៉ាបានពន្យល់អត្ថន័យនៃឈ្មោះរបស់លោក ពេលលោកមានប្រសាសន៍ទៅកាន់ម៉ូសេដែលជាអ្នកបម្រើលោក។ លោកបានមានប្រសាសន៍សំដៅមកលើលោកផ្ទាល់ ពេលដែលពោលថា៖ «អញជាព្រះដ៏ជាព្រះ»។ (និក្ខមនំ ៣:១៤) ពាក្យនេះជាភាសាហេប្រឺដើមអាចត្រូវបកប្រែថា «ខ្ញុំនឹងក្លាយទៅជាអ្វីដែលខ្ញុំចង់ក្លាយទៅជា»។ ដូច្នេះ ឈ្មោះរបស់ព្រះមិនត្រឹមតែប្រាប់យើងថាលោកគឺជាអ្នកបង្កើតអ្វីៗទាំងអស់ប៉ុណ្ណោះទេ តែឈ្មោះរបស់លោកក៏បង្ហាញអំពីសមត្ថភាពរបស់លោកក្នុងការធ្វើឲ្យលោកផ្ទាល់និងអ្វីៗដែលលោកបានបង្កើតក្លាយទៅជាអ្វីដែលចាំបាច់ដើម្បីសម្រេចគោលបំណងរបស់លោក។ កាលដែលឋានន្តរផ្សេងៗបញ្ជាក់អំពីឋានៈ អំណាច ឬឫទ្ធានុភាពរបស់ព្រះ មានតែឈ្មោះរបស់លោកមួយគត់ដែលបញ្ជាក់អំពីសមត្ថភាពទាំងអស់របស់លោកនិងអ្វីដែលលោកអាចសម្រេច។
ឈ្មោះនោះបង្ហាញថាព្រះចាប់អារម្មណ៍យើង។ អត្ថន័យនៃឈ្មោះរបស់ព្រះសឲ្យឃើញថាលោកតែងតែស្រឡាញ់អ្វីទាំងអស់ដែលលោកបានបង្កើត រួមទាំងយើងផងដែរ។ លើសពីនេះទៀត ការដែលព្រះបានធ្វើឲ្យឈ្មោះរបស់លោកបានឮសុសសាយបញ្ជាក់ថាលោកចង់ឲ្យយើងស្គាល់លោក។ ហេតុនេះហើយ លោកបានប្រាប់ឈ្មោះរបស់លោកដល់យើង មុនយើងសួររកឈ្មោះរបស់លោកទៅទៀត។ យើងឃើញច្បាស់ថា ព្រះចង់ឲ្យយើងចាត់ទុកលោកជាបុគ្គលពិតមួយរូបដែលយើងអាចចូលទៅជិតបាន មិនមែនជាព្រះដែលនៅឆ្ងាយមិនអាចស្គាល់បាននោះទេ។—ទំនុកតម្កើង ៧៣:២៨
ការប្រើឈ្មោះរបស់ព្រះបង្ហាញថាយើងចាប់អារម្មណ៍ចំពោះលោក។ ជាឧទាហរណ៍ អ្នកប្រហែលជាសុំអ្នកណាម្នាក់ដែលនឹងទៅជាមិត្តអ្នកឲ្យហៅឈ្មោះផ្ទាល់របស់អ្នក។ ប៉ុន្តែ តើអ្នកនឹងមានអារម្មណ៍យ៉ាងណាបើអ្នកនោះមិនព្រមប្រើឈ្មោះរបស់អ្នក? អ្នកទំនងជានឹងឆ្ងល់ថាតើបុគ្គលនោះពិតជាចង់ធ្វើជាមិត្តជិតស្និទ្ធរបស់អ្នកឬយ៉ាងណា។ ដូច្នេះ ព្រះក៏មានអារម្មណ៍ដូចគ្នាដែរ។ ព្រះយេហូវ៉ាបានប្រាប់ឈ្មោះរបស់លោកដល់មនុស្សជាតិ ហើយលោកលើកទឹកចិត្តយើងឲ្យប្រើឈ្មោះនោះ។ ពេលយើងធ្វើដូច្នេះ យើងបង្ហាញព្រះយេហូវ៉ាថាយើងចង់ទៅជាមិត្តជិតស្និទ្ធរបស់លោក។ មិនត្រឹមតែប៉ុណ្ណោះ លោកក៏កត់សម្គាល់«ពួកអ្នកដែលនឹកដល់ព្រះនាមទ្រង់»ដែរ។—ម៉ាឡាគី ៣:១៦
ការរៀនអំពីឈ្មោះរបស់ព្រះគឺជាជំហានដំបូងដ៏សំខាន់ដើម្បីស្គាល់លោក។ ក៏ប៉ុន្តែ យើងមិនត្រូវឈប់ត្រឹមនេះឡើយ។ យើងក៏ត្រូវរៀនថាតើលោកមានគុណសម្បត្តិអ្វីខ្លះ។
តើព្រះមាននាមអ្វី? នាមរបស់ព្រះគឺយេហូវ៉ា។ នាមដ៏ពិសេសនោះបញ្ជាក់អំពីលក្ខណៈរបស់លោកថាជាបុគ្គលមួយរូបដែលអាចសម្រេចគោលបំណងទាំងអស់របស់លោក