តើមនុស្សល្អទាំងអស់ទៅស្ថានសួគ៌ឬ?
តើមនុស្សល្អទាំងអស់ទៅស្ថានសួគ៌ឬ?
នៅរាត្រីមុនគេប្រហារជីវិតលោកយេស៊ូ ហើយបន្ទាប់ពីបានទទួលទានអាហារចុងក្រោយជាមួយសាវ័ករបស់លោក នោះលោកយេស៊ូសន្យាថានឹងឲ្យរង្វាន់ពួកគេ គឺពួកគេនឹងមានកន្លែងមួយនៅស្ថានសួគ៌។ លោកយេស៊ូមានប្រសាសន៍ថា៖ «ក្នុងលំនៅរបស់បិតាខ្ញុំមានទីអាស្រ័យជាច្រើន។ បើមិនដូច្នោះ ខ្ញុំបានប្រាប់អ្នករាល់គ្នាហើយ ពីព្រោះខ្ញុំនឹងទៅដើម្បីរៀបចំកន្លែងមួយឲ្យអ្នករាល់គ្នា»។ (យ៉ូហាន ១៤:២) ហេតុអ្វីបានជាលោកយេស៊ូឲ្យពួកគេមានកន្លែងមួយនៅស្ថានសួគ៌? តើពួកគេនឹងធ្វើអ្វីនៅទីនោះ?
លោកយេស៊ូមានកិច្ចការពិសេសឲ្យពួកអ្នកកាន់តាមលោកធ្វើ។ ក្នុងអំឡុងរាត្រីដដែលនោះ លោកបានពោលថា៖ «អ្នករាល់គ្នាបាននៅជាប់ជាមួយនឹងខ្ញុំ ពេលដែលខ្ញុំមានទុក្ខលំបាក ហើយខ្ញុំធ្វើកិច្ចព្រមព្រៀងជាមួយនឹងអ្នករាល់គ្នា ដូចបិតារបស់ខ្ញុំបានធ្វើកិច្ចព្រមព្រៀងជាមួយនឹងខ្ញុំ ពោលគឺសម្រាប់រាជាណាចក្រមួយ»។ (លូកា ២២:២៨, ២៩) ព្រះបានសន្យាជាមួយលោកយេស៊ូថា លោកយេស៊ូនឹងធ្វើជាស្តេចដែលនឹងបំពេញសេចក្ដីត្រូវការដ៏ខ្លាំងបំផុតរបស់មនុស្សជាតិ ពោលគឺរដ្ឋាភិបាលល្អ។ លោកយេស៊ូនឹងសង្គ្រោះមនុស្សពីទុក្ខវេទនា ហើយបំផ្លាញចោលពួកអ្នកដែលបោកប្រាស់ពួកគេ។ ទោះជាលោកនឹងមានរាស្ត្រ«រហូតដល់ទីបំផុតផែនដី»ក៏ដោយ លោកនឹងសោយរាជ្យពីស្ថានសួគ៌វិញ។—ទំនុកតម្កើង ៧២:៤, ៨; ដានីយ៉ែល ៧:១៣, ១៤
ទោះបីយ៉ាងណាក៏ដោយ លោកយេស៊ូនឹងមិនសោយរាជ្យម្នាក់ឯងទេ។ ហេតុនេះ លោកបានសន្យាជាមួយសាវ័កថានឹងឲ្យពួកគេមានកន្លែងនៅស្ថានសួគ៌។ ពួកគេជាមនុស្សដំបូងដែលបានត្រូវជ្រើសរើសឲ្យ«ធ្វើជាស្តេចគ្រប់គ្រងលើផែនដី»។—ការបើកបង្ហាញ ៥:១០
តើមានមនុស្សប៉ុន្មាននាក់ទៅស្ថានសួគ៌? ដូចរដ្ឋាភិបាលណាក៏ដោយ អ្នកគ្រប់គ្រងក្នុងរាជាណាចក្ររបស់ព្រះនៅស្ថានសួគ៌ មានចំនួនតិចបើប្រៀបនឹងចំនួនមនុស្សទាំងអស់ដែលរស់នៅក្រោមការគ្រប់គ្រងរបស់រដ្ឋាភិបាលព្រះ។ ចំពោះអស់អ្នកដែលនឹងគ្រប់គ្រងជាមួយលោកយេស៊ូ នោះលោកមានប្រសាសន៍ថា៖ «ហ្វូងតូចអើយ កុំខ្លាចឡើយ ពីព្រោះបិតារបស់អ្នកពេញចិត្តឲ្យរាជាណាចក្រដល់អ្នករាល់គ្នា»។ (លូកា ១២:៣២) នៅទីបំផុត«ហ្វូងតូច»នោះនឹងមានចំនួន១៤៤.០០០នាក់។ (ការបើកបង្ហាញ ១៤:១) ចំនួននោះគឺតិចតួចបើប្រៀបនឹងចំនួនមនុស្សរាប់លាននាក់ដែលធ្វើជារាស្ត្រដ៏ស្មោះត្រង់នៃរាជាណាចក្រព្រះ ហើយពួកគេនឹងសប្បាយនឹងជីវិតដែលគ្មានទីបញ្ចប់នៅផែនដី។—ការបើកបង្ហាញ ២១:៤
ដូច្នេះ មិនមែនមនុស្សល្អទាំងអស់ទៅស្ថានសួគ៌ទេ។ សាវ័កពេត្រុសបាននិយាយអំពីដាវីឌដែលជាស្តេចល្អថា៖ «ដាវីឌមិនបានឡើងទៅស្ថានសួគ៌ឡើយ»។ (សកម្មភាព ២:៣៤) យ៉ូហានជាអ្នកជ្រមុជទឹក គាត់ក៏ជាមនុស្សល្អម្នាក់ដែរ។ ក៏ប៉ុន្តែ លោកយេស៊ូបានបញ្ជាក់ថា គាត់នឹងមិនមានឯកសិទ្ធិសោយរាជ្យជាស្តេចនៅស្ថានសួគ៌ទេ។ លោកមានប្រសាសន៍ថា៖ «ក្នុងចំណោមមនុស្សទាំងអស់ដែលធ្លាប់រស់នៅ គ្មានអ្នកណាលេចមកដែលធំជាងយ៉ូហាន ជាអ្នកជ្រមុជទឹកឡើយ។ ប៉ុន្តែអ្នកដែលតូចជាងគេក្នុងរាជាណាចក្រស្ថានសួគ៌គឺធំជាងគាត់»។—ម៉ាថាយ ១១:១១
តើលោកអ្នកនឹងទទួលរង្វាន់សម្រាប់មនុស្សល្អឬទេ?
ដើម្បីទទួលជីវិតជារៀងរហូតនៅផែនដីជារង្វាន់ តើមនុស្សយើងត្រូវធ្វើអ្វី? លោកយេស៊ូបានពោលថា៖ «ព្រះស្រឡាញ់ពិភពលោកដល់ម្ល៉េះបានជាលោកបានឲ្យបុត្រតែមួយរបស់លោក ដើម្បីឲ្យអស់អ្នកដែលបង្ហាញជំនឿលើបុត្រនោះអាចមានជីវិតដែលគ្មានទីបញ្ចប់ ហើយមិនត្រូវបំផ្លាញឡើយ»។ (យ៉ូហាន ៣:១៦) សូមកត់សម្គាល់ថា សេចក្ដីស្រឡាញ់របស់ព្រះចំពោះពិភពលោក បានជំរុញលោកឲ្យចាត់វិធានការដើម្បីមនុស្សទាំងអស់អាចមានជីវិតដែលគ្មានទីបញ្ចប់ ប៉ុន្តែមានតែពួកអ្នកដែល«បង្ហាញជំនឿ»ប៉ុណ្ណោះទើបអាចទទួលរង្វាន់នោះបាន។
ជំនឿត្រូវមានមូលដ្ឋានលើចំណេះត្រឹមត្រូវ។ (យ៉ូហាន ១៧:៣) លោកអ្នកអាចបង្ហាញថា លោកអ្នកជាមនុស្សល្អដោយរៀនថែមទៀតអំពីគោលបំណងរបស់ព្រះយេហូវ៉ាសម្រាប់មនុស្សជាតិ។ ចូរឲ្យជំនឿរបស់លោកអ្នកជំរុញឲ្យលោកអ្នកប្រព្រឹត្តតាមអ្វីដែលលោកអ្នកបានរៀន។ ហើយសូមជឿជាក់ថា លោកអ្នកពិតជាអាចទទួលជីវិតដែលគ្មានទីបញ្ចប់បាន។
[ប្រអប់នៅទំព័រ៧]
តើសៀវភៅគម្ពីរចែងយ៉ាងណា?
សំណួរ:
ពេលមនុស្សល្អស្លាប់ទៅ តើមានអ្វីកើតឡើងដល់ពួកគេ?
ចម្លើយ:
«មនុស្សស្លាប់ឥតដឹងអ្វីឡើយ»។—សាស្ដា ៩:៥
សំណួរ:
តើមនុស្សល្អមានសេចក្ដីសង្ឃឹមអ្វីចំពោះអនាគត?
ចម្លើយ:
«នឹងមានវេលាមកដល់ ដែលអស់អ្នកនៅក្នុងផ្នូរដែលសម្រាប់ជាទីរំលឹក នឹងឮសំឡេងរបស់លោក[យេស៊ូ] ហើយចេញមក»។—យ៉ូហាន ៥:២៨, ២៩
សំណួរ:
តើមនុស្សល្អភាគច្រើននឹងរស់នៅទីណា?
ចម្លើយ:
«ពួកអ្នកសុចរិតនឹងបានស្រុកទុកជាមរដក ហើយនឹងនៅក្នុងស្រុកនោះ[ផែនដី]ជានិច្ច»។—ទំនុកតម្កើង ៣៧:២៩