O Kwila o Utuminu wa Nzambi Kima Kyala ku Muxima Wetu?
O Bibidya itambwijila
Kana, o Utuminu wa Nzambi ki kima kyala ku mixima ya Jikidistá. a O Bibidya ijimbulula se bhwebhi bhwakala o Utuminu wa Nzambi, mu kwixana o Utuminu kala, “o Utuminu wa dyulu.” (Mat. 4:17) Tumone kyebhi o Bibidya ijimbulula kuma o Utuminu Nguvulu ya kidi yala ku dyulu.
O Utuminu wa Nzambi wala ni jinguvulu, athu, itumu ni kikalakalu kya kubhangesa kwila o vondadi ya Nzambi a ibhange ku dyulu ni mu ixi.—Matesu 6:10; Dijingunwinu 5:10.
O Nguvulu mba o Utuminu wa Nzambi wanda tumina o “miji yoso, ni ifuxi, ni madimi moso,” ya ngongo yoso. (Daniyele 7:13, 14) Nzambi mwene wabhana o ungana ku Utuminu yu, ki athu kana.—Jisálamu 2:4-6; Izaya 9:7.
Jezú wambe kuma o jipoxolo jé jafiyele ejidibunda kumoxi ni mwene phala akale mu Utuminu wa dyulu kala jisobha.—Luka 22:28, 30.
O Utuminu wa Nzambi wala ni jinguma jé, maji mwene wanda bwika o jinguma jiji.—Jisálamu 2:1, 2, 8, 9; 110:1, 2; 1 Kolindu 15:25, 26.
O Bibidya ki ilonga kwila o Utuminu wa dyulu wala ku muxima wetu mu ukexilu wa kwila, mwene utumina ku mixima ya athu. Maji ilondekesa kwila “o maka ma Utuminu” mba o njimbu . . . “yambote ya Utuminu” yatokala kufwinyisa o muxima wetu.—Matesu 13:19; 24:14.
Ihi ilombolola o izwelu “o Utuminu wa Nzambi wala moxi dyenu”?
O kima kibhangesa athu avulu kukala ni jiphata se o Utuminu wala kwebhi, o ukexilu wa Jibibidya javulu kulungulula o divulu dya Luka 17:21. Mu kifika o Bibidya Almeida, revista e atualizada yamba: “O Utuminu wa Nzambi wala moxi dyenu.” Phala kutendela kyambote o velusu yiyi twatokala kwijiya kyambote o musoso oso.
O Utuminu wa Nzambi ki wexile ku mixima ya jinguma ja Jezú, exile akwa ukumbu ni ijibhanganga
Jezú wexile mu zwela ni kibuka kya atwameni a jingeleja, a exanene Jifalizewu. Ene exile jinguma jê, exile mu sota ku mujibha. (Matesu 12:14; Luka 17:20) O kwila tutena kuxikina kuma, o Utuminu kima kyexile ku mixima ya Jifalizewu jojo akwa ukumbu? Jezú wa ambela: “Moxi dyenu, mwezala ni mangonya ni ituxi yoso.”—Matesu 23:27, 28.
O Jibibidya ja mukwa, alungulala kyambote o izwelu ya Jezú mu divulu dya Luka 17:21, jene jamba: “O Utuminu wa Nzambi wala bhukaxi kenu.” (Nova Versão Internacional) “O Utuminu wa Nzambi wala mwaxaxi kenu.” (Tradução do Novo Mundo) O Utuminu wa dyulu wexile bhukaxi mba mwaxaxi ka Jifalizewu, mukonda Jezú o muthu amusolo kwala Nzambi kala Sobha, wexile bhu pholo yâ.—Luka 1:32, 33.
a Jingeleja javulu jene mulonga kuma o Utuminu wa Nzambi kima kyala moxi dya muthu, mba ku muxima. Mu kifika ku ixi ya Estados Unidos o ngeleja ya Batista ilonga kwila o “Utuminu wa Nzambi utumina ku mixima ya athu mba ku mwenyu wâ.” Kumbandu yamukwa mu divulu dye ni dyambu Jezú dya Nazale, o Papa Bento XVI wa soneka: O “Utuminu wa Nzambi ukala ku mixima ya yó ene mubhana matwi.”
Eye Nange Wandawabhela we o Maka Yá
ESSENTIAL BIBLE TEACHINGS
O Utuminu wa Nzambi Ihi?
Mu kithangana kya ukunji wê mu ixi, Jezú wa zwela dingi ya lungu ni Utuminu mak’engi ndenge. Mu mivu yavulu, athu ene mu samba mu kubhinga kwila utuminu yu wize.
O MULANGIDI
Nanyi o Sobha ya Utuminu wa Nzambi?
Asoneki avulu a Bibidya, a soneka o ima yeji kwatekesa kwijiya o muthu weji kala o Sobha ya Utuminu wa Nzambi. Ku athu oso mu ngongo, kwene ngó muthu umoxi wa fwama kukala Sobha yambote.
MILONGI YA BIBIDYA
Fikisa Kudilonga o Bibidya N’etu
Dilonge o Bibidya ni kikwatekesu kya mulongexi, eye kubhingi kufuta kitadi.