Di teşkîleta meda, terêqara yanê jî ulmdarara, heq nayê dayînê. Çaxê civata mesîhiya hate saz kirinê, mêrêd cêribandî hatine kifşkirinê, seva ku “şivantiyê civîna Xwedê bikin” (Karêd Şandiya 20:28). Rûspî, mêrêd cêribandî û maqûl in, ewana di civatêda şivantiyê yanê rêberiyê hil­didin li ser xwe, “ne ku bê dil, lê bi dil û can” evî şixulî dikin, “çawa Xwedê dixwaze, ne ku bona kara xwe, lê bi rez­edilî” (1 Petrûs 5:1-3). Niha emê pêbihesin, ev çi şixul e ku ewana dikin.

Rûspî bona me xem dikin, û me xwey dikin. Rûspiyêd civatê ji Kitêba Pîroz rêberiyê didin û bi vê yekê alî civatê dikin, wekî ew di ruhanîda pêşda here. Rûspî zanin, ku Yahowa şixulekî gele ferz daye wan, ewana hukumî li ser endamêd civatê nakin, lê bona halxwaşî û şabûna me ji aliyê xweva hemû tiştî dikin (2 Korintî 1:24). Mîna şivanekî, yê ku eşq û dil miqatî her pezêd xwe dibe, rûspî jî mecala digerin ku tevî her endamêd civatê bibine nas (Metelok 27:23).

Rûspî me hîn dikin, çawa qirara Xwedê biqedînin. Her heftê rûspî li ser civatê kelma duxûnin, û bi vê yekê baweriya me qewî dikin (Karêd Şandiya 15:32). Xêncî vê yekê, ev mêrêd amin rêberiyê hildidin li ser xwe, ku tevî me mizgîniyê dannasîn bikin, û bi hemû aliyava me hîn dikin, ku çawa qulix kin.

Rûspî her kesa dilgerm dikin. Seva ku alî me bikin hele­qetiya me tevî Yahowa hê bişide, rûspî dikarin bêne mala me yan jî di Oda Civatêda tevî me xeber din, wekî dilbîniyê ji Kitêba Pîroz bidine me û me qewî kin (Aqûb 5:14, 15).

Xêncî qulixkirina di civatêda, ewana usa jî miqatî neferêd mala xwe dibin û dixebitin jî. Ser wan hemû şixula gelek wede tê xerckirinê. Lema jî ev birêd şixulhez, hêja ne ku em qedrê wan bigirin (1 Têsalonîkî 5:12, 13).

• Ça rûspî alî civatê dikin?

• Bi çi şixulî rûspî nîşan dikin, ku bona her kesa ji me xem dikin?