E “fu ya nkal’ambote” i mavangu mana tutondanga yo yambula vo mafila e zingu kieto. Muna bonga e nona, konso muntu mu yeto ovanganga e ngolo za kala nkwa ziku. Muna diadi, nanga ovanganga mpe ngolo za longa o mwan’aku kasonganga e fu kiaki.

E fu ya nkal’ambote mpe ngwizani ina ye kadilu kia muntu. Kasikil’owu, ndiona wina ye fu ya nkal’ambote okalanga se nsadi a vema, nkwa unsongi ye ovuanga akaka o mfunu. Diasazu dikalanga kwa muntu mu yima e fu yayi muna kileke.

DINA BIBILA KIVOVANGA: “Longa mwana muna nzila ina kafwete kwendela; Kana nkutu vava kenuna ke vengomoka mo ko.”—Ngana 22:6.

Wau vo e ngangu za nza mu nungunuka kaka zina, diamfunu kikilu mu kala ye fu ya nkal’ambote. Ngudi mosi oyikilwanga vo Karyn wavova vo: “O muntu olenda tala mambu mambi muna konso telefone ye konso ntangwa. Tulenda kweto kala vamosi yo wana eto, kansi ke tuzaya wo ko vo mambu mansoni bena tala.”

DINA BIBILA KIVOVANGA: “Awana bazikuka, . . . balongwa mu zaya swaswanesa edi diambote ye diambi.”—Ayibere 5:14.

E kadilu kiambote mfunu kikilu kina. Kifilanga o muntu mu kala ye fu kia vova vo “dodokolo” ye “ntondele.” Kifilanga mpe o muntu mu tokanena e wete dia wantu ankaka. E diambu diadi diamfunu kikilu, kadi o unu, wantu aparelho zau beluta tokanenanga ke mu wantu akaka ko.

DINA BIBILA KIVOVANGA: “Konso una nuzolele vo wantu banuvanga, i una mpe nuvanga kwa yau.”—Luka 6:31.

Toma songa e kadilu yaku yambote kwa wan’aku. Kasikil’owu, lufimpu lumosi lusonganga vo avo mase batomene kiesesa wan’au vo o vukana lembi kazala diambu diambi, diasazu dikala kwa wana balemvokela luludiku lwalu.

LUSADISU: Avo diambu dibwidi yovo nsangu nuwidi, sadila e lau diodio muna mokena yo wan’aku e diambu ditadidi fu yambote. Avo nsangu nutalanga yovo wá zivovele o muntu ovolele nkanu mu kuma kia fu kia sia mpambula, ongeye olenda vovesa mwan’aku vo: “Diankenda mu mona una wantu ankaka bemengenanga akwau yo kubakota o nsoki. Aweyi obenze balwakidi mu tezo kiaki?”

“Avo nleke kazeye swaswanesa mbi ye mbote ko, diampasi dikala kwa yandi mu sola kana vo kafwete vanga e mbote yovo mbi.”—Brandon.

Longa mwan’aku kasonganga e fu yambote. Kana nkutu i wana akete balenda kwau longoka vova vo “dodokolo” ye “ntondele” yo tokanena e wete dia wantu akaka. Nkanda umosi uvovelanga e ndekwa za sansila wana uvovanga vo: “Avo wana batomene sasilwa vo oyau mu kati kwa kimvuka kianene bena, nze kimvuka kia esi nzo, kia wana sikola, kia esi belo, diasazu dikala kwa yau mu tokanena e wete dia wantu akaka yo kubavanga o wete.”

LUSADISU: Vana e yaka salu ya nzo kwa mwan’aku kasala. Muna mpila yayi, mwan’aku olongoka o mfunu wa vanga o mambu muna wete dia wantu akaka.

“Avo wan’eto bayimini e fu kia sala e salu ya nzo owau, ke dikala mpasi ko kwa yau vava bezinga yau mosi kaka. Kadi o sala e salu dikala se mpila zingu kiau kia lumbu ke lumbu.”—Tara.