Vava yakala yo nkento besalanga kumosi, bena nze nati a ndeki yo nsadisi andi ana besalanga entwadi muna nata e ndeki ku fulu kimosi. Vava bewanananga ye mambu mampasi ke besianga kaka sungididi muna yau kibeni ko, kansi muna muntu yo nkwandi.

DINA BIBILA KIVOVANGA: “Ke nwole diaka ko, kansi nitu mosi.”—Matai 19:6.

“O longo ke luna nze salu ko kina o muntu kalenda sala yandi mosi. O yakala yo nkento bafwete salanga kumosi kimana bakala yo longo lwakiese.”—Christopher.

Vava vebwanga e ntantani, akazi ana ke besalanga kumosi ko, betumbaziananga vana fulu kia singika e mambu. Muna kuma kiaki, o mambu makete mekitukanga se mampwena.

“O zaya sala kumosi diamfunu kikilu muna longo. Avo mono kisalanga kumosi ko yo yakala diame, ke tukala se akazi ko, okala kaka nze nkwame a suku. Tukala kaka nze wantu wole ana bezingilanga kumosi kansi ke bewizananga ko muna baka e nzengo zamfunu.”—Alexandra.

UKIYUVULA

• Nga ibadikilanga e nzimbu ibakanga vo “zamono mosi kaka”?

• Nga ikalanga kaka mu luvuvamu avo kina vamosi ko yo nkento ame yovo yakala diame?

• Nga ivenganga kala vamosi ye yitu ya yakala diame yovo nkento ame kana nkutu vo ngwizani ambote bena yau?

MOKENA YO NKANZ’AKU

• Mu nkia mambu muna longo tulendanga sala kumosi lembi tantana?

• Nkia mambu tufwete tomesa?

• Adieyi tufwete vanga muna tomesa o mambu muna longo lweto?

LUSADISU

• Yindula vo o longo lwaku luna nze nsaka za tá somba, yeno awole mu buka yaswaswana nuina. Nusia e ngolo muna bakula mana nufwete vanga kimana nuakala mu buka kimosi vana fulu kia kala mu buka yaswaswana.

• Vana fulu kia yindula vo: ‘Aweyi ndenda sundila?’ Yindula vo: “Aweyi yeto awole tulenda sundila?”

“Kuvavi zaya ko kana nani una ye ndungidi yovo ngielele. Edi disundidi o mfunu i siamisa o luvuvamu ye kintwadi muna longo.”—Ethan.

DINA BIBILA KIVOVANGA: “Ke nuvavingi kaka wete wa yeno kibeni ko, kansi wete dia akaka mpe.”—Filipi 2:3, 4.