Batu babañata bababuzanga puzo ye, batomohile lipilu kabakala kuli nebashwezwi ki balatiwa babona; habatokwi feela likalabo kono batokwa kuomba-ombiwa. Babañwi baanga kuli pulao yesituhu yeo ibonisa kuli bumaswe bwa batu buekezehile hahulu, mi bafumana taata kulumela kuli Mulimu uteñi.

 Mubonelo ofosahezi: Haluswaneli kubuza Mulimu libaka hanaatuhelezi Pulao Yesituhu yeo.

 Niti ya taba: Batu bane banani tumelo yetuna nebabuzize Mulimu libaka hanaatuhelezi bumaswe. Ka mutala, mupolofita Habakuki naabuzize Mulimu kuli: “Kiñi hautuhelela mifilifili, bumaswe, bukebenga, ni situhu kuata?” (Habakuki 1:3, Bibele ya Contemporary English Version) Kufita kukalimela Habakuki, Mulimu naaboni teñi kuli lipuzo zanaabuzize zañolwa mwa Bibele kuli batu kaufela balibale.

 Mubonelo ofosahezi: Mulimu haana taba ni manyando a batu.

 Niti ya taba: Mulimu utoile bumaswe ni manyando atahiswanga ki bumaswe. (Liproverbia 6:16-19) Mwa linako za Nuwe, Mulimu “[naautwile] butuku kwa pilu yahae” bakeñisa bumaswe bwa batu bone buekezehile hahulu mwa lifasi. (Genese 6:5, 6; litaluso ze kwatasi) Kusina kukakanya, Mulimu naautwile hahulu butuku kwa pilu hane kubile ni Pulao Yesituhu ya Majuda.—Malaki 3:6.

 Mubonelo ofosahezi: Pulao Yesituhu ya Majuda neli koto yanaafile Mulimu Majuda.

 Niti ya taba: Mulimu naalumelelize kuli Jerusalema isinyiwe ki Maroma ba mwa linako za baapositola. (Mateu 23:37–24:2) Kono kuzwa nako yeo, Mulimu hashemubangi sicaba sesiñwi kamba kusifa koto. Ku Mulimu “hakuna shutano mwahalaa Majuda ni Magerike.”—Maroma 10:12, Bibele ya Good News Translation.

 Mubonelo ofosahezi: Kambe kunani Mulimu yalilato ni yamaata kaufela, naasike atuhelela Pulao Yesituhu ya Majuda.

 Niti ya taba: Nihaike kuli Mulimu haki yena yatahisanga manyando, fokuñwi waatuhelelanga ka nakonyana.—Jakobo 1:13; 5:11.

 Mulimu naatuhelezi Pulao Yesituhu yeo ka libaka leliswana latuhelezi batu kaufela kunyanda: ki kabakala litaba zenezusizwe lilimo zeñata-ñata kwamulaho. Bibele ibulela hande kuli ka nako ya cwale, Diabulosi ki yena yabusa lifasi isiñi Mulimu. (Luka 4:1, 2, 6; Joani 12:31) Nihaike kuli taba yeswalisana ni taba ye, italusa hande libaka Mulimu hatuhelezi manyando, litaba za niti zepeli zefumaneha mwa Bibele zakona kumitusa kuziba libaka Mulimu hanaatuhelezi Pulao Yesituhu ya Majuda.

1.   Ki tukuluho ya bo mañi yetahisize kuli kube ni Pulao Yesituhu yeo? Mulimu naataluselize bo muuna ni musali bapili, bona bo Adama ni Eva, lika zanaatokwa ku bona, kono naasika bahapeleza kuli bamuutwe. Bona bañi nebaiketezi zene bakaanga kuba zende ni zemaswe, mi katulo yabona yemaswe, hamohocwalo ni likatulo zeswana zemaswe zebaezize batu kuzwa feela kwamulaho, litahisize kuli batu banyande hahulu. (Genese 2:17; 3:6; Maroma 5:12) Buka ya Statement of Principles of Conservative Judaism, ibulela cwana: “Buñata bwa manyando elukopana ni ona kacenu atahiswa ki kusaitusisa hande tukuluho yelunani yona.” Kufita kuzamaisa lika kaufela zelueza, Mulimu ufile batu tukuluho ya kueza lika zebabata.

2.   Mulimu wakona kufelisa lika kaufela zemaswe zetahisizwe ki Pulao Yesituhu mi mane ukaeza cwalo. Mulimu usepisa kuli ukazusa batu babañata-ñata babashwile, kukopanyeleza cwalo ni batu bane babulailwe ka nako ya Pulao Yesituhu ya Majuda. Hape ukafelisa masitapilu a batu bane bapunyuhile pulao yeo, ili babasa hupula lika zeneezahezi. (Isaya 65:17; Likezo 24:15) Bakeñisa kuli Mulimu walulata, ukataleleza lisepiso zahae.—Joani 3:16.

 Batu babañata bane bapunyuhile Pulao Yesituhu ya Majuda nebazwezipili kuba ni tumelo ni kuba ni tabo kabakala kuli nebautwisisa libaka Mulimu hatuhelezi bumaswe ni mwakafeliseza lika kaufela zetahiswa ki bumaswe.