Kisannla Ki Pou Al Viv dan Lesiel?
Seki Labib dir
Bondie finn swazir enn tigit Kretien ki fidel pou ki apre zot lamor, zot resisite pou al viv dan lesiel. (1 Pier 1:3, 4, Nouvo Testaman Dan Kreol Morisien, NTKM) Pou ki zot gagn sa rekonpans-la, zot bizin kontign obeir Bondie ek kontign ena enn lafwa for.—Efezien 5:5, NTKM; Filipien 3:12-14, NTKM.
Ki kitsoz bann ki al dan lesiel pou fer?
Zot pou travay ansam avek Zezi kouma lerwa ek pret pandan 1,000 an. (Revelasion 5:9, 10, NTKM; 20:6, NTKM) Zot pou form “nouvo lesiel,” setadir gouvernman Bondie dan lesiel, ek zot pou diriz lor “nouvo later,” setadir bann dimounn ki lor later. Depi lesiel zot pou diriz bann dimounn ki lor later, ek zot pou ed bann-la pou viv dan fason ki Bondie ti anvi depi koumansman.—Izai 65:17; 2 Pier 3:13, NTKM.
Komie dimounn pou resisite pou al dan lesiel?
Labib dir ki 144,000 dimounn pou resisite pou al viv dan lesiel. (Revelasion 7:4, NTKM) Revelasion 14:1-3 koz lor enn vizion ki lapot Zan ti gagne. Dan sa vizion-la, li ti trouv “Annyo pe dibout lor montagn Sion. Avek li ti ena san karann-kat mil dimoun.” Dan sa vizion-la, “Annyo” reprezant Zezi ki’nn resisite. (Zan 1:29, NTKM; 1 Pier 1:19, NTKM) “Montagn Sion” reprezant pozision inportan ki Zezi ek bann 144,000 ena, kan zot pou regne dan lesiel.—Psom 2:6, NTKM; Ebre 12:22, NTKM.
Apel bann “ki Bondie finn apele ek swazire” pou regn avek Lekris dan Rwayom Bondie, “ti troupo.” (Revelasion 17:14, NTKM; Lik 12:32, NTKM) Sa montre ki zot tigit konpare ar tou bann mouton Zezi.—Zan 10:16, NTKM.
Seki bann dimounn panse lor bann ki pou al viv dan lesiel
Sertin dimounn panse: Tou bann bon dimounn pou al viv dan lesiel.
Laverite: Bondie promet ki laplipar bann bon dimounn pou viv pou touletan lor later.—Psom 37:11, 29, 34, Psom an Kreol Morisien, PKM.
Zezi ti dir: “Personn pa finn mont dan lesiel.” (Zan 3:13, NTKM) Sa montre ki bann bon dimounn ki’nn mor avan li, kouma par exanp Abraam, Moiz, Zob, ek David pa ti al dan lesiel. (Zistwar Bann Apot 2:29, 34, NTKM) Okontrer, zot ena lesperans pou regagn lavi lor later.—Zob 14:13-15.
Kan Labib servi lexpresion “premie rezireksion,” li fer referans ar bann ki pou resisite pou al viv dan lesiel. (Revelasion 20:6, NTKM) Sa montre ki pou ena enn lot rezireksion. Ek sa pou arive lor later.
Labib ansegn nou ki pandan ki Rwayom Bondie pou dirize, ‘pa pou ena lamor.’ (Revelasion 21:3, 4, NTKM) Sa promes-la konsern bann ki pou viv lor later, parski lamor pa existe dan lesiel.
Sertin dimounn panse: Nou kapav deside si nou anvi viv dan lesiel ouswa lor later.
Laverite: Se Bondie ki deside kisannla pou ‘gagn pri pou al lao,’ setadir lesperans pou al viv dan lesiel. (Filipien 3:14) Se pa nou ki swazir si nou anvi servi Bondie dan lesiel ouswa lor later.—Matie 20:20-23, NTKM.
Sertin dimounn panse: Lavi dan lesiel pli bon ki lavi lor later. Se bann dimounn ki pa merit pou al viv dan lesiel ki pou viv lor later.
Laverite: Bondie apel bann ki pou viv pou touletan lor later “mo pep,” “bann ki mo’nn swazir,” ek bann “ki Zeova inn beni.” (Izai 65:21-23) Zot pou viv pou touletan ek zot pou gagn lazwa pou fer later vinn enn paradi. Se samem ki Bondie ti anvi pou bann dimounn o-koumansman.—Zenez 1:28; Psom 115:16, PKM; Izai 45:18.
Sertin dimounn panse: Sif 144,000 ki mansione dan Revelasion li sinbolik, pa literal.
Laverite: Mem si dan liv Revelasion ena bann sif sinbolik, parfwa ena bann sif ki literal. Par exanp, li koz lor “nom douz apot Annyo Bondie.” (Revelasion 21:14, NTKM) Kouma nou kone ki sif 144,000 li enn sif literal?
Revelasion 7:4 dir ki ‘kantite tou bann ki ti finn resevwar sele [ouswa, ki sir ki zot pou al viv dan lesiel]: zot san karann-kat mil dan sak tribi pep Izrael.’ Apre sa, Labib koz lor enn lot group: “Enn gran lafoul ki personn pa kapav konte.” Bondie pou osi donn lavi sov sa “gran lafoul” la. (Revelasion 7:9, 10, NTKM) Si sif 144,000 pa ti enn sif literal, me ti fer referans ar tou bann ki pou gagn lavi sov, li pa ti pou fer sans ki koz lor enn lot group dimounn “ki personn pa kapav konte.” a
Anplis, dekrir bann 144,000 kouma “bann premie fri” ki finn aste parmi bann imin. (Revelasion 14:4, NTKM) Lexpresion “bann premie fri” fer referans ar enn ti group ki form parti enn pli gran group. Sa lexpresion-la dekrir bien bann ki pou regne avek Lekris ek ki pou diriz lor bann sitwayen ki pou lor later ek ki pa kapav konte.—Revelasion 5:10, NTKM.
a Konsernan sif 144,000 ki mansione dan Revelasion 7:4, Profeser Robert L. Thomas ti dir: “Sa sif presi la, li diferan ar sif ki pa kapav konte ki mansione dan Revelasion 7:9. Si pran li dan enn sans sinbolik, savedir ki nou pa pou kapav konsider okenn sif dan liv Revelasion kouma enn sif literal.”—Revelation 1-7: An Exegetical Commentary, paz 474.
Ena Osi
ESSENTIAL BIBLE TEACHINGS
Ki Ete Rwayom Bondie?
Pandan so minister lor later, Zezi ti ansegn lor Rwayom Bondie plis ki ninport ki lezot size. Pandan plizir siek, so bann disip finn priye pou ki sa Rwayom-la vini.
