27 JONA 2019
ITALIA

Mahaliana ny Dokotera any Italia ny Fitsaboana Solon’ny Fampidiran-dra

HANDEFA

Nitsidika ny tranohevantsika ny manam-pahaizana momba ny fitsaboana, nandritra ny fihaonam-be SIAARTI tany Palerme

Betsaka ny dokotera nankasitraka ny ezaka nataon’ny fandaminantsika mba hanazavana amin’ny olona ny teknika fitsaboana sy fandidiana hialana amin’ny fampidiran-dra. Mandray anjara amin’io ezaka maneran-tany io ny Sampan-draharahan’ny Filan-kevitra Momba ny Hopitaly (Italia), ao amin’ny biraon’ny sampan’ny Vavolombelon’i Jehovah any Roma. Natao tamin’ny 10 ka hatramin’ny 13 Oktobra 2018 tao Palerme, any Sisila, ny Kongresy Nasionalin’ny Mpitsabo Italianina Mpanao Fanatoranana, Fanadontoana, Famelomana Aina, ary Mpanara-maso Akaiky ny Marary Mafy (SIAARTI). Nanangana tranoheva tao amin’io kongresy io ny solontenan’ny Sampan-draharahan’ny Filan-kevitra Momba ny Hopitaly (Italia) sy ny Komity Mifandray Amin’ny Hopitaly. Nanao fampirantiana tao amin’ny Fihaonam-ben’ny Manam-pahaizana Momba ny Fandidiana koa izy ireo taorian’izay. Natao tao amin’ilay toerana antsoina hoe “La Nuvola”, any Roma, izy io.

Mety tsara ireny fihaonam-be ireny satria dokotera maro indray miaraka no azo omena ny fanazavana farany momba ny fitsaboana tsy ampiasana ra. Anestezista 2800 no nanatrika an’ilay tany Palerme. Mpandidy 3500 kosa no nanatrika an’ilay tany Roma, ary voalaza hoe io no fihaonam-ben’ny mpandidy be mpanatrika indrindra tany Italia, hatramin’izay. Nanatrika tao koa ny solontena avy amin’ny ivon-toeram-pitsaboana malaza isan-karazany, anisan’izany ny mpikambana rehetra ao amin’ny fikambanan’ny Italianina mpandidy sy ny avy ao amin’ny Italy Chapter ao amin’ny American College of Surgeons. Nanohana an’io fihaonam-be io ny Minisiteran’ny Fahasalamana sy ny andrim-panjakana hafa.

Nitsidika ny tranohevantsika tao Palerme i Vincenzo Scuderi, anestezista ao amin’ny Hopitaly Policlinico any Catane, any Sisila. Tsy maintsy nodidiany haingana ny Vavolombelon’i Jehovah iray, tamin’ny 18 Janoary 2019, satria tataka ny mpanelirà lehibe tao amin’io marary io. Vitany soa aman-tsara ilay fandidiana tena sarotra na dia tsy nampidirana ra aza ilay marary. Hoy ny Dr. Scuderi: “Nanampy be anay [ilay tranohevanareo] tamin’ny Kongresy SIAARTI 2018. Tena nilainay mihitsy ny antontan-taratasy misy fanazavana nomenareo.”

Dokotera 5000 mahery izao any Italia no manaiky hitsabo sy handidy Vavolombelon’i Jehovah amin’ny fomba tsara sy azo antoka, nefa tsy hampiditra ra. Vavolombelon’i Jehovah 16000 eo ho eo isan-taona no mahazo fitsaboana hoatr’izany, any Italia.

Efa nitsabo Vavolombelon’i Jehovah ireto anestezista sy dokotera mpandidy ireto, ary naneho ny heviny izy ireo, taorian’ireo fihaonam-be.

“Efa an-taonany maro aho no nitsabo Vavolombelon’i Jehovah. Manangona fanazavana momba ny marary tsy manaiky hampidiran-dra ny Mpanao Fanadihadiana anisan’ny fikambanana iray mpanao fikarohana ao amin’ny SIAARTI. Tato anatin’ny taona vitsivitsy, dia namoaka toromarika ireo Mpanao Fanadihadiana ireo mba hanampiana ny anestezista hanaraka fomba fiasa mitovy rehefa sarotra ilay fandidiana na sarotra toranina ilay marary. Lasa hain’ny dokotera rehetra àry ny mitsabo marary amin’ny fomba tsara kokoa. Hazavain’io toromarika io hoe: ‘Manana zo hifidy an’izay fitsaboana mety aminy ny olona ary anisan’ny zo fototra izany sady arovan’ny Lalàm-panorenana (Andininy faha-2, 13, ary 32), ny Fanambarana Iraisam-pirenena Momba ny Zon’olombelona, ny Fifanarahana Tany Oviedo, ary ny Sata Mifehy ny Zo Fototra Notapahin’ny Vondrona Eoropeanina.’”—Antonio Corcione, mpandrindra ao amin’ny sampan-draharaha famindrana taova ao amin’ny faritr’i Campania, talen’ny anestezista sy ny mpanara-maso akaiky ny marary mafy ao amin’ny Hopitaly Monaldi, filohan’ny Mpitsabo Italianina Mpanao Fanatoranana, Fanadontoana, Famelomana Aina, ary Fanaraha-maso Akaiky ny Marary Mafy (SIAARTI) teo aloha

“Nitsabo Vavolombelon’i Jehovah aho, dia izany no nahatonga ahy sy ny mpiara-miasa amiko rehetra hitady fomba tsara kokoa mba tsy ho very ra be ny marary mandritra ny fandidiana ary ho voakarakara tsara izy aorian’izay. Amin’izay mantsy dia tsy voatery hampidiran-dra foana ilay marary. Mandray soa amin’izany ny olona sasany tsy manaiky hampidiran-dra, ary na ny olona maro manaiky hampidiran-dra aza, dia tsy nila nampidiran-dra akory.”—Ugo Boggi, profesora mampianatra momba ny fandidiana ao amin’ny Oniversiten’i Pise (Italia), mpampianatra mpanampy momba ny fandidiana ao amin’ny Oniversiten’i Pittsburgh (Etazonia), voafidy ho filohan’ny Fikambanana Italianina Momba ny Famindrana Taova (SITO)

“Ny famindrana aty no sarotra indrindra amin’ny famindrana taova satria amin’izay no atahorana indrindra hoe ho very ra be ilay marary. Efa an’arivony anefa ny firaketana anananay momba ny famindrana aty ary an’aliny ny firaketana azo jerena maneran-tany, dia lasa hitanay avy amin’ireny ny teknika azo atao mba tsy ho very ra be ilay marary. Hainay hoe ahoana no atao dia tsy mila ampidiran-dra izy. Tsy mampiasa ra mihitsy izahay amin’ny ankamaroan’ny fandidiana aty, ary na amin’ny famindrana aty aza. Mahalana be mihitsy izahay vao mampiditra ra amin’ny marary didiana aty. Tsy hoatran’ny taloha intsony mantsy ny fomba fiasanay fa izay faritra mila didiana ihany no didianay, ary tandremanay kokoa ny fantsona kely tsirairay ao amin’ny aty. Te hisaotra ny Vavolombelon’i Jehovah aho satria izy ireo no nanampy anay hitady teknika miaro ny marary tsy ho very ra be. Tsy mba nieritreritra an’izany izahay tamin’ny 10 taona na 15 taona lasa.”—Umberto Cillo, profesora mampianatra momba ny fandidiana sady talen’ny fitsaboana aty sy afero sy ny famindrana aty ao amin’ny Oniversiten’i Padoue, filohan’ny Fikambanana Italianina Momba ny Famindrana Taova (SITO)

“Manaja ny marary Vavolombelon’i Jehovah aho noho izy ireo manana finoana matanjaka. Izany no anisan’ny nahatonga ahy hitady hevitra foana, hatramin’izay, mba hanomezana fahafaham-po azy ireo. Mendrika ny hohajaina mihitsy ny Vavolombelon’i Jehovah. Tsy hoe te ho faty na te ho maritiora akory izy ireo fa te ho voatsabo tsara.”—Francesco Corcione, profesora mampianatra momba ny fandidiana ao amin’ny Oniversiten’i Naples Federico II, filoha teo aloha tao amin’ny Fikambanana Italianina Mpandidy (SIC), mpikambana ao amin’ny Académie Nationale de Chirurgie any Paris, any Frantsa

“Rehefa nitsabo Vavolombelon’i Jehovah aho dia vao mainka resy lahatra hoe tokony hanaja lalina ny kolontsain’ny marary sy ny zavatra inoany ny dokotera sy ny mpitsabo mpanampy. Hitako hoe manamarina an’izany ilay lalàna navoaka vao haingana teto Italia. Milaza ny Lalàna 219 tamin’ny Desambra 2017 hoe ‘tsy tokony hatomboka na hotohizina ny fitsaboana ny marary iray raha tsy efa mazava tsara sy ekeny izay hatao aminy.’ Samy hahatsapa ho tompon’andraikitra na ilay dokotera mpandidy na ilay marary, raha hazavain’ilay dokotera tsara sy amin’ny fomba tsotra ilay fitsaboana hatao. Afaka mifidy tsara an’izay tiany hatao aminy koa ilay marary amin’izay, ary hahomby kokoa ilay fitsaboana.”—Luca Ansaloni, talen’ny fandidiana ankapobe sy fandidiana maika ao amin’ny Hopitaly Bufalini any Cesena, filohan’ny Fikambanana Italianina Mpandinika ny Sela Nesorina Tamin’ny Marary Nodidiana (SIFIPAC)

“Ny Vavolombelon’i Jehovah no nanampy be anay hitady teknika tsara kokoa mba hialana amin’ny fampidiran-dra. Efa misy fomba fandidiana vaovao azo ampiasaina izao raha misy marary tsy manaiky hampidiran-dra noho ny fivavahany. Kely kokoa ny vola lany sady mahomby kokoa ny fitsaboana rehefa tsy ampidiran-dra ilay marary.”—Diego Piazza, filohan’ny Fikambanan’ny Mpitsabo Italianina any Catane, talen’ny mpandidy olona voan’ny kansera, ao amin’ny Hopitaly Garibaldi-Nesima any Catane, filoha teo aloha tao amin’ny Fikambanan’ny Mpandidy any Amin’ny Hopitaly any Italia (ACOI)

“Misy mieritreritra hoe tsy mampaninona ny mampiditra ra. Betsaka mantsy ny ra azo ampiasaina, mora ilay izy, ary tsy sarotra ny mampanao azy. Tia mampiasa ra koa izy ireo satria mety ho tonga dia hiakatra be ny hemoglobinin’ilay marary. Izany no mahatonga ny dokotera maro hampiditra ra amin’ny marary. Mihabetsaka anefa ny porofo, isan-taona, hoe mety hisy vokany ratsy ny mampiditra liomena na ny taharo fototra hafa azo avy amin’ny ra. Raha ny marina, dia hita amin’ny fanadihadiana maro hoe betsaka kokoa ny olana hita amin’ny marary nampidiran-dra raha oharina amin’ireo tsy nampidiran-dra. Atahorana kokoa hoe ho faty ny marary nampidiran-dra, na harary ka hijanona ela kokoa ao amin’ny hopitaly satria tapaka lalan-dra, na marary voa, na misy ra mandry any amin’ny lalan-dra, na sempotra, na tratran’ny aretina hafa. Hitako hoe ny fitsaboana Vavolombelon’i Jehovah tato anatin’ny 50 taona no nahatonga ny dokotera hieritreritra kokoa hoe ahoana no atao mba tsy ho very ra be ny marary rehefa didiana, sy hoe ahoana no atao mba tsy hampidirana ra izy.”—Giandomenico Biancofiore, talen’ny anestezista sy mpamelona aina amin’ny fandidiana sarotra amin’ny famindrana taova, ao amin’ny Hopitaly Fiofanana ho Mpitsabo any Pise, mpampianatra mpanampy momba ny fanaovana anestezia sy famelomana aina, ao amin’ny Oniversiten’i Pise

Mety ho Tianao Koa

VAOVAO

https://cms-imgp.jw-cdn.org/img/p/702019160/univ/art/702019160_univ_sqr_xl.jpg

Vavolombelon’i Jehovah

Mahaliana ny Dokotera any Italia ny Fitsaboana Solon’ny Fampidiran-dra

Mety ho Tianao Koa

Naneho ny Heviny Momba ny Fitsaboana Tsy Misy Fampidiran-dra ny Dokotera Kanadianina Dimy

Nahoana ny Vavolombelon’i Jehovah no Tsy Manaiky Hampidiran-dra?

Fitsaboana Solon’ny Fampidiran-dra: Tsotra, Azo Antoka, Tsara

Mahaliana ny Dokotera any Italia ny Fitsaboana Solon’ny Fampidiran-dra

Mety ho Tianao Koa

Fidio ny Fiteninao

Hizara