UMWI tauni limwi ilinono mu Gujarat, ku India, ya isi yakwe ya John yawatiziwe ukuya ya Nte Yakwe Yeova ku kusila kwakwe ya 1950. Nomba ya John, yakalume yauze ali 5 na ya kaci yao alino na ya nyina yaali aakatolika akomeleke sana nupya icalenzile yakaanya na yaisi pali vino yazumilemo.

Wanda umwi, yaisi yakwe ya John yayatumile ukutwala envelopu kuli ya cuza yao amu cilongano. Nomba pa nsita iiya, ala ya John yatiyacisika sana ku kamunwe lino yayulanga intupiko ya pali Dulamu. Leelo nanti ciye vivyo, yalondanga sana ukuvwila yaisi, fwandi yatoozile akasalu iyanyepa pa cilonda pano pafumanga uwazi iyatwala na envelopu kuno yayatumile.

Lino ya John yafisile pano yayanga, yazanyile sile aci yako yano yayatumileko aali ya Nte Yakwe Yeova nayo kwene. Lino yaposile envelopu, yaweni ukuti ya John yakweti icilonda ku munwe nupya yalondesyanga ukuyaazwa. Yafumizye kambokosi muno ikanga ivya kuomvya muntu ndi waicisa, iyazifizya na ya John icilonda nu kuyanyepela kamunwe. Lyene yayapangiile tii, nupya lino yacitanga vii ala yakulazyanya nayo ivya muli Baibo.

Pa nsita ii, vino ya John yelenganyanga pali ya Nte vyatandike ukusenuka, fwandi yuzizye umwanaci wiiya pa vintu viili vino yaisi yazumilemo ivyapusine na vino yene yazumilemo. Yalondanga ukumanya ndi cakuti Yesu wali a Leza nu kumanya ndi cakuti tulinzile ukulapepa Maliya. Vino yamanyile ululimi luno ya John yavwanganga ulwa Cigujarati, yaomvizye Baibo pa ku yasuka nupya yayapeezile na ka buku kakuti, “This Good News of the Kingdom.”

Lino ya John yaile umu kuwelenga ka buku kaa, yaweni ukuti uu wali ali muku wakutandikilapo ukuuvwa icumi ca muli Baibo. Yaile kuli simapepo wa ku ceici ku mwao nu kumuzya mauzyo ali yamwi kwene yaili. Simapepo wasosile sana nu kutama ya John na Baibo alino azauka ati: “Watuya Satana lyene! Ndange pano Baibo ikalanda ukuti Yesu asi Leza. Ndange pano ikati tutalinzile ukupepa Maliya. Ndange!” Ya John cayapezizye sana mano pali vino simapepo wacisile icakuti yamunenyile ukuti, “Ntalatala ndyate ulwazo lwane mu Katolika nupya.” Nupya yatatazile yayeko!

Ya John yatandike ukusambilila na ya Nte, iyamanya ni cumi, nu kutandika ukuombela Yeova. Mukuya kwa nsita yalupwa yao na yauze kwene yacisile icili conga. Ndakai, ya John yacili yakwata ciyazi ku munwe wa kwi lunji uno yaicisile imyaka 60 iyapitapo. Ciyazi cii cikaiusya icikuku cino nkazi wiya wayalangizye icalenzile yamanye ukupepa kwa cumi.—2 Kolinto 6:4, 6.