Nin-sõma wã fãa rebda saasẽ bɩ?

YƲNG ning b sẽn na n yõk a Zezi wã, yẽ ne a tʋm-tʋmdbã sẽn wa n dɩ n sɛ, a pʋlem-b lame t’a na n kɩtame tɩ b wa tɩ vɩɩmd saasẽ. A yeel-b-la woto: “Rot wʋsg bee m Ba yiri. Yaa woto n kɩt tɩ mam yeel yãmb tɩ m dabdame n na n tɩ maneg zĩig yãmb yĩngã.” (Zã 14:2) Bõe yĩng t’a Zezi na n tɩ segl zĩig saasẽ n bĩng-ba? Bõe la b na n tɩ maan be?

Tʋʋmd takɩ la a Zezi ra rat t’a karen-biisã wa tɩ tʋm saasẽ. Yʋn-kãngã, a yeel-b-la woto me: “Yãmb yaa neb sẽn pa ne maam m makrã pʋgẽ n ka bas ye. Yaa woto yĩng la mam kõt yãmb soolem wa m Ba sẽn kõ maam soolmã.” (Luk 22:28, 29) Wẽnnaam da yeela a Zezi t’a na n yɩɩ rĩma, tɩ kɩt tɩ ninsaalbã tõog n yaa n paam goosneem-sõng ning sẽn na n fãag-bã. A Zezi na n fãaga nebã ne namsgã, la a sãam neb nins sẽn kɩt tɩ b namsdẽ wã. Baa a Zezi sẽn na n dɩ naam neb nins zutã sẽn na n pid dũniyã, a naamã geer na n zĩnda saasẽ.—Yɩɩl Sõamyã 72:4, 8; Daniɛll 7:13, 14.

La a Zezi pa na n dɩ naamã a ye ye. Yaa rẽ la a sẽn yeel a tʋm-tʋmdbã t’a na n tɩ segla zĩig saasẽ b yĩngã. Yaa bãmb la b sẽn yãk-b rãmb pipi tɩ na n wa tɩ naag-a n ‘dɩ naam dũniyã zugã.’—Wilgri 5:10.

Neb a wãn n debd saasẽ? Tẽng fãa pʋgẽ, b sẽn yãk-b rãmb tɩ b be goosneema wã pʋgẽ wã sõor pa kolg nin-buiidã b sẽn so wã sõor ye. Yaa woto me ne Wẽnnaam Rĩungã. A Zezi goma neb nins sẽn na n wa tɩ naag-a n dɩ naamã yelle, n yeel woto: “Da zoe-y rabeem ye, wubr pa zem bũmbu, tɩ nooma y Ba tɩ b kõ yãmb b Rĩungu.” (Luk 12:32, Sebr Sõngo) Neb nins a Zezi sẽn boond tɩ “wubr pa zem bũmb” bɩ “bãg-bilã” sõor yaa 144 000. (Wilgri 14:1) D sã n mak b sõorã ne neb milyõ rãmbã sẽn na n vɩɩmd wakat sẽn kõ sa tẽngã zug a Zezi naamã sasa wã, d mikdame tɩ b paoodame.—Wilgri 21:4.

Dẽnd pa nin-sõma wã fãa n debd saasẽ ye. Tʋm-tʋmd a Pɩɛɛr ra goma rĩm sõng a Davɩɩd yelle, n yeel nebã vẽeneg t’a ‘Davɩɩd ka rʋ saasẽ ye.’ (Tʋʋma 2:34) A Zãmbatiis yɩɩ nin-sõngo. La a Zezi yeelame t’a pa na n paam n naag sẽn na n kẽng-b saasẽ n tɩ rɩ naamã ye. A Zezi yeela woto: “Mam yeta yãmb sɩda, tɩ pagbã sẽn dog-b rãmbã fãa sʋka, ned ka be sẽn yɩɩd a Zã ye. La sẽn yaa a yao-zʋʋg Wẽnnaam soolem pʋgẽ wã yɩɩda yẽnda.”—Matɩe 11:11.

Wãn-to la y tõe n paam keoor ning nin-sõma wã sẽn na n paamã?

Ned sã n dat n wa paam n vɩɩmd wakat sẽn kõn sa tẽngã zugu, bõe la a soab segd n maane? A Zezi ra yeela woto: “Wẽnnaam nonga dũniyã hal tɩ b kõ b Biigã sẽn ka to, tɩ ned ninga fãa sẽn tẽed bãmb kõn sãam ye, la a na paam vɩɩm sẽn ka sɛta.” (Zã 3:16) Wẽnnaam sẽn nong dũniyã yĩnga, a kõo a Biigã sẽn na yɩl tɩ nebã tõe n paam vɩɩm sẽn pa sɛtã. La yaa sẽn na n wilg-b tɩ b tara tẽebã bal n na n paam-a.

Sẽn na yɩl n tall tẽebo, rẽndame tɩ d reng n paam bãngre. (Zã 17:3) Y sã n dat n wilg tɩ y yaa nin-sõngo, y segd n zãmsa Biiblã n paam n bãng a Zeova sẽn na n maan bũmb nins n kõ ãdem-biisã n paase. Rẽ poore, y segd n wilgame tɩ y tẽeda bũmb nins y sẽn bãngã. Y sã n maan woto fãa, bɩ y kɩs sɩd tɩ y na n wa tõog n paama vɩɩm sẽn kõn sa wã.

 [Zĩ-gũbri, seb-​neng a 7]

Bõe la Biiblã yeta?

Sokre:

Nin-sõng sã n ki, a ket n mii bũmb bɩ?

Leoorã:

“Kũum ka mi bũmb ye.”—KOƐƐG SOABA 9:5.

Sokre:

Nin-sõng sã n ki, a bee yɛ, la a na n le wa vɩɩmdame bɩ?

Leoorã:

“Wakat watame tɩ fãa sẽn be yaad pʋsẽ na n wʋm [a Zezi] koɛɛg n yi.”—ZÃ 5:28.

Sokre:

Nin-sõma wã wʋsg na n wa vɩɩmda yɛ?

Leoorã:

“Nin-tɩrs na n sooga dũniyã la bãmb na n zĩnda a zug wakat sẽn ka sɛta.”—YƖƖL SÕAMYÃ 37:29.