Saasẽ wã yaa wãn-wãna?

NEB kẽer tagsdame tɩ d pa tõe n bãng saasẽ sẽn yaa to-to, bala ned zɩ n yi be n wa wilg-d ye. La tõe tɩ b yĩmame t’a Zezi ra yeelame tɩ yẽ yii saasẽ. (Zã 6:38) Daar a yembr me, a yeela a wakatẽ tũudum taoor dãmb woto: “Yãmb yii tẽnga, la mam yii yĩngri.” (Zã 8:23) La a Zezi yeelame tɩ bõe n be saasẽ?

A Zezi yeelame t’a Zeova sɩd vɩɩ saasẽ. A bool-a lame t’a ‘Ba sẽn be saasẽ.’ (Matɩe 12:50) A goam wʋsg n wilgd tɩ gom-bil ning sẽn yaa saasẽ wã võor yaa wʋsgo. Wala makre, a boola yĩngrã tõnd sẽn ne wã bɩ liuuli wã sẽn yɩgdẽ wã tɩ saasẽ. A yeela woto: “Ges-y liuuli sẽn yɩgd yĩngri.” (Matɩe 6:26, Sebr Sõngo) La pa liuuli wã sẽn yɩgdẽ wã la a Zeova be ye. Biiblã yeta woto: “Bãmb bee dũni-gilgã zugẽ.”—Ezai 40:22.

La rẽ yĩnga yaa ãdsã sẽn beẽ wã la a Zeova vɩ bɩ? Wẽnnaam Gomdã pʋgẽ, b boonda ãdsã sẽn beẽ wã me tɩ “saasẽ.” Wala makre, yɩɩl gʋlsd a ye yeela woto: “Mam sẽn get saasẽ sẽn yaa yãmb nus tʋʋmdã ne kiuugã la ãdsã yãmb sẽn ning b zĩigẽ wã, ninsaal yaa bõe tɩ yãmb tẽr a yelle?”—Yɩɩl Sõamyã 8:4, 5.

Wa ned sẽn me noos roog sẽn pa baood n na n kẽ be n vɩɩmdã, a Zeova me pa baood n na n vɩɩmd saasã a sẽn naanã pʋgẽ ye. Sɩd me, Zerizalɛm wẽn-doogã pakr daare, rĩm a Salomo pʋʋsa a Zeova n yeel woto: “Wẽnnaam sɩd tõe n zĩnda dũniyã zugu? Gese, saas ne yĩngr sẽn ka sek yãmbã, ro-kãngã mam sẽn me n na n kõ yãmbã ka tõe n sek yãmb ye.” (1 Rĩm dãmba 8:27) La sã n pa ãdsã sẽn beẽ wã la a Zeova be, yɛ la a sẽn be tɩ b boond tɩ saasẽ wã?

Baa ninsaalbã sẽn maan masĩn dãmb n tõe n pa tẽng n vaees sa-gãnã, tɩ masĩn kẽer meng tõe n tall-b n kẽng yĩngrã, Biiblã sẽn yeel bũmb ningã ket n yaa sɩda. A yeelame tɩ “ned nan ka yã Wẽnnaam abada ye.” (Zã 1:18) A Zezi yeela bũmb sẽn wilgd rẽ võore. A yeelame tɩ “Wẽnnaam yaa sɩɩga.”—Zã 4:24.

B sẽn boond-b rãmb tɩ sɩɩsã tõog yɩɩda ninsaalbã rẽnd zĩig sẽn zãre. B yĩnsã pa wõnd ninsaalbã la rũmsã rẽnd sẽn tar nemse, kõab la zɩɩm tɩ d tõe n yã la d sɩɩsã ye. Woto wilgdame t’a Zezi sẽn yeel t’a ra bee ne a Ba saasẽ wã, yẽ me ra tara yĩn-kãng buudã, tɩ kɩt t’a ra tar ziir n yɩɩd ninsaalbã. (Zã 17:5; Filip rãmba 3:20, 21) Biiblã boonda zĩig ning a Zezi sẽn deng n zĩnd ne a Ba wã la ne sɩɩs a taab bɩ malɛgsã tɩ saasẽ. La zĩ-kãng yaa wãn-wãna? Bõe la b maand be?

Sẽn be-b be wã tʋmda ne sũ-noogo

Biiblã wilgdame tɩ tʋʋm wʋsg la b tʋmd Wẽnnaam sẽn beẽ wã. A wilgame tɩ malɛgsã sẽn be be wã sõor yaa milyõ rãmba. (Daniɛll  7:9, 10) B fãa yaa toor-toore. Bõe n kɩt tɩ d yet woto? D sã n ges Wẽnnaam sẽn naan bũmb nins tɩ be dũni ka wã, d mikdame tɩ bũmb fãa yaa toor ne a to. Rẽ kɩtame tɩ d tõe n yeel tɩ malɛgsã me yaa toor-toore. La bũmb sẽn be yamleoog yaa tɩ malɛgsã tʋmda ne taab zems-n-taar pʋgẽ, tɩ woto yaa toor fasɩ ne ninsaalbã sẽn pa wae n zemsd taabã.

Kelg-y Biiblã sẽn bilgd bũmb nins malɛgsã sẽn maandã. A yeta woto: “Bãmb malɛk rãmbã, pãn-kãsems rãmb sẽn sakd bãmb noor la b kelgd bãmb goamã, bɩ y kõ Zusoabã waoogre. Yãmb fãa sẽn yaa bãmb saasẽ pãens rãmba, la bãmb tʋm-tʋmdb sẽn maand bãmb daabo, bɩ y kõ Zusoabã waoogre.” (Yɩɩl Sõamyã 103:20, 21) Woto wilgdame tɩ tʋʋm wʋsg la b sɩd tʋmd saasẽ. La d tõe n kɩsa sɩd tɩ yaa tʋʋm sẽn noom-ba.

Malɛgsã sɩng n tʋmda b tʋʋmã hal sẽn kaoose, nand tɩ Wẽnnaam naan tẽngã menga. Biiblã yeelame t’a Zeova sẽn wa n na n naan tẽngã, malɛgsã b sẽn boond t’a kom-dibli wã ‘lagma taab n yɩɩle,’ la b “kaas ne sũ-noogo.” (Zoob 38:4, 7) Wẽnnaam bi-ribl ning a sẽn deng n naan pipi wã meng naag-a lame n naan bũmb a taabã fãa. (Kolos rãmba 1:15-17) Saasẽ tʋʋmã sẽn be yamleoog wʋsg woto wã, tõe tɩ y rat n bãng ãdem-biisã sã n pa tõe n kẽng be.

Ninsaal segd n tɩ vɩɩmda saasẽ bɩ?

Sẽn mik tɩ nand meng tɩ b naan tẽngã, malɛgsã ra zoe n bee saasẽ n maand Wẽnnaam daabã, yaa vẽeneg tɩ pa saasã sẽn da yaa vɩʋʋgo, tɩ Wẽnnaam dat tɩ neb vɩɩmd be yĩng la a sẽn naan d yaab a Ãdem ne a Hawa wã ye. B naanegã poore, Wẽnnaam pʋd n yeel-b lame tɩ b “rog kamb n pid dũniyã.” (Sɩngre 1:28; Tʋʋma 17:26) Nand tɩ Wẽnnaam naan a Ãdmã, bũmb da kae tẽngã zug n tar yam n tõe n bao n bãng Wẽnnaam la a maan a raabã ye. Yaa a Ãdem ne a Hawa n da segd n dog kamba, tɩ b fãa soog tẽngã n vɩɩmd a zugu, la b tũ Wẽnnaam. Biiblã yeta woto vẽenega: “Saasẽ yaa [a Zeova] n so, la b kõo ninsaalbã dũniyã.”—Yɩɩl Sõamyã 115:16.

Wẽnnaam pa naan ninsaal n dat t’a wa ki ye. Yaa rẽ yĩng la d sẽn pa rat n ki wã. Wẽnnaam yeela a Ãdem tɩ yaa b sã n kɩɩs yẽ bal la b na n ki. Dẽnd b sã n da pa kɩɩse, b ra pa na n tol n ki ye.—Sɩngre 2:17; Rom dãmba 5:12.

Woto kɩtame tɩ d wʋmd Wẽnnaam sẽn pa tol n gom saasẽ kẽnd yell ne a Ãdmã võore. Wẽnnaam pa naan tẽngã sẽn na yɩl tɩ ninsaal deng n zĩnd be wakat a wãna, tɩ sã n mik t’a yaa nin-sõng bɩ a kẽng saasẽ ye. Wẽnnaam naana ninsaal t’a vɩɩmd tẽngã zug wakat sẽn pa sate, la ka la bilfu, raab-kãng na n sɩd pidsame. Biiblã yeta woto: “Nin-tɩrs na n sooga dũniyã, la bãmb na n zĩnda a zug wakat sẽn ka sɛta.” (Yɩɩl Sõamyã 37:29) Dẽnd yaa vẽeneg tɩ Wẽnnaam sẽn wa n naand ninsaalã, pa sẽn na yɩl t’a tɩ vɩɩmd saasẽ ye. La bõe yĩng t’a Zezi yeel a tʋm-tʋmdbã tɩ b na n wa tɩ vɩɩmda saasẽ? Woto rat n yeelame tɩ nin-sõma wã fãa na n kẽnga saasẽ bɩ?