GĦALL-KOPPJI
1: Kunu determinati li tibqgħu fiż-żwieġ
DAN XI JFISSER
L-irġiel u n-nisa li jkunu determinati li jibqgħu fiż-żwieġ iqisu ż-żwieġ bħala rabta dejjiema, u dan jagħtihom sens taʼ sigurtà. Kull wieħed minnhom se jkun fiduċjuż li l-parti l-oħra se tibqaʼ fiż-żwieġ anki fi żminijiet diffiċli.
Xi koppji jħossuhom obbligati li jibqgħu flimkien minħabba l-pressjoni li jkollhom mill-familja jew minn taʼ madwarhom. Imma jkun ħafna aħjar li jkunu jridu jibqgħu flimkien għax iħobbu u jirrispettaw lil xulxin.
PRINĊIPJU BIBLIKU: “Raġel m’għandux jitlaq lil martu.”—1 Korintin 7:11.
“Jekk tkun determinat li tibqaʼ fiż-żwieġ, m’intix se tieħu għalik malajr. Minflok, se tkun ħafif biex taħfer u biex tiskuża ruħek. Int se tqis il-problemi bħala ostakli li tistaʼ tegħlibhom u mhux bħala xi ħaġa li twassal għall-firda.”—Micah.
GĦALA HU IMPORTANTI
Min ma jkunx determinat li jibqaʼ fiż-żwieġ, meta jiffaċċja l-problemi għandu iktar ċans li jikkonkludi, ‘Ma konniex maħluqin għal xulxin,’ u jara x’jagħmel biex jinħall miż-żwieġ.
“Ħafna nies jiżżewġu bil-ħsieb li jekk iż-żwieġ ma jirnexxix jaqbdu u jiddivorzjaw. Meta jidħlu fiż-żwieġ b’dan il-ħsieb diġà f’moħħhom, allura mill-bidu nett ma jkunx hemm bażi soda.”—Jean.
DAK LI TISTAʼ TAGĦMEL
EŻAMINA LILEK INNIFSEK
Meta tkunu qed targumentaw . . .
-
Jgħaddilek minn moħħok li qed jiddispjaċik li żżewwiġt lil din il-persuna?
-
Timmaġina lilek innifsek maʼ xi ħadd ieħor?
-
Tgħid affarijiet bħal “Se nitilqek” jew “Se nsib lil xi ħadd ieħor li japprezzani”?
Jekk weġibt iva għal waħda jew iktar minn dawn il-mistoqsijiet, allura issa hu ż-żmien li ssaħħaħ id-determinazzjoni tiegħek li tibqaʼ fiż-żwieġ.
IDDISKUTU DAN BĦALA KOPPJA
-
Għadna determinati li nibqgħu fiż-żwieġ bħal qabel? Jekk le, għala?
-
Liema passi nistgħu nieħdu issa biex insaħħu d-determinazzjoni tagħna?
SUĠĠERIMENTI
-
Minn żmien għal żmien, ikteb xi ħaġa romantika lir-raġel jew il-mara tiegħek
-
Uri li int determinat li tibqaʼ fiż-żwieġ billi fuq id-desk tax-xogħol tiegħek tpoġġi ritratti taʼ żewġek jew martek
-
Ċempel lill-persuna l-oħra fiż-żwieġ kuljum waqt li tkun ix-xogħol jew meta tkunu ’l bogħod minn xulxin
PRINĊIPJU BIBLIKU: “Dak li Alla għaqqad flimkien ħa ma jifirdu ebda bniedem.”—Mattew 19:6.