IMITA L-FIDI TAGĦHOM | ĠUŻEPPI
“Kif nista’ jien nagħmel dan il-ħażen hekk kbir?”
ĠUŻEPPI bata biex ħa n-nifs f’dik l-arja sħuna hekk kif innota r-riħa taż-żahar tal-ġilju u pjanti oħra tal-ilma. Kien qed jittieħed minn negozjanti f’karavana, li issa kienu qed jaqsmu l-art baxxa tal-bokka tax-Xmara Nil. Immaġina rġiel mexjin f’linja u jmexxu lill-iġmla tagħhom tul xmara lejn jerġaʼ raħal Eġizzjan ieħor, kultant jaħsdu xi russett jew xi agrett miexi fl-ilma, li jitgerrex ’l hemm. Għal darb’oħra Ġużeppi ħaseb f’daru fl-artijiet għoljin taʼ Ħebron esposti għar-riħ, mijiet taʼ kilometri ’l bogħod; iżda issa kien qiegħed f’dinja differenti.
Immaġina x-xadini jiċċaċċraw u jwerżqu mill-qċaċet tas-siġar tat-tamal u tat-tin. Dan l-iċċaċċrar tax-xadini kien bla tifsir għal Ġużeppi, l-istess bħalma kien bla tifsir id-diskors tan-nies li għadda minn ħdejhom Ġużeppi. Għandu mnejn ipprova jaqbad xi kelma jew frażi ’l hemm u ’l hawn. Forsi kien jaqbillu jitgħallimha l-lingwa. Sa fejn setaʼ jara hu, qatt ma kien se jerġaʼ jara art twelidu.
Ġużeppi kien ġuvni taʼ xi 17 jew 18-il sena, madankollu diġà kien ħabbat wiċċu maʼ sfidi li jaqtgħu qalb irġiel ikbar. Ħutu stess, mikulin bl-għira minħabba li Ġużeppi kien il-favorit taʼ missierhom, kienu għoddhom qatluh. Minflok, kienu bigħuh lil dawn in-negozjanti. (Ġenesi 37:2, 5, 18-28) Issa, wara li vvjaġġaw għal ġimgħat sħaħ, in-negozjanti aktarx li kienu qed isiru inqas ansjużi hekk kif qorbu lejn il-belt kbira fejn kienu biħsiebhom idawru lira mill-bejgħ taʼ Ġużeppi kif ukoll mill-merkanzija prezzjuża tagħhom. Ġużeppi kif żamm milli jiddispra u jaqtaʼ qalbu għalkollox? U kif nistgħu nżommu l-isfidi u d-diżappunti milli jeqirdulna l-fidi llum? Għandna ħafna x’nitgħallmu minn Ġużeppi.
“ĠEĦOVA KIEN MAʼ ĠUŻEPPI”
“Lil Ġużeppi niżżluh lejn l-Eġittu, u Eġizzjan jismu Potifar, uffiċjal tal-palazz tal-Fargħun, il-kap tal-gwardja persunali tiegħu, xtrah minn idejn l-Ismagħelin li kienu niżżluh hemmhekk.” (Ġenesi 39:1) B’dak il-ftit kliem, ir-rakkont Bibliku jgħinna nimmaġinaw l-umiljazzjoni taʼ raġel żagħżugħ hekk kif inbiegħ għal darb’oħra. Hu kien sempliċement proprjetà! Nistgħu nimmaġinaw lil Ġużeppi għaddej minn toroq iffollati tal-belt miżgħudin bis-swieq wara s-sid il-ġdid tiegħu, uffiċjal tal-palazz Eġizzjan, huma u sejrin lejn id-dar il-ġdida taʼ Ġużeppi.
Id-dar! Din xejn ma kellha x’taqsam maʼ dik li Ġużeppi kien isejħilha dar. Hu kien trabba f’familja nomada li kienu jgħixu fit-tined u li spiss iċċaqalqu minn post għal ieħor u ħadu ħsieb l-imrieħel tan-nagħaġ tagħhom. Hawn, Eġizzjani għonja bħal Potifar kienu jgħixu fi djar eleganti, miżbugħin b’kuluri jgħajtu. L-arkeoloġi jgħidu li l-Eġizzjani tal-qedem kienu dilettanti taʼ ġonna mħaddrin u mdawrin b’ħitan. Kien fihom siġar biex jagħmlu d-dell u għadajjar biex ikabbru l-papiru, il-ġilji, u pjanti oħra tal-ilma. Xi djar kienu maqtugħin għalihom ġol-ġonna, b’verandi biex titgawda ż-żiffa, twieqi għoljin għall-ventilazzjoni, u ħafna kmamar, inkluż kamra tal-ikel kbira u kmamar għall-qaddejja.
Ġenesi 39:2) Bla dubju Ġużeppi ferraʼ qalbu maʼ Alla tiegħu. Il-Bibbja tgħid li “Ġeħova hu qrib dawk kollha li jsejħulu.” (Salm 145:18) Ġużeppi b’liema mod ieħor resaq qrib Alla tiegħu?
Kien Ġużeppi impressjonat iżżejjed b’lussu bħal dan? Aktarx li dan ma kienx il-każ. Pjuttost ħass kemm kien verament waħdu. L-Eġizzjani kienu barranin għalih kemm fil-lingwa, fl-ilbies, fil-maxta tax-xagħar—u iżjed u iżjed fir-reliġjon. Kienu jqimu varjetà li tħawdek taʼ allat, ipprattikaw l-okkult u l-arti maġika, u kienu tant jaffaxxinaw ruħhom bil-mewt u l-ħajja wara l-mewt. Però ħaġa waħda żammet lil Ġużeppi milli jinfena bis-solitudni. Ir-rakkont Bibliku jgħidilna: “Ġeħova kien maʼ Ġużeppi.” (Ir-raġel żagħżugħ irrifjuta li jċedi għad-disprament, u għamel l-aħjar li setaʼ fix-xogħol li ngħata. B’hekk, Ġeħova kellu ħafna xi jbierek, u fi ftit żmien Ġużeppi kiseb l-approvazzjoni tas-sid il-ġdid tiegħu. Potifar ra li l-qaddej żagħżugħ tiegħu kien qed jitbierek minn Ġeħova, l-Alla tal-poplu taʼ Ġużeppi, u barkiet bħal dawn bla dubju ġabu prosperità lid-dar tal-Eġizzjan. Bil-mod il-mod Potifar beda jistmah iżjed u iżjed lil Ġużeppi sakemm fada kollox f’idejn dan ir-raġel żagħżugħ kapaċi.—Ġenesi 39:3-6.
Ġużeppi ħalla eżempju vitali għaż-żgħażagħ li jaqdu lil Alla llum. Pereżempju, meta jkunu l-iskola, kultant jistgħu jsibu ruħhom f’ambjent li jħossuh stramb u barrani, dinja ossessjonata bl-okkult u ffokata fuq ħarsa negattiva u bla tama lejn il-ħajja. Jekk int qiegħed f’dik is-sitwazzjoni, ftakar li Ġeħova ma nbidilx. (Ġakbu 1:17) Hu għadu jagħti prova li jkun maʼ dawk kollha li jibqgħu leali lejh u li jfittxu li jaħdmu iebes biex b’hekk jogħġbu lilu. Hu jberikhom bil-kbir, u se jagħmel l-istess lilek.
Sadanittant, jgħidilna r-rakkont, Ġużeppi kien qed jimmatura. Mhux talli sar raġel, imma talli dan iż-żagħżugħ kien “sar sabiħ fis-sura u sabiħ fid-dehra.” Dan il-kliem jagħti x’tifhem li l-periklu kien fil-qrib, għax l-għotja tas-sbuħija fiżika spiss iġġib attenzjoni mhux mixtieqa u mhux xierqa.
MA LAQAX L-AVVANZI TAGĦHA
Ġużeppi kien japprezzaha l-lealtà; madankollu mart Potifar ma kinitx. Naqraw: “Mart sidu xeħtet għajnejha fuq Ġużeppi u kienet tgħidlu: ‘Imtedd miegħi.’” (Ġenesi 39:7) Kien Ġużeppi ttantat li jċedi għall-avvanzi kuraġġużi taʼ din il-mara pagana? Il-Bibbja ma tagħtina ebda raġuni biex nassumu li Ġużeppi ma kienx suġġett għax-xewqat u l-ġibdiet komuni għal irġiel żgħażagħ, jew li din il-mara, mara mfissda taʼ uffiċjal tal-palazz għani u influwenti, ma kinitx taʼ min jixtieqha fiżikament. Kien Ġużeppi se jirraġuna li sidu qatt ma kien se jkun jaf? Kien se jiġi ttantat bil-ħsieb tal-vantaġġi materjali li relazzjoni immorali bħal din setgħet toffri?
Fir-realtà, ma nistgħux inkunu nafu kull ma għadda minn moħħ Ġużeppi. Imma għandna indikazzjoni ċara taʼ dak li kien f’qalbu. Dan jidher sew fit-tweġiba tiegħu: “Ara! Sidi ma jrid jaf b’xejn mingħandi dwar x’hawn fid-dar, u kulma għandu rħieh f’idejja. M’hemmx min hu akbar minni f’din id-dar, u ma ċaħħadni assolutament minn xejn ħlief minnek, għax int martu. Allura, kif nistaʼ jien nagħmel dan il-ħażen hekk kbir u nidneb kontra Alla?” (Ġenesi 39:8, 9) Immaġina lil dan ir-raġel żagħżugħ jgħid dan il-kliem bl-ikbar sinċerità. Il-ħsieb dwar id-dnub li riditu jwettaq saħansitra weġġgħu. Għala?
Bħalma qal Ġużeppi, sidu fdah. Potifar kien ħalla daru kollha f’idejn Ġużeppi, u ma żamm xejn lura minnu minbarra lil martu. Kif setaʼ Ġużeppi jittradixxi dik il-fiduċja? Hu stmerr dan il-ħsieb. Imma kellu stmerrija jerġaʼ ikbar: il-ħsieb li attwalment jidneb kontra Alla tiegħu, Ġeħova. Ġużeppi kien tgħallem ħafna mill-ġenituri dwar il-ħarsa t’Alla lejn iż-żwieġ u l-lealtà. Ġeħova għaqqad l-ewwel żwieġ u qal eżatt x’ried. Ir-raġel u l-mara kellhom jingħaqdu flimkien u jsiru “ġisem wieħed.” (Ġenesi 2:24) Dawk li pprovaw jheddu din l-għaqda ssograw iġibu fuqhom id-diżapprovazzjoni t’Alla. Pereżempju, l-irġiel li kienu għoddhom każbru lil mart Abraham, li kienet il-bużnanna taʼ Ġużeppi, u lil mart Iżakk, in-nanna taʼ Ġużeppi, kienu fil-periklu li jidħlu fl-inkwiet. (Ġenesi 20:1-3; 26:7-11) Ġużeppi kien tgħallimha sew dik il-lezzjoni, u kien determinat li jgħix fi qbil magħha.
Lil mart Potifar m’għoġobha xejn dak li semgħet. Dan is-sempliċi skjav ma laqax l-avvanzi tagħha, u attwalment irrefera għall-offerta tagħha bħala “ħażen hekk kbir”! Minkejja dan, ippersistiet. Forsi l-vanità u l-kburija tagħha ġew effettwati, u dan taha d-determinazzjoni biex tbiddel il-le taʼ Ġużeppi f’iva. B’hekk ħasbitha bħal Satana, li ttanta lil Ġesù. L-attentat taʼ Satana falla wkoll, u minflok ma qataʼ qalbu, Satana sempliċement stenna għal “ħin konvenjenti ieħor.” (Luqa 4:13) Għalhekk nies leali jeħtieġ li jkunu determinati u sodi. U Ġużeppi hekk għamel. Għalkemm din is-sitwazzjoni kompliet “jum wara l-ieħor,” hu ma kienx se jibdel fehmtu. Naqraw: “Qatt ma semaʼ minnha.” (Ġenesi 39:10) Mart Potifar, madankollu kienet seduttriċi determinata.
Hi għażlet ħin meta l-qaddejja kollha kienu barra mid-dar. Kienet taf li Ġużeppi kien se jkollu jidħol ġewwa biex jaħdem. Meta daħal, ipprovat tonsbu. Qabditu minn ħwejġu u talbitu għall-aħħar darba: “Imtedd miegħi!” Ġużeppi rreaġixxa mill-ewwel. Ħarab mill-qabda soda tagħha u nġibed lura—imma hi baqgħet iżżomm l-ilbies tiegħu. Hu żgiċċalha u ħalla ħwejġu f’idejha. U mbagħad ħarab!—Ġenesi 39:11, 12.
Għandu mnejn niftakru fil-parir ispirat tal-appostlu Pawlu: “Aħarbu miż-żína.” (1 Korintin 6:18) X’eżempju ħalla Ġużeppi għall-Kristjani veri kollha! Jistaʼ jkun li nsibu ruħna naħdmu fil-qrib maʼ wħud li m’għandhom l-ebda rispett għal-liġijiet morali t’Alla, imma dan ma jfissirx li għandna nċedu għal influwenzi ħżiena. Akkost taʼ kollox, għandna naħarbu.
Fil-każ taʼ Ġużeppi, swielu qares. Mart Potifar riedet tpattihielu. Infexxet twerżaq u sejħet lill-qaddejja l-oħra biex jidħlu d-dar. Qalet li Ġużeppi kien ipprova jistupraha u li kien ħarab meta werżqet. Hi baqgħet iżżomm l-ilbies tiegħu li kienet se tuża bħala prova kontrih u stenniet lil żewġha jirritorna. Meta Potifar wasal id-dar, hi qaltlu l-istess gidba u sostniet li kien kollu t-tort taʼ żewġha talli ġab lil dan il-barrani f’darhom. Kif irreaġixxa Potifar? Naqraw: “Ir-rabja tiegħu xegħlet”! Qabad u tefgħu l-ħabs.—Ġenesi 39:13-20.
“BL-IRBIT WEĠĠGĦULU SAQAJH”
Ftit nafu dwar kif kienu l-ħabsijiet Eġizzjani taʼ dak iż-żmien. L-arkeoloġi sabu fdalijiet taʼ postijiet bħal dawn—strutturi kbar qishom fortizzi, b’ċelel fuq u taħt l-art. Ġużeppi iktar tard iddeskriva l-post bħala “l-ħofra,” li ġġiblek f’moħħok post mudlam u bla tama. (Ġenesi 40:15) Mill-ktieb tas-Salmi nitgħallmu li Ġużeppi għadda minn iżjed torturi: ‘Bl-irbit weġġgħulu saqajh, kien marbut bil-ħadid.’ (Salm 105:17, 18) Kultant l-Eġizzjani rabtu dirgħajn il-priġunieri wara daharhom minn minkbejhom; oħrajn kellhom kullari tal-ħadid maʼ għonqhom. Min jaf kemm sofra u ġie maltrattat Ġużeppi—meta ma kien għamel xejn li jistħoqqlu dan kollu!
Iktar minn hekk, dan ma ġarax għal perijodu qasir. Ir-rakkont jgħid li Ġużeppi “baqaʼ hemmhekk fil-ħabs.” Qattaʼ s-snin f’dak il-post mistmerr! * U Ġużeppi ma kienx jaf jekk qattx kien se jiġi liberat. Hekk kif dawk l-ewwel ftit jiem terribbli saru ġimgħat, imbagħad xhur, kif żamm milli jaqtaʼ qalbu u jiddispra?
Ir-rakkont jagħtina din it-tweġiba rassiguranti: “Ġeħova baqaʼ jkun maʼ Ġużeppi u baqaʼ jurih il-qalb tajba bl-imħabba.” (Ġenesi 39:21) L-ebda ħajt taʼ ħabs, l-ebda rbit, l-ebda ċella mudlama taħt l-art ma tistaʼ żżomm il-qalb tajba bl-imħabba taʼ Ġeħova milli tilħaq lill-qaddejja tiegħu. (Rumani 8:38, 39) Nistgħu nimmaġinawh lil Ġużeppi, iferraʼ l-agunija taʼ qalbu fit-talb lill-għażiż Missieru tas-sema u mbagħad jikseb dik il-paċi u l-kalma li jistaʼ jagħti “l-Alla taʼ kull faraġ.” (2 Korintin 1:3, 4; Filippin 4:6, 7) Ġeħova x’għamel iżjed għal Ġużeppi? Naqraw li Ġużeppi baqaʼ “jsib il-ħniena f’għajnejn l-uffiċjal ewlieni tal-ħabs.”
Milli jidher, il-priġunieri kienu jingħataw ix-xogħol x’jagħmlu, u għal darb’oħra Ġużeppi ta lil Ġeħova xi ħaġa xi jbierek. Ġużeppi ħadem iebes u rsista fix-xogħol kollu li ngħatalu, u ħalla l-bqija f’idejn Ġeħova. Bil-barka taʼ Ġeħova, Ġużeppi kiseb il-fiduċja u r-rispett, eżatt bħalma kiseb f’dar Potifar. Naqraw: “Għalhekk, l-uffiċjal ewlieni tal-ħabs ħalla f’idejn Ġużeppi l-priġunieri kollha li kienu l-ħabs; u kulma kienu qed jagħmlu hemmhekk, hu kien li ordnalhom biex jagħmluh. L-uffiċjal ewlieni tal-ħabs ma kien qed jieħu ħsieb assolutament xejn li kien fdat f’idejh [Ġużeppi], għax Ġeħova kien maʼ Ġużeppi, u f’dak li kien jagħmel, Ġeħova kien qed jgħinu jirnexxi.” (Ġenesi 39:22, 23) Kemm tfarraġ Ġużeppi li kien jaf li Ġeħova kien qed jieħu ħsiebu!
Jistgħu jinqalgħu l-għawġ u l-problemi fil-ħajja tagħna, saħansitra xi inġustizzji kefrin, imma nistgħu nitgħallmu ħafna mill-fidi taʼ Ġużeppi. Jekk nibqgħu qrib Ġeħova fit-talb, nibqgħu leali lejn il-kmandi tiegħu, u naħdmu iebes f’dak li hu tajjeb f’għajnejh, aħna nagħtuh xi ħaġa xi jbierek. Fil-każ taʼ Ġużeppi, Ġeħova kellu jerġaʼ barkiet ikbar preparati għalih, bħalma se naraw f’artikli fil-futur taʼ din is-serje.
^ par. 23 Il-Bibbja tindika li Ġużeppi kellu madwar 17 jew 18-il sena meta daħal f’dar Potifar u li dam hemm sakemm sar raġel żagħżugħ—forsi għal ftit snin. Kellu 30 sena meta nħeles mill-ħabs.—Ġenesi 37:2; 39:6; 41:46.