ဘုရားသခင်ထံတော်သို့ ချဉ်းကပ်ကြလော့

ဘုရားသခင် ဝမ်းနည်းတတ်သလော

တရားသူကြီး ၂:၁၁-၁၈

မစုံလင်သော လူသားများအနေနှင့် ကျွန်ုပ်တို့အားလုံးသည် တစ်ချိန်မဟုတ်တစ်ချိန်တွင် ဝမ်းနည်းတတ်ကြသည်။ ဥပမာ၊ ကျွန်ုပ်တို့ အမှားလုပ်မိသွားပြီဟု သိလိုက်သောအခါ ကျွန်ုပ်တို့ ဝမ်းနည်းကြပေမည်။ ယေဟောဝါဘုရားသခင်သည် ဝမ်းနည်းတတ်၏ဟု သမ္မာကျမ်းစာ၌ ဖော်ပြထားသည်မှာ စဉ်းစားစရာပင်။ ‘ဒါပေမဲ့ ဘုရားသခင်က စုံလင်တဲ့အရှင်ဆိုတော့ အပြစ်လုပ်မှာ မဟုတ်ဘူးလေ’ ဟု သင်ပြောပေမည်။ သို့ဆိုလျှင် ဘုရားသခင်သည် အဘယ်သဘောဖြင့် ဝမ်းနည်းတော်မူသနည်း။ ယင်းမေးခွန်း၏အဖြေက အံ့ဖွယ်ကောင်းသော ဤအချက်ကို နားလည်ရန် ထောက်ကူပေးနိုင်သည်– ယေဟောဝါဘုရားသခင်တွင် ခံစားချက်များရှိပြီး ကျွန်ုပ်တို့၏လုပ်ရပ်များက ကိုယ်တော်အား ပျော်ရွှင်စေနိုင်သကဲ့သို့ စိတ်ပျက်စေနိုင်သည်။ တရားသူကြီး ၂:၁၁-၁၈ ပါမှတ်တမ်းကို သုံးသပ်ကြည့်ပါ။

အစ္စရေးနိုင်ငံ၏သမိုင်းတွင် ကသောင်းကနင်းနိုင်သော အချိန်ကာလတစ်ခုကို ကျမ်းစာပါ တရားသူကြီးမှတ်စာတွင် ဖော်ပြထားသည်။ အာဗြဟံကို ဘုရားသခင် ပေးမည်ဟု ကတိပြုခဲ့သော ခါနာန်ပြည်တွင် အစ္စရေးလူတို့ ယခု နေထိုင်လျက်ရှိပြီ။ နောက်ပိုင်းရာစုနှစ်များတစ်လျှောက်တွင် ထပ်ခါတလဲလဲ ဖြစ်ပျက်ခဲ့သည့် စွန့်ခွာခြင်း၊ ဖိနှိပ်ခံရခြင်း၊ အသနားခံခြင်းနှင့် ကယ်နုတ်ခံရခြင်းဟူသော ကဏ္ဍလေးရပ်ဖြင့် အစ္စရေးလူတို့၏လမ်းစဉ်ကို အကျဉ်းချုပ်ဖော်ပြနိုင်ပါသည်။ *

စွန့်ခွာခြင်း။ ခါနာန်လူတို့၏ လွှမ်းမိုးမှုကြောင့် အစ္စရေးလူမျိုးသည် ‘ယေဟောဝါဘုရားသခင်ကိုစွန့်၍’ တခြားဘုရားများ အထူးသဖြင့် ‘ဗာလနတ်ဘုရား၊ အာရှတရက်နတ်ဘုရားတို့ကို ဝတ်ပြု’ လာကြသည်။ * ယေဟောဝါဘုရားသခင်ကို ထိုသို့ စွန့်ခွာခြင်းသည် အယူဖောက်ပြန်ခြင်းဖြစ်၏။ သို့ဖြင့် အစ္စရေးလူတို့သည် အီဂျစ်ပြည်မှ မိမိတို့ကို ကယ်နုတ်ခဲ့သော ‘ယေဟောဝါဘုရားသခင်ကို အမျက်တော်’ ထွက်စေခဲ့ကြသည်။—အခန်းငယ် ၁၁-၁၃; တရားသူကြီး ၂:၁။

ဖိနှိပ်ခံရခြင်း။ ယေဟောဝါဘုရားသခင်သည် ဖြောင့်မတ်သောအမျက်တော် ထွက်လာပြီး မိမိအား စွန့်ခွာသွားသူတို့ကို မကာကွယ်ပေးတော့ချေ။ ထိုအခါ အစ္စရေးလူတို့သည် တိုင်းပြည်ကို လုယူရန် ရောက်လာကြသော “ရန်သူတို့” လက်သို့ ကျရောက်လေတော့သည်။—အခန်းငယ် ၁၄။

အသနားခံခြင်း။ အစ္စရေးလူတို့သည် ဆင်းရဲခက်ခဲမှု ခံစားရသောအခါ မိမိတို့အမှားအတွက် ဝမ်းနည်းကာ ဘုရားသခင်ထံ အော်ဟစ်၍ အကူအညီတောင်းခံကြသည်။ သူတို့သည် “နှောင့်ယှက်ညှဉ်းဆဲခြင်းကိုခံရ၍ မြည်တမ်း” ခြင်းဖြင့် အသနားခံကြပေမည်။ (အခန်းငယ် ၁၈) ဘုရားသခင်ကို အသနားခံခြင်းသည် ထပ်ခါတလဲလဲ ဖြစ်ပျက်ခဲ့ရာများတွင် တစ်ခုအပါအဝင်ဖြစ်သည်။ (တရားသူကြီး ၃:၉၊ ၁၅; ၄:၃; ၆:၆၊ ၇; ၁၀:၁၀) ဘုရားသခင် မည်သို့တုံ့ပြန်ခဲ့သနည်း။

ကယ်နုတ်ခံရခြင်း။ ယေဟောဝါဘုရားသခင်သည် အစ္စရေးလူမျိုး၏ မြည်တမ်းခြင်းကို ကြားသောအခါ “ဝမ်းနည်း” တော်မူသည်။ “ဝမ်းနည်းသည်” ဟူ၍ ပြန်ဆိုထားသော ဟီဘရူးစကားလုံးသည် “စိတ်သဘောထား သို့မဟုတ် ရည်ရွယ်ချက်ကို ပြောင်းလဲလိုက်သည်” ဟုအဓိပ္ပာယ်ရနိုင်သည်။ အကိုးအကားစာအုပ်တစ်အုပ်က ဤသို့ဆိုသည်– “သူတို့၏မြည်တမ်းခြင်းကြောင့် ယေဟောဝါဘုရားသခင်သည် အပြစ်ပေးရန် မရည်ရွယ်တော့ဘဲ ကယ်နုတ်ရန် စိတ်သဘောထား ပြောင်းလဲလိုက်သည်။” ယေဟောဝါဘုရားသခင်သည် မိမိလူမျိုးကို သနားသောကြောင့် ‘တရားသူကြီးတို့ကို ပေါ်ထွန်းစေတော်မူ’ ပြီး ရန်သူလက်မှ ကယ်နုတ်ပေးတော်မူသည်။—အခန်းငယ် ၁၈၊ ကဘ။

ဘုရားသခင်ကို ဝမ်းနည်းစေသော တစ်နည်းအားဖြင့် စိတ်တော်ကို ပြောင်းလဲစေသောအရာကို သင် သတိပြုမိသလော။ ယင်းမှာ ကိုယ်တော်၏လူမျိုးတော်အပေါ် စိတ်သဘောထား ပြောင်းလဲလိုက်ခြင်းဖြစ်သည်။ ဤဥပမာကို စဉ်းစားကြည့်ပါ– မေတ္တာရှိသောဖခင်တစ်ဦးသည် အပြစ်ရှိသောကလေးကို ဆုံးမပြီး အခွင့်အရေးတစ်ခုခုကို ရုပ်သိမ်းပေမည်။ ကလေးသည် အပြစ်အတွက် အမှန်ပင် စိတ်မကောင်းဖြစ်နေကြောင်း ဖခင်သိမြင်သောအခါ သူ့ကို အပြစ်မပေးရန် ဆုံးဖြတ်လိုက်သည်။

ယေဟောဝါဘုရားသခင်အကြောင်း ဤမှတ်တမ်းမှ အဘယ်အရာ သိရှိရသနည်း။ ဘုရားသခင်သည် တမင်တကာအပြစ်ပြုသူများအပေါ် အမျက်ထွက်သော်လည်း နောင်တရသူများကို ကရုဏာပြတော်မူသည်။ ကျွန်ုပ်တို့၏လုပ်ရပ်များက ဘုရားသခင်အား ပျော်ရွှင်စေနိုင်သကဲ့သို့ စိတ်ပျက်စေနိုင်ကြောင်း အလေးအနက် စဉ်းစားသင့်သည်။ ယေဟောဝါဘုရားသခင်၏ “စိတ်ကို ရွှင်လန်းစေ” ရန် မည်သို့လုပ်ဆောင်နိုင်ကြောင်း သင်ယူပါလေ။ (သု. ၂၇:၁၁) ၎င်းအတွက် သင် ဘယ်သောအခါမျှ ဝမ်းနည်းရမည်မဟုတ်ပေ။

[အောက်ခြေမှတ်ချက်]