ကိုဗစ် ၁၉ ရောဂါကူးစက်မှု များတဲ့အတွက် အမေရိကန်နိုင်ငံ တစ်ဝန်းလုံးမှာ အကျဉ်းထောင် အဆောက်အအုံတွေကို ပိတ်လိုက်လို့ ရာနဲ့ချီတဲ့ ယေဟောဝါသက်သေတွေဟာ ကျမ်းစာ စာပေတွေ ဝေငှဖို့၊ ကျမ်းစာသင်အံမှုတွေ ကျင်းပဖို့ ထောင်တွေဆီ ပုံမှန် မလည်ပတ်နိုင်တော့ဘူး။ ဒါကြောင့် ထောင်နဲ့ချီတဲ့ အကျဉ်းသားတွေလည်း ကျမ်းစာကနေ အားပေးနှစ်သိမ့်မှု မရကြတော့ဘူး။ ဒါပေမဲ့ ညီအစ်ကိုတွေဟာ ကိုဗစ် ၁၉ ဘေးကင်းလုံခြုံရေး စည်းမျဉ်းတွေနဲ့အညီ အကျဉ်းထောင်မှာ ဆက်ဟောပြောနိုင်ဖို့ ကြိုးပမ်းခဲ့ကြတယ်။

အမေရိကန် ဌာနခွဲနယ်မြေမှာ ရှိတဲ့ အကျဉ်းထောင် ဟောပြောခြင်းလုပ်ငန်းကို ညှိနှိုင်း ဆောင်ရွက်ပေးတဲ့ ညီအစ်ကို ဒန်ဟိုတန်က “ကျွန်တော်တို့ စိတ်ပူတာက ကျမ်းစာ အကြောင်းအရာ တွေကို ကြားနာဖို့ ကျွန်တော်တို့ရဲ့ လည်ပတ်မှုကို အားထားနေရတဲ့ သူတွေပါ။ အခု သူတို့တွေ အရင်ကထက် ကျွန်တော်တို့ကို ပိုလိုအပ်တယ်” ဆိုပြီး ပြောတယ်။

ဥပမာ၊ ညီအစ်ကို မီခါ ဆာစတက်က ကယ်လီဖိုးနီးယားပြည်နယ်၊ ဗက်ကာဗယ်လီရှိ ထောင်အာဏာပိုင်တွေဆီ ဆက်သွယ်ပြီး၊ JW ရုပ်သံထုတ်လွှင့်မှု အစီအစဉ် ဗီဒီယိုတွေကို အကျဉ်းထောင် အဆောက်အအုံတွေမှာ ပြဖို့ ခွင့်တောင်းခဲ့တယ်။ ထောင်အာဏာပိုင်တွေက ကယ်လီဖိုးနီးယားပြည်နယ်မှာ ရှိတဲ့ အကျဉ်းထောင် ၃၃ ခုစလုံးမှာ ရုပ်မြင်သံကြားကနေ ထုတ်လွှင့်ပြသဖို့ ဗီဒီယိုတွေကို ပို့ပေးပါဆိုပြီး တောင်းဆိုလို့ ညီအစ်ကို အံ့သြခဲ့ရတယ်။ ဒါကြောင့် “အမြဲ ဝမ်းမြောက်ကြပါ” ၂၀၂၀ အစည်းအဝေးကြီးကို ၂၈ မိနစ်စာ ဗီဒီယိုအပိုင်းတွေ ခွဲပြီး တစ်ရက်ကို သုံးကြိမ် ပြသနိုင်ခဲ့တယ်။ အကျဉ်းသားပေါင်း ၁၃၀,၀၀၀ အစည်းအဝေးကြီး ဗီဒီယိုကို ကြည့်ရှုနိုင်ခဲ့ကြတယ်။

ညီအစ်ကို ဆာစတက် အခုလို ပြောတယ်– “ယေဟောဝါ လုပ်ဆောင်တာကို မြင်တွေ့ရတာ အံ့သြစရာပါပဲ။ ဘုရား တစ်ခုခု လုပ်ချင်ရင် ဘာကမှ မတားဆီးနိုင်ဘူး။”

ဖလော်ရီဒါပြည်နယ်၊ ဆာရက်စိုတာ ကောင်တီ ထောင်အာဏာပိုင်တွေဟာ ပိတ်ထားတဲ့ကာလ စိတ်ဖိစီးနေချိန်မှာ အကျဉ်းသားတွေ နှစ်သိမ့်မှု ရအောင် အားပေးမှု ဖြစ်စေတဲ့ စာအုပ်တွေ လိုချင်မှန်း ညီအစ်ကိုတွေ သိလိုက်ရတယ်။ ဒါကြောင့် ညီအစ်ကိုတွေက ကျမ်းစာနဲ့ ကျမ်းစာစာပေတွေကို အင်္ဂလိပ်၊ စပိန် ဘာသာစကား နှစ်မျိုးစလုံးနဲ့ ပေးမယ်လို့ ကမ်းလှမ်းတဲ့အခါ အာဏာပိုင်တွေ လက်ခံခဲ့တယ်။ ညီအစ်ကိုတွေလည်း ဗီဒီယိုကွန်ဖရင့်နဲ့ ကျမ်းစာသင်အံမှု ကျင်းပနိုင်အောင် စီစဉ်ခဲ့ကြတယ်။ ကျမ်းစာလေ့လာတာနဲ့ပတ်သက်ပြီး အကျဉ်းသားတစ်ယောက်က ကျမ်းစာသင်ပေးသူကို ဒီလို စာရေးခဲ့တယ်- “ခင်ဗျား လည်ပတ်မယ့်အချိန်ကို ကျွန်တော် စောင့်မျှော်နေတယ်။ ကျမ်းစာဖတ်ဖို့ ကျွန်တော့်ကို သူတို့ အားပေးတယ်။ အနာဂတ်အကြောင်း တခြားရှုထောင့်ကနေ ကျွန်တော် တွေးမိတယ်။”

စိတ်ဝင်စားသူတွေ မေတ္တာရှင်ဖခင် ယေဟောဝါအကြောင်း သိအောင် ကူညီပေးဖို့ ကပ်ရောဂါဖြစ်ဖြစ်၊ ထောင်နံရံဖြစ်ဖြစ် ဘာကမှ မတားဆီးနိုင်လို့ ကျွန်တော်တို့ ဝမ်းသာကြတယ်။—ဆာလံ ၁၃၉:၇-၁၀။