Ikhona Yini Inkolo Ongayithemba Ezindabeni Zezimpi?
U-Alberto wayelibutho okweminyaka engaba litshumi. Uthi: “Umfundisi wethu wayesibusisa esithi, ‘UNkulunkulu ulani.’ Kodwa ngazibuza ukuthi, ‘Ngiya empini ukuyabulala, lona iBhayibhili lisithi “ungabulali.”’”
U-Ray wayelisotsha ngesikhathi seMpi Yomhlaba Wonke Eyesibili. Wake wabuza umfundisi ukuthi: “Ukhulekela amabutho njalo ukhulekela ukuthi anqobe. Kodwa izitha zethu kazenzi yini okufananayo?” Umfundisi waphendula wathi iNkosi isebenza ngezindlela ezingazwisisekiyo.
Nxa impendulo leyo ingakusuthisi, ayisuwe wedwa.
IBHAYIBHILI LIFUNDISANI?
UJesu wathi omunye umthetho kaNkulunkulu oyisiqokoqela ‘ngowokuthanda umakhelwana wakho njengoba uzithanda.’ (UMakho 12:31) UJesu watsho yini ukuthi sithande kuphela umakhelwana kusiya ngokuthi uhlala ngaphi kumbe ukuthi ungumhlobo bani? Hatshi. Watshela abafundi bakhe ukuthi: “Bonke abantu bazakwazi ukuthi lingabafundi bami uma lithandana.” (UJohane 13:34, 35) Babezathandana kakhulu okokuthi uthando lwabo lwaluzakuba luphawu ababezabonakala ngalo. Babengakubhensela ukufela abanye babo kulokubabulala.
AmaKhristu okuqala ayephila elandela amazwi kaJesu. Ibhuku elithiwa yi-Encyclopedia of Religion lithi: “Abafundisi bensonto bokuqala, abagoqela uTertullian lo-Origen, bavuma ukuthi amaKhristu ayengavunyelwa ukubulala abantu, umthetho lo wawungabavumeli ukuba ngamalunga ebutho leRoma.”
OFAKAZI BAKAJEHOVA BONA BENZA NJANI?
Njengoba oFakazi bakaJehova behlala phose kuwowonke amazwe, nxa amazwe amabili esilwa bayabe betholakala emazweni wonke omabili. Kodwa bazama konke okusemandleni abo ukuze bahlale belophawu lothando olubehlukanisa labanye.
Abafundisi benkolo bafundisile yini ngothando lobuKhristu lweqiniso?
Ngokwesibonelo, ngesikhathi sempi yemindeni eyalwiwa ngomnyaka ka-1994 phakathi kwamaHutu lamaTutsi eRwanda, oFakazi bakaJehova kabasekelanga loba yiliphi icele. OFakazi bomunye umhlobo bavikela oFakazi beminye imihlobo, befaka impilo zabo engozini. Lapho kubanjwa oFakazi ababili ababengamaHutu ababefihle abafowabo ababengamaTutsi, ibutho lesiHutu elalithiwa yi-Interahamwe lathi kubo: “Kumele life ngoba lincede amaTutsi ukuthi abaleke.” Kuzwisa usizi ukuthi oFakazi ababili laba abesiHutu babulawa.—UJohane 15:13.
Ucabangani: Okwenziwa ngoFakazi bakaJehova kuyahambelana yini lamazwi kaJesu endabeni yothando lokuzinikela?
Based on U.S. Army photo
