¿Kenijki tlachiaya Jesús?
Tlen Biblia kijtoua
Xakaj kimati kenijki yemelak tlachiaya Jesús, pampa Biblia xtlajtoua itech yejon. Yejuin techasikamachiltia ika xsajnoye noneki tikmatiskej yejon. San ika, Biblia kijtoua seki tlemach tlen techpaleuiya matikonnemilikan kenijki tlachiaya Jesús.
Ken tlachiaya: Jesús katka judío niman kanaj tlachiaya ijkon ken inan, akin ualeuaya itech ikoneuan Sem (Hebreos 7:14). Nesi ika Jesús xsajnoye tlamantik noso sejneka tlachiaya, pampa ijkuak oyaj de Galilea hasta Jerusalén, xakaj okixmat (Juan 7:10, 11). Niman nesi ika Jesús xsajnoye tlamantik katka de inomachtijkauan akin iuan kistinemiyaj, pampa ijkuak ikajsiskiaj, Judas Iscariote ononek kiteititis katlejua katka Jesús (Mateo 26:47-49).
Itson: Uelis tikijtoskej ika Jesús xtsonueueyak katka, pampa Biblia kijtoua “ika sen tlakatl pinauas tla tsonueueyak yes” (1 Corintios 11:14).
Ixayakatso: Jesús kipiaya ixayakatso. Jesús kitlakamatiya itlanauatiluan judíos tlen kijtouaya ika tlakamej xnonekiya kinotekiliskej inxayakatso (Levítico 19:27; Gálatas 4:4). Niman noijki, ipan se teotlajtojli tlen tlajtoua itech kenijki kitlajyouiltiskiaj Jesús, noteneua ixayakatso (Isaías 50:6).
Itlalnakayo: Nesi ika Jesús melak kojtik katka, pampa ijkuak yejua tenojnotstinemiya melak uejka nejnemiya (Mateo 9:35). Okpa okinkixti akin tlanemakayaj ipan teopan, okintlajkalilij inmesas niman ika se mekatl okinkixti borregos niman uakaxtin (Lucas 19:45, 46; Juan 2:14, 15). Cyclopedia de M’Clintock y Strong, volumen IV, página 884, kijtoua ika ipan nochi Evangelios teasikamachiltia ika Jesús melak chikauak katka.
Ixayak: Jesús tetlasojtlaya niman teikneliaya, niman yejon nesiya ipan ixayak (Mateo 11:28, 29). Miyekej kitejtemouayaj para makinyolseui niman makinpaleui (Lucas 5:12, 13; 7:37, 38). Hasta kokonej kuajli nomachiliayaj ijkuak iuan nemiyaj (Mateo 19:13-15; Marcos 9:35-37).
Tlen sekimej kinemiliaj itech kenijki tlachiaya Jesús
Tlen sekimej kinemiliaj: Miyekej kinemiliaj ika Jesús kapostik katka pampa ipan Apocalipsis kijtoua ika itson Jesús yeskia “ken itlaj lana”, niman ikxiuan yeskiaj kentla “on tepostli kostik itoka bronce [noso ‘cobre’, TNM] ijkuak kipatlaj ipan horno” (Apocalipsis 1:14, 15).
Tlen melauak: Libro de Apocalipsis kiteneua miyek tlajtlamach niman ijkon itlaj kineskayotis noso itlaj kiteasikamachiltis (Apocalipsis 1:1). Tlen nikan noijtoua itech itson niman ikxiuan Jesús, kineskayotia seki tlen kualtsin kichiuaskia sakin ika yoliuiskia. Kuajli nesi ika yejon tlaxelojli xtlajtotoya itech kenijki tlachiaya Jesús ijkuak nemiya ipan tlaltikpaktli. Ipan Apocalipsis 1:14 kijtoua ika “itson istak ken itlaj lana yejuan sanoyej istak, noso ken on nieve”. Ijkuak nikan kijtoua ika itson Jesús istak katka, kijtosneki ika yejua melak tlamachilise pampa melak yeuejkaui yonen (Apocalipsis 3:14).
Ipan tlatlachalistli noijtoua ika “ikxiuan petlaniyaj ken on tepostli kostik itoka bronce [noso ‘cobre’, TNM] ijkuak kipatlaj ipan horno” (Apocalipsis 1:15). Niman noijki kijtoua ika “ixayak sanoyej petlaniya ken on tonaltsintli ijkuak sanoyej chikauak tona” (Apocalipsis 1:16). Kuajli nesi ika yejuin katka san se neskayotl, pampa xakaj nemi akin ijkon makipiya ixayak. Yejuin tlaxelojli kiteneujtoya Jesús sakin ika yoyoliujka, pampa “yejua nemi tlauilpan kampa xe yakaj ueli ajsi” (1 Timoteo 6:16).
Tlen sekimej kinemiliaj: Ika Jesús xyolchikauak katka niman xkojtik katka.
Tlen melauak: Jesús kema yolchikauak katka niman kojtik katka. ¿Tleka ijkon tikijtouaj? Pampa ijkuak sekimej tlakamej okitejtemotoj para kajsiskej, yejua onoteixpanti (Juan 18:4-8). Niman tikmatstokej ika Jesús kojtik katka pampa tekitiya ken kojxinketl, niman para se uelis kichiuas yejon tekitl nonekiya chikauak yes (Marcos 6:3).
Kuakon, ¿tleka ononek makitkilikan on kojtli melaktik tlen ipan kipiloskiaj? ¿Niman tleka yejua kachtopa omik xken on akin iuan okinpilojkaj? (Lucas 23:26; Juan 19:31-33). Achto kimiktiskiaj, yejua melak yokitlajyouiltijkaj niman xok kojtik katka. Xokoch nochi yeuajli pampa san tlemach okichiuilijkej (Lucas 22:42-44). Judíos san tlemach okichiuilijkej ika tlayoua niman, uajmostla, on romanos melak okitlajyouiltijkej (Mateo 26:67, 68; Juan 19:1-3). Uelis tikijtoskej ika nochi yejuin okichiuj ika más totoka mamiki.
Tlen sekimej kinemiliaj: Jesús nochipa najmantoya niman nochipa san tlajtlanemilijtoya.
Tlen melauak: Jesús nochipa kichiuaya ijkon ken iTaj iluikak chanej, Jehová, akin Biblia kitokayotia ken “toTajtsin akin paktika” (1 Timoteo 1:11, TNM; Juan 14:9). Niman Jesús okinmachti oksekimej kenijki ueliskiaj yolpakiskej (Mateo 5:3-9; Lucas 11:28). Yejua ika, uelis tikijtoskej ika Jesús nochipa uetskatinemiya.
Puede que también le interese
ENSEÑANZAS IMPORTANTES DE LA BIBLIA
¿Kenon tikmatij ika melauak tlen kijtoua Biblia?
Tla toTajtsin okichiuj manoijkuilo Biblia, kuakon yejuin libro xijkon ken oksekimej.
TOTECHKOPA
Xteijli mamitstlajpalotij
Xkita tlen Biblia temachtia noso xmati más itech iteixpantijkauan Jehová.