Fanau au i Acul, ko e taone mamao ke he faahi lalo he tau atu mouga ha Guatemala. Ko e magafaoa haaku ko e tau tagata Ixil, ko lautolu ia ne tupu mai he matakau Maya. Lafi ke he vagahau Sepania, ne tupu hake au mo e vagahau he motu. He tau tau fakamua he moui haaku, ko e magahala favale mo e felakutaki a ia ha Guatemala ne 36 e tau he loa. Tokologa e tau tagata Ixil ne mamate he magahala ia.

He fā e tau haaku, ko e taokete haaku ne fitu e tau ne pelē mo e pomu ti pā pulenoa ai. Ne pouli e tau mata haaku he pakia ia, ka e momoko he mate e taokete haaku. Ti fano au he magaaho ne tote agaia ke nofo he fale ma e tau fanau matapouli i Guatemala City, ti fakaako Braille au i ai. Nakai maama katoatoa e au e kakano ne fakataputapu he tau faiaoga au ke nakai tutala mo e falu fanau, ti fakamamao e tau tama he aoga ia au. Ne matimati tumau au mo e amaamanaki lahi ke he ua e mahina he tau ka finatu ki kaina ke he haaku a matua fifine, ne totonu mo e fakaalofa hofihofi tumau. Momoko ai, ne mate a ia he hogofulu e tau haaku. Logona hifo e au kua galo kehe e tagata ne fakaalofa ki a au he lalolagi katoa, ti fakaatukehe lahi au.

He 11 e tau, ne liu au ki kaina ti nofo mo e taokete haaku mo e magafaoa haana. Ne leveki e lautolu au, ka e nakai fai tagata ne maeke ke lagomatai au mo e haaku a tau logonaaga. Lagaloga, ne tagi atu au ke he Atua: “Ko e ha ne mate e matua fifine haaku? Ko e ha ne matapouli au?” Tala mai e tau tagata ki a au ko e tau matematekelea nei, ko e finagalo he Atua. Ne mauokafua au kua nakai fai logonaaga e Atua mo e onoono fakateaga foki a ia. Taha ni e kakano ne nakai taupega au ha kua nakai fai puhala ke taute pihia.

Ha kua matapouli, ne nakai maeke au ke puipui e tino haaku mo e tau logonaaga. He vahā tote, ne lagaloga e fakapilo pulenoa au. Nakai hokotaki e au e tau mena kelea ia​—manatu au to nakai fanogonogo ha tagata ki a au. Lavea e tau tagata ke tutala ki a au, ti ai tutala foki au ke he ha tagata. Ne nofo tokotaha au mo e fakaatukehe, ti nakai falanaki au ke he ha tagata.

He fuata mui au, tokoua e Fakamoli a Iehova (ko e hoa mau) ne o mai ki a au he taha magaaho pelē he aoga. Taha e faiaoga he aoga ne fakaalofa ke he tuaga haaku, ti ole ki a laua ke aahi mai au. Tala mai e laua e maveheaga he Tohi Tapu, ko lautolu ne mamate to liliu tu mai,  mo e to hoko taha aho ti fakaala e tau mata he tau tagata matapouli. (Isaia 35:5; Ioane 5:28, 29) Ne fiafia au ke he tau mena ne fakaako mai e laua, ka e uka ke tutala ki a laua ha kua nakai mahani au ke tutala. Pete ne mā au, ne totonu mo e fakauka a laua ke ahiahi tumau mai ke fakaako e Tohi Tapu mo au. O mai hui a laua nei ke he molea e ono e maila (10 e kilomita), ti o hake mo e o hifo he mouga ke hoko mai ki a au.

Ne fakamaama mai he taokete haaku ko laua ko e tau tagata tauteute maopoopo ka e ai monuina. Ka e fiafia tumau a laua ki a au, ti tamai foki e tau mena fakaalofa ikiiki. Manatu au ko e tau Kerisiano mooli ni ka fakakite e aga foaki noa pihia.

Ne fakaako Tohi Tapu au he fakaaoga e tau tohi Braille. Pete he nakai lotomatala lahi, ne maama ia au e tau mena haaku ne fakaako, ka e uka ke talia e falu fakaakoaga ne lauia e haaku logonaaga. Ma e fakatai, ne taufetului au ke talia na fakaalofa mooli e Atua ki a au, mo e maeke falu tagata ke fakakite mai e fakaalofa he Atua ki a au. Ne maama ia au e kakano ne fakaatā fakakū e Iehova e mahani kelea, ka e uka lahi au ke kitia a ia ko e Matua fakaalofa hofihofi. *

Fano fakahaga, ne lagomatai he tau fakaakoaga mai he Tohi Tapu au ke hiki e onoonoaga haaku. Ma e fakatai, ne iloa e au kua fakaalofa lahi e Atua ke he tau tagata ne matematekelea. Ko e tau tagata ne tapuaki ki a ia ne matematekelea, ne pehē e Atua: “Kua kitekite ni au ke he matematekelea he haku motu . . . ha kua kitia e au ha lautolu a mamahi.” (Esoto 3:7) Ne talia e au e tau aga fakaalofa hofihofi ha Iehova, ti omoi au ke tukulele e moui haaku ki a Iehova. He 1998, ne papatiso au ko e taha he Tau Fakamoli a Iehova.

Kavi ke he taha e tau he mole e papatiso haaku, ne finatu au he aoga ma e tau tagata matapouli ne tata ke he taone ko Escuintla. Taha e matakainaga motua he fakapotopotoaga haaku ne iloa e uka haaku ke finatu ke he tau feleveiaaga. Kitia e mutolu, ko e fakapotopotoaga ne tata mai ki a au, haia he atu mouga ne o mai e hoa Fakamoli ke fakaako Tohi Tapu mo au, ti uka lahi ke fenoga atu au ki ai. Ne kumi he motua ia e magafaoa Fakamoli i Escuintla ke lagomatai au, ti fiafia e magafaoa ke nofo au he kaina ha lautolu mo e lagomatai ke finatu he tau feleveiaaga he fakapotopotoaga. Ke hoko mai ke he aho nei, leveki e lautolu au tuga ni ko e taha he magafaoa ha lautolu.

Loga foki e tau mena ke tala atu e au ke he fakaalofa mooli he tau matakainaga he fakapotopotoaga ki a au. Ko e tau mena oti nei, ati mauokafua au ko e taha he Tau Fakamoli a Iehova, kua fakalataha au mo e tau Kerisiano mooli.​—Ioane 13:34, 35.

Nakai logona e au e fakateaga mo e nakai fai amaamanakiaga mogonei. Kua fai kakano lahi e moui haaku. He fekafekau tumau ko e tagata gahua fakaako Tohi Tapu he Tau Fakamoli a Iehova, ne hagaaki au ke fakaako e falu ke he tau mena uho mooli he Tohi Tapu ka e nakai hagaaki ke he haaku matapouli. Moua foki e au e monuina ke fekafekau ko e motua he fakapotopotoaga, mo e taute e tau lauga Tohi Tapu ma e toloaga tagata he tau fakapotopotoaga he matakavi haaku. Moua foki e au e monuina ke taute e tau lauga ne fakavē ke he Tohi Tapu he tau fonoaga faahimotu, ne totou afe e tau tagata ne fakalataha ki ai.

He 2010, ne liu mai au he Aoga Fakaako Fekafekau (mogonei kua fakahigoa ko e Aoga ma e Tau Tagata Fakamatala) ne fakahoko i El Salvador. Ne fakaako he aoga nei au ke taute e tau matagahua haaku he fakapotopotoaga. He moua e fakaakoaga nei ne logona hifo e au e aoga mooli haaku mo e fakaalofa mai ha Iehova ko e Atua, ko ia ne talia ha tagata ma e gahua haana.

Pehē a Iesu: “Kua mua e monuina hana ke foaki atu, ke he monuina hana ke talia mai.” (Gahua 20:35) Pete he magaaho fakamua ne manatu to nakai fakaai au ke lagomatai falu tagata, ka ko e magaaho nei, kua moua e au e fiafia mooli ke lagomatai e falu.