•  O nagana gore o motho wa mohuta mang?

•  Ke ka baka la’ng taba ye e le bohlokwa?

•  Seo o ka se dirago

•  Bala ka taba ye ka mo go oketšegilego

•  Seo dithaka tša gago di se bolelago

•   Motho wa go dula a na le pono e botse ka dilo

   “Ke leka go dula ke thabile le gore ke se ke ka nyama. Ke lwela gore ke dule ke myemyela le go thaba letšatši le letšatši.”—Valerie.

•   Motho wa go dula a na le pono e mpe ka dilo

   “Ka mehla ge dilo di sepela gabotse, ke a tseba gore di ka se felele felo.”—Rebecca.

•   Motho wa go bona dilo ka tsela yeo di lego ka yona

   “Go ba le pono e botse ka dilo ka mehla go dira gore ke dule ke nyamile ge dilo di sa sepele gabotse, le gona go ba le pono e mpe ka dilo ka mehla go dira gore ke se ke ka thabela bophelo. Go bona dilo ka tsela yeo di lego ka gona go ntira gore ke bone seo gabotse dilo tšeo di lego sona.”—Anna.

 Beibele e re: “Wa pelo e lokilego o dula a le monyanyeng.” (Diema 15:15) Go molaleng gore batho bao ba phemago dikgopolo tše di fošagetšego ba lebelela bophelo gabotse e bile ba dula ba thabile. Ba kgona go dira bagwera gabonolo. Ke mang yo a ka nyakago go phela le motho yo a dulago a nyamile e bile a se na pono e botse ka bophelo?

 Le ge o lebelela dilo gabotse, go tlo no dula go na le dilo tše di nyamišago tšeo di diregago. Ka mohlala:

•   Ditabeng re dula re ekwa dipego tša dintwa, bosenyi goba bohodu.

•   O ka swanelwa ke go lebeletšana le mathata ka lapeng.

•   Ga go pelaelo gore o na le mafokodi le dilo tšeo di go palelago tšeo o swanetšego go lwantšhana le tšona.

•   Mogwera wa gago a ka go kweša bohloko.

 Go ena le go leka go tšhabela mathata a goba go tshwenyega ka ona ka tsela e feteletšego, leka go a lebelela ka tsela yeo a lego ka yona. Go lebelela dilo ka tsela yeo di lego ka yona go tlo go thuša gore o se ke wa ba le dikgopolo tše dintšhi tše di fošagetšego gomme o amogele maemo a bophelo ka tsela yeo a lego ka yona.

•   Lebelela mafokodi a gago gabotse.

   Beibele e re: “Ruri, mo lefaseng ga go mothomoloki modiratšebolo yo a sa kego a dira sebe.” (Mmoledi 7:20, Beibele ya Taba ye Botse) Ka ge o se wa phethagala o tlo fela o dira diphošo eupša seo ga se re gore ga o na mohola.

   Kamoo o ka bonago dilo ka tsela yeo di lego ka yona: Lokiša diphošo tša gago, eupša o gopole gore ga se wa phethagala. Moswa yo a bitšwago Caleb o re: “Ke lwela gore ke se ke ka lebelela diphošo tša ka kudu. Go ena le moo ke ithuta go tšona gore ke kgone go kaonefatša.”

•   O se ke wa ipapiša le batho ba bangwe.

   Beibele e re: “Anke re se beng ba ikgopolago, re tsošetšana phenkgišano e bile re jelana mona.” (Bagalatia 5:26) Go lebelela diswantšho tša moletlo woo o sego wa memiwa go wona inthaneteng go ka go dira gore o galefe. Go ka dira gore o bone eka bagwera ba gago ke manaba.

   Kamoo o ka bonago dilo ka tsela yeo di lego ka yona: Amogela gore o ka se memiwe moletlong o mongwe le o mongwe. Le gona, dilo tšeo batho ba di beago inthaneteng ga di bontšhe dilo ka moka tšeo di diregago maphelong a bona. Moswa yo a bitšwago Alexis o re: “Batho ba bantšhi inthaneteng ba bea fela dilo tšeo di kgahlišago kudu maphelong a bona. Ga ba ke ba bea dilo tšeo di sa kgahlišego.”

•   Dira khutšo, kudu ka lapeng la geno.

   Beibele e re: “Ge e ba go kgonega, go fihla moo go ithekgilego ka lena, ebang le khutšo.” (Baroma 12:18) O ka se kgone go laola tsela yeo ba bangwe ba itshwarago ka yona, eupša o ka kgona go laola tsela yeo o arabelago ka yona tseleng yeo ba itshwarago ka yona. O ka kgetha go ba modirakhutšo.

   Kamoo o ka bonago dilo ka tsela yeo di lego ka yona: Lwela gore o se ke wa dira gore mathata a ka lapeng a mpefale, eupša e ba le khutšo le ba ka lapeng bjalo ka ge o na le khutšo le bagwera ba gago. Moswa yo a bitšwago Melinda o re: “Ka moka ga se ra phethagala, ka gona re tlo fela re kwešana bohloko. Ka baka leo re swanetše go kgetha gore re tlo arabela ka tsela efe ge re kwešwa bohloko. Re ka kgetha go arabela ka tsela yeo e tla dirago khutšo goba go se bjalo.”

•   Ithute go leboga.

   Beibele e re: “Ipontšheng le le ba lebogago.” (Bakolose 3:15) Go leboga go tlo go thuša gore o dule o lebeletše dilo tše dibotse bophelong bja gago go e na le go lebelela tšeo di sa sepelego gabotse.

   Kamoo o ka bonago dilo ka tsela yeo di lego ka yona: Amogela gore o na le mathata, eupša šetša kudu dilo tše dibotse tšeo di diregago bophelong bja gago. Moswa yo a bitšwago Rebecca o re: “Letšatši le lengwe le lengwe ke ngwala selo setee se se botse seo se ntiragaletšego. Ke nyaka go ikgopotša gore le ge ke na le mathata go dula go na le selo se se botse seo nka naganago ka sona.”

•   Nagana ka mohuta wa bagwera bao o ba kgethago.

   Beibele e re: “Ditlwaelano tše mpe di senya mekgwa e holago.” (1 Bakorinthe 15:33) Ge eba batho bao o fetšago nako le bona ba rata go swayaswaya diphošo, ba rata metlae ka mo go feteletšego goba ba rata go swara dikgopi, le wena o ka feleletša o na le mekgwa yeo e mebe.

   Kamoo o ka bonago dilo ka tsela yeo di lego ka yona: Ge bagwera ba gago ba na le mathata, ka dinako tše dingwe ba ka nyama goba ba ba le kgateletšego ya monagano. Ba thekge eupša o se ke wa dumelela mathata a bona a go nyamiša ka mo go feteletšego. Moswa yo a bitšwago Michelle o re: “O se ke wa fetša nako le batho bao ba se nago tebelelo e botse ka dilo.”

 Beibele e re re phela ‘dinakong tše di hlobaetšago tšeo go lego thata go lebeletšana le tšona.’ (2 Timotheo 3:1) Na go thata gore o dule o lebelela dilo gabotse lefaseng le leo le tletšego dilo tše dimpe? Bala sehlogo se rego “Ke ka Baka la Eng go na le Tlaišego e Kaakaa?”