Na go a Kgonega Gore Maemo a Ikonomi a Lekalekane?
Dinageng tše dintši, batho ba toitoya ditseleng ka gobane ba ikwa eka maemo a ikonomi ga a lekalekane. Mathata ao a ile a gola le go feta ka baka la bolwetši bja COVID-19, bjo bo dirilego gore batho ba se thabele maemo a bona, ge dithibelo, tlhaelelo ya dilo le go fokotšega ga ditirelo tša kalafo di utolla phapano e kgolo magareng ga bao ba humilego le bao ba diilago.
Na mathata a ikonomi ao a tlaišago batho a tla ka a fela? Ee. Beibele e re hlalosetša seo Modimo a tlago go se dira go rarolla mathata ao re lebanego le ona.
Mathata a Ikonomi ao Modimo a tlago go a rarolla
Bothata: Batho ga se ba ka ba kgona go hlama tshepedišo ya Ikonomi yeo e kgonthišetšago gore batho ka moka ba na le dilo tšeo ba di hlokago.
Tharollo: Modimo o tla tliša Mmušo wo o tlago go tšeela mebušo ya batho legato. Mmušo wo o bitšwa Mmušo wa Modimo. O tla buša lefase ka moka o le legodimong.—Daniele 2:44; Mateo 6:10.
Mafelelo: Ka ge e tla be e le Mmušo wa lefase ka moka, Mmušo wa Modimo o tla kgona go laola lefase gabotse. Batho ba ka se sa diila goba go ba le dipelaelo tša ge e ba ba tla ba le dilo tšeo ba di hlokago gore ba tšwelepele ba phela. (Psalme 9:7-9, 18) Go e na le moo, ba tla thabela dilo tše dibotse tšeo ba di šometšego, e bile ba kgotsofala ba na le malapa a bona. Beibele e holofetša gore: “Ba tla aga dintlo ba dula go tšona; ba tla bjala dirapa tša merara ba ja dienywa tša tšona. Ba ka se ke ba aga gwa dula o šele; ba ka se ke ba bjala gwa ja o šele.”—Jesaya 65:21, 22.
Bothata: Batho ba ka se kgone go phema maemo ao a ba tlaišago le go se be le dilo tšeo ba di hlokago bophelong.
Tharollo: Modimo o tla diriša Mmušo wa gagwe, go fediša dilo tšeo di dirago gore batho ba be le poifo le go ikwa ba se ba šireletšega.
Mafelelo: Ka tlase ga tlhokomelo ya Modimo, batho ba ke se sa ba le maemo ao a dirago gore bona le malapa a bona ba se be le dilo tšeo ba di hlokago bophelong. Ka mohlala, dintwa, tlhaelelo ya dijo, malwetši, di ka se sa ba gona. (Psalme 46:9; 72:16; Jesaya 33:24) Modimo o re: “Batho ba ka ba tla dula lefelong la bodulo la khutšo le madulong a bolokegilego gotee le mafelong a boiketlo a khutšo.”—Jesaya 32:18.
Bothata: Gantši batho bao ba inaganelago ba nnoši le ba megabaru ga ba sware batho ba bangwe gabotse.
Tharollo: Bahlanka ba Mmušo wa Modimo ba tla ithuta go bontšha gore ba rata ba bangwe go feta kamoo ba ithatago ka gona.—Mateo 22:37-39.
Mafelelo: Ge Mmušo wa Modimo o buša, batho ka moka ba tla ekiša lerato la Modimo, la go se “nyake tša go ikhola.” (1 Bakorinthe 13:4, 5) Beibele e re: “Di ka se gobatše goba tša senya thabeng ka moka ya ka e kgethwa; ka gobane lefase le tla tlala tsebo ya Jehofa a go etša ge meetse a khurumeditše lewatle.”—Jesaya 11:9.
Beibele e hlalosa gore re phela mehleng ya bofelo ya tshepedišo ye ya dilo le gore kgauswinyana Modimo o tla phethagatša dikholofetšo tša gagwe tša go fediša mathata a Ikonomi. b (Psalme 12:5) Pele ga ge seo se ka direga, melao ya motheo ya Beibele e ka go thuša go lebeletšana le mathata a Ikonomi ao o nago le ona gona bjale. Ka mohlala, bala sehlogo seo se rego “Kamoo o ka Phelago ka Tšhelete e Nyenyane” le seo se rego “Go ba le Pono e Lekalekanego ka Tšhelete”.
a Jehofa ke leina la Modimo bjale ka ge le tšwelela ka Beibeleng.—Psalme 83:18.
b Go ithuta gore ke ka baka la’ng o ka tshepa Beibele, bala sehlogo seo se rego, “Ge o Nyaka go tseba Nnete, Bala Beibele.”
You May Also Like
MOROKAMI
Mmušo wa Modimo o tlo re Direla Eng?
Jesu o be a tseba gore Mmušo wa Modimo ke wona feela wo o ka rarollago mathata ka moka mo lefaseng. Mmušo woo o šetše o dirile eng gore re o tshepe?
PHAFOGA!
Kholofelo go Bao ba se Nago Magae le Badiidi
Ditšhišinyo tšeo di tšwago ka Beibeleng di ka re thuša gore re šireletšege go tša ikonomi le maikwelong.
DITEMANA TŠA BEIBELE DI A HLALOSWA
Tlhaloso ya Mateo 6:34—“Le se ke la Belaelela tša ka Moswana”
Jesu o be a sa re gore ga se ra swanela go itokišeletša seo se ka diregago nakong e tlago.
