Amajjii 24, 2023​tti, saayintistoonni Saʼaatii Guyyaa Badiisaa a isa dhuma addunyaa akka argisiisutti yaadamu gara halkan walakkaatti siqsaniiru.

•   “‘Saʼaatiin Guyyaa Badiisaa’ mallattoo dhalli namaa akka ofiin of balleessu argisiisudha. Kibxata saayintistoonni saʼaatiin kun haala sana dura taʼee hin beekneen gara halkan walakkaatti akka siqu godhaniiru; wantoonni kanaaf sababa taʼanis waraana Yuukreen keessa jiru, sodaa waraana niwukilarii fi haalli qilleensa naannoo lafaa balaadhaaf kan saaxilame taʼuu isaati.”—AFP International Text Wire.

•   “Saayintistoonni ‘Saʼaatiin Guyyaa Badiisaa’ gara halkan walakkaatti baayʼee akka siqu godhaniiru, halkan walakkaa bira gaʼuuf kan hafu sekoondii 90 dha; kunis dhalli namaa armaagedoonitti baayʼee akka dhihaate argisiisa.”—ABC News.

•   “Jireenyi dhala namaa yeroo kamiyyuu caalaa amma balaadhaaf akka saaxilame gareen saayintistootaa tokko akeekkachiiseera.”—The Guardian.

 Badiisni dhala namaa fi pilaaneetii keenyaa dhihaateeraa? Yeroon gara fuulduraa nu sodaachisuu qabaa? Kitaabni Qulqulluun maal jedha?

 Kitaabni Qulqulluun akka jedhutti, “lafti . . . bara baraaf jiraatti,” namoonni ‘bara baraaf ishii irra jiraatanis’ ni jiraatu. (Lallaba 1:4; Faarfannaa 37:29) Kanaafuu, namoonni lafa balleessuus taʼe bakka jireenyi irratti hin argamne gochuu hin dandaʼan.

 Haa taʼu malee, Kitaabni Qulqulluun badiisni akka dhufus ni dubbata. Fakkeenyaaf, “addunyaanii fi hawwiin isaa darbaa” akka jiran ni dubbata.—1 Yohaannis 2:17.

•   Kitaabni Qulqulluun addunyaan akka badu yeroo dubbatu maal jechuu isaa akka taʼe beekuuf mata duree, “Addunyaan Kun Dhiheenyatti ni Badaa? Appookiliipsiin Maali Dha?” jedhu dubbisi.

•   Kitaabni Qulqulluun gara fuulduraatti addunyaarratti yeroo taʼeewwan garaa garaa itti raawwataman ilaalchisee maal akka jedhu beekuuf mata duree, “Dhumni Addunyaa Yoomi?” jedhu dubbisi.

 Addunyaarra rakkinni kan jiru taʼus Kitaabni Qulqulluun ilaalcha gaarii qabaannee akka itti fufnu nu gargaaruu dandaʼa. Akkamitti?

•   Kitaabni Qulqulluun gorsa nu fayyadu nuuf kenna. (2 Ximotewos 3:16, 17) Fakkeenyaaf, Kitaabni Qulqulluun rakkinni jiraatus ilaalcha gaarii qabaachuuf kan si gargaaru akkamitti akka taʼe beekuuf mata duree, “Dhiphina Toʼachuun kan Dandaʼamu Akkamitti?” jedhu dubbisi.

•   Kitaabni Qulqulluun abdii amansiisaa akka qabnu dubbata. (Roomaa 15:4) Yeroo ammaattis taʼe gara fuulduraatti maal eeguu akka dandeenyu, akkasumas haalli addunyaarra jiru hammamiyyuu yoo hammaate amanannaa qabaachuu akka dandeenyu ni ibsa.

 Kitaaba Qulqulluurraa faayidaa guutuu argachuu akka dandeessuuf, nu wajjin tolaan Kitaaba Qulqulluu akka qoʼattu miira hoʼaadhaan si affeerra.