ЕСКЕ нин ести дессаги лӕвар ку искӕна, уӕд ин ӕнӕ райарфӕ кӕнӕн нӕййес. Киристе дӕс адӕймаги ку исдзӕбӕх кодта, уӕди рӕстӕги хуасӕ кӕмӕн н’ адтӕй, уӕхӕн незӕй, уӕд имӕ ӕрмӕстдӕр еунӕг раздахтӕй «Хуцауи гъӕрӕй кадгин кӕнгӕй». Ӕма Йесо загъта: «Дӕс адӕймаги не ’сдзӕбӕх ӕнцӕ? Уӕд иннӕ фараст кӕми ’нцӕ?» (Лукай 17:12–17). Аци хабар нин цӕбӕл дзорӕг ӕй? Адӕймаг еске хуарздзийнадӕ тагъд иронх кӕнуй.

Киристей нивонд тӕккӕ хъазардӕр лӕвар ӕй ӕма ин ӕ хӕццӕ рабарӕн дӕр неци ес. Мадта еци лӕвари туххӕй Хуцауӕй боз ке дӕ, уой дӕ бон куд ӕй бавдесун?

• Лӕвар дин ка искодта, уой базонӕ. Хуцау адӕни тӕрегъӕдтӕбӕл устур аргъ ке бафиста, е уобӕл дзорӕг нӕма ӕй, ӕма адӕн еугурӕйдӕр ӕносон цардӕй исхайгин уодзӕнцӕ. Йесо Хуцаумӕ ку кувта, уӕд загъта: «Цӕмӕй адӕймаг ӕносмӕ цӕра, уой туххӕй гъӕуама базона дӕу, еунӕг ӕцӕг Хуцауи, ӕма ду ке рарвистай, еци Йесо Киристей» (Иоанни 17:3). Зӕгъӕн, загътонцӕ дин, минкъий ма ку адтӕ, уӕд дӕ кадӕр мӕлӕтӕй ке фӕййервӕзун кодта. Цума дӕ еци адӕймаги туххӕй фулдӕр базонун нӕ бафӕндадтайдӕ? Мах туххӕй ӕ Фурти ка равардта, еци Хуцау Йегови фӕндуй, цӕмӕй, ка ӕй, айдагъ уой ма базонай,  фал ма имӕ цӕмӕй хӕстӕг дӕр кӕнай. Библи нин зӕгъуй: «Бахӕстӕг уотӕ Хуцаумӕ, ӕма уӕмӕ е дӕр ӕрбахӕстӕг уодзӕй» (Иакови 4:8).

• Киристей нивондбӕл ӕууӕндӕ. «Фуртбӕл ка ’ууӕндуй, е исхайгин уодзӕй ӕносон цардӕй» (Иоанни 3:36). Фуртбӕл, гъома Киристей нивондбӕл, ке ӕууӕндӕн, е гъӕуама нӕ гъуддӕгтӕй бӕрӕг уа (Иакови 2:17). Цӕхуӕн гъуддӕгтӕй? Лӕвар дӕу уодзӕй, ку ’й райсай, ӕрмӕстдӕр уӕд. Мадта Киристей нивонд дӕр гъӕуама есгӕ ракӕнай. Кутемӕй? Базонӕ, дӕ бон куд ӕй, дӕ цардӕй Хуцауи зӕрдӕ рохс кӕнун, уой ӕма уотӕ цӕрӕ *. Хуцаумӕ ковӕ, цӕмӕй дин дӕ тӕрегъӕдтӕ ниххатир кӕна ӕма дӕ цӕсгон ӕ рази кӕдзос уа. Ба имӕ хӕстӕг уо ӕма ӕппундӕр ма дузӕрдуг кӕнӕ, Киристей нивонд ӕносон фарнӕ, ӕдасдзийнадӕ ӕма амондгун цард ке ӕрхӕсдзӕй, кадӕриддӕр ибӕл ӕууӕндуй, уонӕн! (Дзиуиттӕгтӕмӕ 11:1).

• Киристей мӕлӕт Имисӕн изӕрмӕ ӕрбацо. Йесо бафӕдзахста, цӕмӕй алли анз дӕр нӕ зӕрдӕбӕл ӕрлӕуун кӕнӕн, ӕ цард нивонди ке ӕрхаста, уой. Йесо загъта: «Уотӕ кӕнтӕ мӕ имисуни туххӕй» (Лукай 22:19). Йегови Ӕвдесӕнтӕ Киристей мӕлӕт Имисӕн изӕр бӕрӕг кӕндзӕнцӕ 2017 анзи 11 апрели, геуӕргибони хорнигулди фӕсте. Программӕ цӕудзӕй еу сахатти бӕрцӕ. Уодзӕй си радзубанди, ӕма си базондзӕнӕ, Киристей мӕлӕт ӕхсидзгӕ цӕмӕн ӕй, е нин абони цӕхуӕн арфӕдзийнӕдтӕ хӕссуй, удта нин федӕни ци арфӕдзийнӕдтӕ ӕрхӕсдзӕй, уой туххӕй. Фарӕ Имисӕн изӕрмӕ ӕрбацудӕй 20 милиуан адӕймагей бӕрцӕ. Зӕрдиагӕй дӕ хонӕн аци анз Имисӕн изӕр нӕ хӕццӕ исбӕрӕг кӕнунмӕ. Уотемӕй ду дӕр бавдесдзӕнӕ, Хуцауи устур лӕварӕн ке аргъ кӕнис, уой.