«АВТОБУС цӕуӕд, аци китайаг ба ами байзайӕд!» Аци дзурдтӕ Александрӕ автобуси бадгӕй райгъуста. Автобус лӕудтӕй Хонсар Америки дууӕ бӕстей астӕу ци арӕн ес, уоми. Александрӕ автобусӕй рахизтӕй, ци ’рцудӕй, уой базонунмӕ. Ӕма фӕууидта, къумух испайнаг ӕвзагбӕл арӕнгъӕуайгӕнӕгӕн цидӕртӕ ка дзурдта, еу уӕхӕн китайаг нӕлгоймаги. Александрӕ Йегови Ӕвдесӕн адтӕй ӕма цудӕй китайаг ӕмбурдмӕ, ӕма син загъта, ӕ бон син ке ӕй банхус кӕнун.

Еци китайаг нӕлгоймаг балӕдӕрун кодта, еци бӕсти ке цӕруй, фал ин е ’хцатӕ ӕма ӕ гӕгъӕдитӕ ке радавтонцӕ. Арӕнгъӕуайгӕнӕг ибӕл фиццаг нӕ баууӕндтӕй, уотӕ дӕр ма имӕ фӕккастӕй, цума Александри хӕццӕ еумӕ ’нцӕ. Фӕстагмӕ ибӕл уӕддӕр баууӕндтӕй, фал имӕ гӕгъӕдитӕ ке н’ адтӕй, уой туххӕй ба ’й штраф бафедун гъудӕй. Ӕнӕ ’хцайӕй ке байзадӕй, уомӕ гӕсгӕ бал ин Александрӕ 20 доллӕри ӕфстау равардта. Еци нӕлгоймаг Александрӕй уотӕ боз адтӕй ӕма ин зӕгъӕн дӕр нӕййес! Зӕрдӕ ин байвардта фулдӕрӕй ин сӕ ке бафеддзӕй. Александрӕ ин балӕдӕрун кодта, уой туххӕй ин ке нӕ банхус кодта, фал иннетӕн ӕнхус кӕнун раст ке ӕй, уой туххӕй. Уой фӕсте ин Библибӕл арӕзт литературӕ равардта ӕма ин загъта, цӕмӕй Йегови Ӕвдесӕнти хӕццӕ Библи ахур кӕнун райдӕдтайдӕ.

Кадӕр ӕнӕзонгӕ адӕймагӕн куд банхус кодта, уӕхӕн хабӕрттӕ фегъосун ӕхцӕуӕн фӕууй. Цийфӕнди дини дӕр, удта Хуцаубӕл ка не ’ууӕндуй, уони астӕу дӕр ес, иннетӕн банхус кӕнунмӕ цӕттӕ ка ӕй, уӕхӕн адӕн. Дӕу ба нӕ фӕндуй, цӕмӕй ду дӕр, уони хузӕн уай? Е ӕхсидзгӕ фарста ӕй, уомӕн ӕма Киристе уотӕ загъта: «Райсунӕй раттун амондгундӕр гъуддаг ӕй» (Гъуддӕгтӕ 20:35). Ахургӕндтӕ дӕр исбӕрӕг кодтонцӕ, адӕймаг хуарздзийнадӕ ку кӕна, уӕд е ӕхецӕн дӕр хуарз ке ӕй. Ӕркӕсӕн, уомӕн куд ес гӕнӕн, уомӕ.

Куд рабӕрӕг ӕй, уотемӕй рӕдау адӕймаг амондгун фӕууй. Апостол Павел ниффинста: «Хуцау, зӕрдӕй ка дӕттуй, уой уарзуй». Ами Павел дзурдта, тухст уавӕри ка бахаудтӕй, уонӕн зӕрдиагӕй ка ӕнхус кодта, еци киристӕнтти туххӕй (2 Коринфӕгтӕмӕ 8:4; 9:7). Павел куд загъта, уомӕ гӕсгӕ еци хуӕртӕ ӕма ӕнсувӕртӕ амондгун ке адтӕнцӕ, уой туххӕй н’ адтӕнцӕ рӕдау, фал рӕдау ке адтӕнцӕ, уой туххӕй адтӕнцӕ амондгун.

Ӕртасгутӕ куд зӕгъунцӕ, уомӕ гӕсгӕ адӕймаг ескӕмӕн ку фенхус кӕнуй, уӕд «ӕ сӕри магъзи хъӕбӕрдӕр косун райдайунцӕ, цийнӕ кӕнунбӕл ӕма адӕни хӕццӕ федаунбӕл, удта сӕбӕл ӕууӕндунбӕл дзуапп ка дӕттуй, еци хӕйттӕ. Уотемӕй имӕ фӕззиннуй дзӕбӕх ӕнкъарӕнтӕ». Ӕндӕр ӕртасгути гъудимӕ гӕсгӕ ба адӕймаг ӕхцайӕй иннетӕн ку банхус кӕнуй, уӕд ин е фулдӕр цийнӕдзийнадӕ хӕссуй, ӕхебӕл сӕ ку бахарз кӕнуй, уомӕй.

Ескӕд уотӕ тухст адтӕ, ӕма иннетӕн, дӕу куд фӕндуй, уотӕ банхус кӕнун дӕ бон н’ адтӕй? Фал ни алке бон дӕр ӕй ӕхебӕл бавзарун, «рӕдауӕй ка дӕттуй», е куд амондгун фӕууй, уой. Лӕвар хъазар ӕй ӕви нӕ, е сӕйраг  нӕй, фал ӕй цӕхуӕн зӕрдӕй дӕттис, е. Аци брошюрӕ ка уадзуй, уонӕмӕ еу Йегови Ӕвдесӕн нисайнаг рарвиста уӕхӕн пъисмой хӕццӕ: «Берӕ ӕнзти дӕргъи ӕмбурди нисайнагдони мӕ бон берӕ ӕхца гӕлдзун н’ адтӕй». Удта ма бафтудта: «Йеговӕ мин фӕстӕмӕ равардта, ци лӕвардтон, уомӕй берӕ фулдӕр... Арфӕ уин кӕнун, мӕнӕн дӕр уӕхӕн лӕвар кӕнуни фадуат ке ес, уой туххӕй. Е мин хъӕбӕр ӕхцӕуӕн ӕй».

Ке зӕгъун ӕй гъӕуй, иннетӕн нӕ бон айдагъ ӕхцайӕй ӕнхус кӕнун нӕй. Ес ма берӕ ӕндӕр фадуӕттӕ дӕр.

Библий финст ӕй: «Иннети ӕновуд уарзтӕй ка уарзуй, е ӕ уодӕн хуарз кӕнуй, ӕнӕхатир адӕймаг ба ӕхецӕн знаг ӕй» (Ӕмбесӕндтӕ 11:17). Хӕларзӕрдӕ адӕн фӕуунцӕ рӕдау, иннети туххӕй нӕдӕр сӕ рӕстӕг февгъау кӕнунцӕ, нӕдӕр сӕ хъауритӕ, удта банхус кӕнунмӕ алкӕддӕр цӕттӕ фӕуунцӕ. Уотӕ ке кӕнунцӕ, е сӕхецӕн дӕр берӕ цӕмӕйдӕрти ӕнхус кӕнуй, зӕгъӕн, се ’нӕнездзийнадӕ фӕххуӕздӕр уй.

Ахургӕндтӕ куд исбӕрӕг кодтонцӕ, уотемӕй рӕдау адӕн минкъийдӕр сӕйунцӕ, удта сӕмӕ депресси дӕр уотӕ арӕх нӕ фӕууй. Еу загъдӕй, се ’нӕнездзийнадӕ хуӕздӕр фӕууй. Уӕззау незӕй, зӕгъӕн, нервити незӕй (рассеянный склероз) кенӕ ВИЧ-ӕй ка сӕйуй, уонӕй кӕмӕндӕрти, се ’нӕнездзийнадӕ фӕххуӕздӕр уй, иннетӕн ку фенхус кӕнуй, уӕд. Ахургӕндтӕ ма исбӕрӕг кодтонцӕ, ниуӕзти хӕццӕ ка тох кӕнуй, еци адӕн иннетӕн ку фенхус кӕнунцӕ, уӕд син ӕнцондӕр ке фӕууй, удта сӕхемӕ дӕр ке нӕ нийгъосунцӕ.

Уотӕ цӕмӕн ӕй, уой туххӕй кадӕртӕ фӕззӕгъунцӕ, зӕгъгӕ, адӕймаг «тӕрегъӕдгӕнагӕ, рӕдау ӕма хӕларзӕрдӕ ку фӕууй, уӕд ӕ зӕрди лӕгъуз сагъӕстӕн минкъийдӕр бунат фӕууй». Иннетӕн хуарз ка фӕккӕнуй, еци адӕн ӕгӕр нӕ фӕттухсунцӕ, удта сӕ давлени дӕр дӕлӕмӕ-уӕлӕмӕ нӕ фӕккӕнуй. Ӕ цардӕмбал кӕмӕн фӕззиан ӕй, етӕ дӕр иннетӕн ку фенхус кӕнунцӕ, уӕд сӕхе кеми тагъддӕр ӕрцӕунцӕ.

Мадта ма дузӕрдуг кӕнӕ: рӕдау ку уай, уӕд уомӕй дӕхецӕн дӕр ӕнхус кӕнис.

Йесо ӕ фӕдбӕлдзӕугути разӕнгард кодта: «Дӕттетӕ, ӕма уин дӕтдзӕнцӕ. Уӕ рони уин ӕркӕндзӕнцӕ рӕдауӕй, ӕрнӕмдзӕнцӕ ӕй, сцӕгъддзӕнцӕ ӕй ӕма ’й уотӕ байдзаг кӕндзӕнцӕ, ӕма ма си кӕлгӕ дӕр кӕндзӕй. Уомӕн ӕма уӕхуӕдтӕ ци барӕнӕй барайтӕ, уӕхӕн барӕнӕй бардзӕнцӕ сумахӕн дӕр» (Лукай 6:38). Иннетӕн ку ӕнхус кӕнайтӕ, уӕд уи адӕн хъӕбӕр боз уодзӕнцӕ, ӕма уони дӕр, ка ’й зонуй, бафӕндӕуа сумах хузӕн рӕдау ун. Рӕдаудзийнадӕ адӕни кӕрӕдзебӕл бӕттуй ӕма син лимӕнӕй цӕрун ӕнцондӕр фӕууй.

Адӕнӕн кӕрӕдзей хӕццӕ цӕрунмӕ ци ӕнхус кӕнуй, уой ка ӕртасуй, етӕ зӕгъунцӕ, зӕгъгӕ, «адӕнӕн зӕрдиагӕй ка ӕнхус кӕнуй, уонӕмӕ кӕсгӕй иннети дӕр бафӕндуй уотӕ кӕнун». Ӕцӕгӕйдӕр, «кадӕр кӕмӕндӕр дессаги хуарздзийнадӕ ке искодта, уӕхӕн хабӕртти туххӕй адӕн уотид кӕсгӕ ку бакӕнунцӕ, уӕд айдагъ уомӕй дӕр рӕдаудӕр исунцӕ». Бӕрӕггӕнӕнтӕмӕ гӕсгӕ «еунӕг адӕймаги бон ӕй бандавун дӕсгӕй  кенӕ сауӕнгӕ мингай адӕнбӕл дӕр, уотемӕй ба сӕ зонгӕ дӕр нӕ кӕндзӕй». Ӕндӕр дзурдтӕй, еу адӕймаг хуарз гъуддаг ку искӕнуй, уӕд ӕй, гӕнӕн ес, ӕма иннетӕ дӕр бафӕнзонцӕ. Нӕ дӕ фӕндадтайдӕ уӕхӕн адӕни астӕу цӕрун? Адӕнӕн сӕ фулдӕр рӕдау ку уонцӕ, уӕд е алкӕмӕндӕр устур пайда уодзӕй.

Ӕцӕгӕйдӕр уотӕ ке ӕй, е бӕрӕг ӕй, Флориди (АЕШ) ци хабар ӕрцудӕй, уомӕй. Йегови Ӕвдесӕнтӕ ӕнхус кодтонцӕ, тухдунгӕ зиан кӕмӕн ӕрхаста, уонӕн. Се ’мкиристони хӕдзарӕ исрӕвдзӕ кӕнунмӕ син ӕрмӕг кӕд ӕрбаласдзӕнцӕ, уомӕ ӕнгъӕлмӕ кӕсгӕй, фӕууидтонцӕ, ӕ синхонӕн сӕ горен ке рахъан ӕй, ӕма ин загътонцӕ, мах уин ӕй ракӕндзиан, зӕгъгӕ. Фӕстӕдӕр еци синхон Йегови Ӕвдесӕнти сӕйраг хайадӕмӕ ниффинста: «Сӕ хуарздзийнадӕ ми некӕд феронх уодзӕй. Уони хузӕн хуарз адӕн мӕ царди берӕ нӕ фӕууидтон». Хъӕбӕр боз ке адтӕй, уомӕ гӕсгӕ устур нисайнаг равардта, цӕмӕй сӕ бахарз кодтайуонцӕ, куд загъта, уотемӕй, Йегови Ӕвдесӕнтӕ ци дессаги куст кӕнунцӕ, уобӕл.

Ахургӕндтӕ куд исбӕрӕг кодтонцӕ, уомӕ гӕсгӕ «зӕгъӕн ес, ӕма адӕймагӕн ӕ тоги ӕй иннетӕн ӕнхус кӕнун». Уотӕ зӕгъунцӕ, зӕгъгӕ «сувӕллони иннетӕн ӕнхус кӕнун фӕффӕндуй, дзорун дӕр ку нӕма райдайуй, уӕд». Цӕмӕн? Уомӕн дзуапп ес Библий: «Хуцау сфӕлдиста адӕймаги ӕхемӕ гӕсгӕ». Гъома адӕймагмӕ дӕр Хуцауи менеугутӕ ес (Райдайӕн 1:27).

Не Сфӕлдесӕг Йеговӕ Хуцаумӕ ци берӕ дессаги менеугутӕ ес, уонӕй сӕ еу ӕй рӕдаудзийнадӕ. Е нин равардта цард, удта, амондгунӕй цӕрунмӕ цидӕриддӕр гъӕуй, уой (Гъуддӕгтӕ 14:17; 17:26–28). Нӕ уӕларвон Фиди, удта ӕ фӕндони туххӕй нӕ бон ӕй базонун, ӕ Дзурд Библи ку ахур кӕнӕн, уӕд. Еци киунугӕй ма базонӕн ес, Хуцау уобӕл ке батухстӕй, цӕмӕй федӕни дӕр амондгун цард кӕнӕн (1 Иоанни 4:9, 10). Рӕдаудзийнадӕ Йеговӕ Хуцауӕй цӕуй, уомӕн ӕма нӕ ӕхемӕ гӕсгӕ сфӕлдиста. Ӕма дӕмӕ дессаг дӕр ма кӕсӕд, рӕдау ку уай, гъома Хуцауи ку фӕнзай, уӕд е дӕхецӕн дӕр пайда ке уодзӕй ӕма Хуцауи хуарзӕнхӕ дӕр ке иссердзӕнӕ (Дзиуиттӕгтӕмӕ 13:16).

Аци статьяй райдайӕни ке кой кодтан, еци Александри хабар цума цӕбӕл ниллух ӕй? Автобуси ма ке хӕццӕ цудӕй, уонӕй ин сӕ еу загъта, де ’хца, дан, дзӕгъӕли ракалдтай. Фал Александрӕ кӕмӕн банхус кодта, еци нӕлгоймаг е ’мбӕлттӕмӕ бадзурдта, цӕмӕй автобус ци горӕти ӕрлӕудзӕй, уордӕмӕ ӕрцудайуонцӕ, ӕма ин уоми ӕ 20 доллӕри фӕстӕмӕ равардта. Уомӕй уӕлдай ма еци биццеу Александри дзурдмӕ гӕсгӕ Библи ахур кӕнун дӕр райдӕдта. Ӕма Александрӕ куд хъӕбӕр бацийнӕ кодта, ӕртӕ мӕйей фӕсте ибӕл, Йегови Ӕвдесӕнтӕн Перуй китайаг ӕвзагбӕл ци конгресс адтӕй, уоми ку фембалдӕй, уӕд! Еци нӕлгоймаг Александӕй ӕ хуарздзийнади туххӕй уотӕ боз адтӕй, ӕма ин ӕхе дӕр, удта ӕ хӕццӕ конгрессмӕ ка ӕрцудӕй, уони дӕр ӕ ресторанмӕ фӕххудта.

Адӕймаг иннетӕн хуарздзийнадӕ ку фӕккӕнуй, уӕд уомӕй амондгундӕр кӕнуй. Никки амондгундӕр ба фӕууй, иннетӕн Йегови базонунмӕ ку банхус кӕнуй, уӕд, алли хуарздзийнадӕ дӕр кӕмӕй цӕуй, еци Хуцауи (Иакови 1:17). Ду дӕр цийнӕ кӕнис, дӕ рӕдаудзийнади фӕрци ци арфӕдзийнӕдтӕй хайгин дӕ, уонӕбӕл?