Unonan Samuel 16:1-34
16 Say mensahe nen Jehova sumpad si Baasa et sinmabid si Jehu+ ya anak nen Hanani,+ a kuan to:
2 “Imbangon ta ka manlapud dabok tan ginawa ta kan lider na Israel a totook,+ balet ta inalig moy kagagawa nen Jeroboam tan inlagyat mon mankasalanan so Israel a totook kanian sinakitan day liknaan ko ed saray kasalanan da.+
3 Kanian paandien ta ka, O Baasa, tan say sankaabungan mo, tan gawaen koy sankaabungan mo a singa ed sankaabungan nen Jeroboam+ ya anak nen Nebat.
4 Siopaman ed sankaabungan mo, O Baasa, ya ompatey ed syudad et kanen na saray aso; tan siopaman ed sankaabungan mo ya ompatey ed uma et kanen na saray manok.”
5 Saray arum nin agawa ed si Baasa, say kimey to tan say impangipatnag toy inkabiskeg to, et akasulat ed libro na saray agawa diad panaon na arari na Israel.
6 Tan si Baasa et nampainawa la a kaiba na saray inmuunan atateng to tan sikatoy imponpon diad Tirza;+ tan si Elah ya anak to so nagmaliw ya ari a kasalat to.
7 Ontan met, diad panamegley nen propetan Jehu ya anak nen Hanani et sinmabi so mensahe nen Jehova sumpad si Baasa tan ed sankaabungan to, lapud amin a kaugsan a ginawa to diad pakanengneng nen Jehova, a sinakitan toy liknaan To ed saray ginawgawa to tan nagmaliw a singa ed sankaabungan nen Jeroboam, tan lapud sikatoy* pinatey to.+
8 Diad koma-26 a taon na uley nen Arin Asa na Juda, si Elah ya anak nen Baasa et nagmaliw ya ari ed Israel legan a walad Tirza, tan duay taon a nanuley.
9 Tan say lingkor ton si Zimri, a mangidadaulo ed kapalduan grupo na saray karwahe, et akikomplot sumpad sikato legan a walad Tirza tan manbuebuek diad abung nen Arza, a manangasikaso ed sankaabungan na ari diad Tirza.
10 Et linmoob si Zimri tan pinatey toy Elah+ diad koma-27 taon na uley nen Arin Asa na Juda, tan si Zimri so nagmaliw ya ari a kasalat to.
11 Sanen ginmapon nanuley bilang ari, kayurong tod trono to, pinatey to so interon sankaabungan nen Baasa. Anggapoy inkera to anggan sakey a laki,* balanglan kanayon to* odino kaaro to.
12 Kanian inupot nen Zimri so interon sankaabungan nen Baasa, unong ed samay mensahe nen Jehova sumpad si Baasa diad panamegley nen Jehu a propeta.+
13 Agawa iya lapud amin a kasalanan a ginawa nen Baasa tan si Elah ya anak to tan saray kasalanan ya inlagyat dan gawaen na Israel, a sinakitan day liknaan nen Jehova a Dios na Israel diad panamegley na saray andi-kakanaan ya idolo ra.+
14 Tan saray arum nin agawa ed si Elah, say amin a kimey to, et akasulat ed libro na saray agawa diad panaon na arari na Israel.
15 Diad koma-27 taon na uley nen Arin Asa na Juda, si Zimri et nagmaliw ya ari diad loob na pitoy agew ed Tirza legan a mankakampo iray sundalo pian milaban ed Gibeton,+ a sakop na saray Filisteo.
16 Et oniay nadngelan na saray sundalon mankakampo: “Akikomplot si Zimri tan pinatey toy ari.” Kanian diad saman ya agew ed kampo, si Omri+ a pangulo na armada et ginawa na interon Israel ya ari ra.
17 Si Omri tan say interon Israel a kaiba to et tinmatdang manlapud Gibeton tan kinubkob day Tirza.
18 Sanen anengneng nen Zimri ya asakop da lay syudad, sikatoy linmoob ed malet a tori diad abung* na ari tan pinoolan toy abung legan a walad loob, kanian inatey.+
19 Agawa iya lapud saray kasalanan to diad impanggawa toy mauges ed pakanengneng nen Jehova, ya inalig toy kagagawa nen Jeroboam tan say kasalanan ya inlagyat ton gawaen na Israel.+
20 Tan saray arum nin agawa ed si Zimri tan say nipaakar ed impikomplot to et akasulat ed libro na saray agawa diad panaon na arari na Israel.
21 Diad saman, saray totood Israel et naapag ed duaran grupo. Say sakey a grupo et sinmuporta ed si Tibni ya anak nen Ginat ta labay dan gawaen ya ari, tan samay sakey a grupo et sinmuporta ed si Omri.
22 Balet saramay sinmuportad si Omri et tinalo da iramay sinmuportad si Tibni ya anak nen Ginat. Kanian inatey si Tibni, tan si Omri so nagmaliw ya ari.
23 Diad koma-31 a taon na uley nen Arin Asa na Juda, si Omri et nagmaliw ya ari ed Israel, tan 12 taon a nanuley. Sikatoy anem taon a nanuley legan a walad Tirza.
24 Et sinaliw to na duaran talento* a pilak ed kinen Semer so palandey na Samaria, tan nampaalagey ditan na syudad. Nginaranan to itan na Samaria,*+ ya intumbok to ed ngaran nen Semer ya akanggawa* ed palandey.
25 Si Omri et nantultuloy a nanggaway mauges ed pakanengneng nen Jehova, tan sikatoy mas mauges nen say amin ya akaunad sikato.+
26 Inalig to so amin a kagagawa nen Jeroboam ya anak nen Nebat tan say kasalanan ya inlagyat ton gawaen na Israel, a sinakitan day liknaan nen Jehova a Dios na Israel diad panamegley na saray andi-kakanaan ya idolo ra.+
27 Tan saray arum nin agawa ed si Omri, say kimey to tan say impangipatnag toy inkabiskeg to, et akasulat ed libro na saray agawa diad panaon na arari na Israel.
28 Tan si Omri et nampainawa la a kaiba na saray inmuunan atateng to tan sikatoy imponpon diad Samaria; tan si Ahab+ ya anak to so nagmaliw ya ari a kasalat to.
29 Si Ahab ya anak nen Omri so nagmaliw ya ari ed Israel diad koma-38 taon na uley nen Arin Asa na Juda, tan sikatoy 22 taon a nanuley ed Israel legan a walad Samaria.+
30 Diad pakanengneng nen Jehova, si Ahab ya anak nen Omri et mas mauges nen say amin ya akaunad sikato.+
31 Impasen ton melag labat a bengatla so pangalig ed saray kasalanan nen Jeroboam+ ya anak nen Nebat, tan inasawa to met si Jezebel+ ya anak nen Etbaal ya ari na saray Sidonio+ tan ginmapon nanlingkor tan dinmakmomo ed si Baal.+
32 Ontan met, inggawaan toy altar si Baal diad abung* nen Baal+ ya impaalagey tod Samaria.
33 Nanggawa met si Ahab na sagradon poste.*+ Mas alabas ni ginawa to pian sakitan so liknaan nen Jehova a Dios na Israel nen say ginawa na amin ya arari na Israel ya akaunad sikato.
34 Diad panaon to et impaalagey lamet nen Hiel a taga Bethel so Jerico. Inletneg toy pundasyon na satan bilang kasalat na bilay nen Abiram a panguloan ya anak to, tan inyan to ray puerta na satan bilang kasalat na bilay nen Segub a bolirek ya anak to, unong ed imbaga nen Jehova diad panamegley nen Josue ya anak nen Nun.+
Paimanod leksab
^ Salanti, si Nadab ya anak nen Jeroboam.
^ Literal, “siopaman a manisirit ed padir.” Sakey a Hebreon balikas a panmudmora ya ontutukoy ed saray lalaki.
^ Odino “manangibales na dala to.”
^ Odino “palasyo.”
^ Say sakey a talento et 34.2 kilo. Nengnengen so Apendise B14.
^ Kabaliksan toy “Kayarian na Boleg nen Semer.”
^ Literal, “katawan.”
^ Odino “templo.”
