Onmemelag so Dead Sea na manga sakey metro kada taon. Natatakot so arum ya ompan naekatan la itan kasabi 2050. Manaanap na solusyon so gobierno tan say sakey ya naisip da et say pangekal na asin ed danum na Red Sea pian nainum na totoo, insan say natilak ya maasin a danum et ipadalan dad tubo paarap ed Dead Sea. Naaaburido balet so arum ed satan ya plano ta ompan naderal so nikadkaduman ecosystem na Dead Sea.

Unong ed impan-survey na sakey ya insurance company, mas dakel na manga 33 porsiento so naoospital lapud atakid puso no Krismas, komparad arum ya agew ed interon taon. Imbaga na kompanya ya mas nai-stress iray totoo ed pamipili day regalo tan diad pansasagpot dan iter so alabas iran iilaloan na kapamilya tan kakaaro da.

Impaamta na saray scientist ya tagad Britain ya samay lukan ya nalmod Iceland, ya say amta ra et 405 so taon to, et 507 taon la manaya nen inatey nen 2006. Saya so ayep * ya sankarukeyan so impanbilay to. Inatey so lukan nen in-freezer na saray researcher pian naawit dad laboratoryo da.

Diad miting ya agawa ed Havana, Cuba nen Enero 2014, indeklara na 33 ya bansan membro na Community of Latin American and Caribbean States ya saray bansa da et ‘peace zone’ diad impipakna dan ayosen da ray problema ya agmanlalaban. Wadman met so Secretary General na United Nations ya si Ban Ki-moon.