“Kico cu boso pidi e Tata den mi nomber, lo e duna boso.”​—Juan 16:23.

Hesus su palabranan ta mustra nos cu Jehova no kier pa nos haci oracion na dje pa medio di imagen, santo, angel of na nos defuntonan. E kier pa nos haci nos oracion den nomber di Hesucristo. Ora nos haci esey, nos ta mustra cu nos ta compronde cu Dios ta scucha nos oracionnan danki na e sacrificio di Hesus. Hesus a bisa: “Ningun hende no ta yega cerca e Tata si no ta pa medio di mi.”—Juan 14:6.

“Desahoga boso curason dilanti dje.”​—Salmo 62:8.

Ora nos haci oracion na Jehova, nos mester papia cu ne manera nos lo papia cu un tata cu ta stima nos di berdad. En bes di lesa oracion for di un buki of ripitie for di cabes, nos mester papia cu Dios cu respet y di curason.

“Kico cu nos pidie cu ta di acuerdo cu su boluntad, e ta tende nos.”​—1 Juan 5:14.

Den Bijbel, Jehova Dios ta bisa nos kico e lo haci pa nos y kico e kier pa nos haci p’e. Dios kier pa nos haci oracion “di acuerdo cu su boluntad.” Pero pa nos siña conoce Dios bon, nos tin cu studia Bijbel. Si nos haci esey, nos oracionnan lo ser scucha.

Bo Por Pidi pa Loke Bo Tin Mester. Nos por pidi Dios den oracion pa, por ehempel, cuminda, paña y un luga pa biba. Nos por pidi tambe pa sabiduria pa tuma bon decision y forsa pa soporta pruebanan. Nos por haci oracion pa haya fe, pordon y yudansa di Dios.—Lucas 11:3, 4, 13; Santiago 1:5, 17.

Bo Por Pidi pa Otro. Mayornan cu ta stima nan yiunan ta keda contento ora nan yiunan ta stima otro. Nos tur ta yiunan di Jehova y e tambe kier pa nos stima y mustra interes den otro. Ta bon pa haci oracion pa nos casa, nos yiunan, nos famia y amigonan. Discipel Santiago a skirbi: “Haci oracion pa otro.”—Santiago 5:16.

Bo Por Bisa Danki. Bijbel ta bisa tocante nos Creador: “El a haci bon, dunando boso awasero for di cielo y tempo di bon cosecha, y asina a laga boso haya cuminda na abundancia y a yena boso curason cu alegria.” (Echonan 14:17) Ora nos pensa riba tur loke Dios a haci pa nos, nos ta sinti nos motiva pa bis’e danki. Claro, nos mester mustra cu nos ta agradecido na Dios door di obedec’e.—Colosensenan 3:15.

Tin biaha nos ta sinti tristo pasobra nos no ta haya contesta pa nos oracionnan di biaha. Acaso esey kiermen cu Dios no ta worry cu nos? Claro cu no! Ban wak algun ehempel cu ta mustra cu ta importante pa sigui haci oracion.

Steve, kende nos a menciona caba, a bisa: “Si mi no a sigui haci oracion, mi lo a pensa cu nunca mas mi lo ta feliz.” Kico a yud’e cambia? El a cuminsa studia Bijbel y a siña dicon nos mester sigui haci oracion. Steve a bisa: “Mi ta haci oracion na Dios pa bis’e danki pa tur e amor y sosten cu mi a ricibi for di mi bon amigonan. Awor si mi ta sinti mi feliz.”

Un otro ehempel ta Jenny, kende a sinti cu e no ta merece pa Dios scucha su oracionnan. El a bisa: “Ora mi a sinti cu mi no ta bal nada, mi a suplica Dios pa yuda mi compronde pakico mi tabata sinti asina.” Con esey a yud’e? Jenny ta sigui conta: “Ora mi papia cu Dios, esey ta yuda mi mira mi mes manera e ta mira mi. Hasta ora mi ta sinti cu mi no ta bal nada, Dios si no ta pensa asina. Oracion ta yuda mi pa no entrega y pa mi sigui lucha.” Kico ta e resultado? Jenny a bisa: “Oracion a yuda mi mira Jehova Dios como un persona real, manera un Tata y Amigo cu ta stima mi. E semper t’ey pa yuda mi. Claro, mi tin cu sigui haci su boluntad si.”

Laga nos considera tambe e experencia di Isabel. Ora el a sali na estado, su dokter a bis’e cu su yiu lo nace cu un limitacion fisico severo. E noticia ey a kibr’e. Algun hende a hasta conseh’e pa haci abortus. Isabel a conta: “M’a sinti cu mi ta bay muri.” Kico el a haci? El a bisa: “Mi a resa bes tras bes y pidi Dios pa yuda mi.” Cu tempo, el a haya un yiu homber. E yama Gerard. Gerard tin un limitacion fisico. Bo ta kere cu Isabel a sinti cu Dios a contesta su oracion? Claro cu si! Den ki manera? Isabel a bisa: “Awor mi yiu Gerard tin 14 aña. E ta e bendicion di mas grandi cu mi tin. Nos ta mira con nos yiu ta disfruta di bida a pesar di su limitacion fisico. Mi a realisa cu mi yiu ta e mihor contesta pa mi oracionnan.”

E palabranan sincero aki ta pone nos pensa riba loke e salmista a bisa di Jehova: “Bo a tende e deseo di e humildenan; abo lo fortifica nan curason, abo lo inclina bo horea.” (Salmo 10:17) Esey ta bon motibo pa sigui haci oracion, no ta asina?

Den Bijbel nos ta haya varios oracion di Hesus. Esun di mas conoci ta esun cu el a siña su discipelnan. Kico nos por siña for di e oracion ey?