NAN ta bisa ku e ta e orashon kristian ku mas hende ta hasi na mundu. Sea ku esei ta bèrdat òf nò, e meta di Hesus su orashon modelo, esta, e Orashon di Nos Tata, sin duda ta entre esnan mas mal interpretá. Tur dia miónes di hende ta ripitié for di kabes, kisas asta vários bes pa dia. Pero no tabata Hesus su intenshon pa hende resa di e forma ei. Kon nos por sa?

Djis promé ku Hesus a menshoná e orashon ei, el a bisa: “Ora bo ta hasi orashon, no keda ripití palabranan.” (Mateo 6:7) Esei ke men ku Hesus a kontradisí su mes na momento ku el a laga registrá e orashon modelo? Klaru ku nò. Mas bien, Hesus a siña nos kiko nos por pidi den orashon, i el a duna nos un par di prioridat ku nos mester tene kuenta kuné ora nos ta hasi orashon. Laga nos analisá loke el a bisa den e orashon akí na Mateo 6:​9-13.

Di e manera ei Hesus a rekordá su siguidónan ku mester dirigí tur orashon na su Tata, Yehova. Pero bo sa dikon Dios su nòmber ta asina importante i dikon mester santifik’é?

Desde komienso di historia, nan a usa mentira pa susha e nòmber sagrado di Dios. Dios su atversario, Satanas, a insinuá ku Yehova ta un Gobernante mentiroso i egoista ku no tin derecho pa goberná Su kreashon. (Génesis 3:​1-6) Hopi hende a bai di akuerdo ku Satanas, i nan ta siña otronan ku Dios ta un Dios friu, kruel i vengativo òf nan ta nenga ku E ta e Kreador. Tin otronan ku asta a lansa un atake kontra Dios su nòmber, i a saka e nòmber Yehova for di tradukshonnan di Beibel i a prohibí hende di us’é.

Beibel ta mustra ku Dios lo korigí tur e inhustisianan akí. (Ezekiel 39:7) Ora e hasi esei, e ta satisfasé tur bo nesesidatnan i solushoná tur bo problemanan tambe. Kon asina? E siguiente palabranan di Hesus su orashon ta duna nos e kontesta.

Awendia, tin hopi konfushon entre maestronan religioso tokante e Reino di Dios. Pero manera Hesus su oyentenan tabata sa, Dios su profetanan a bisa hopi tempu di antemano ku e Mesias, un Salbador ku Dios a skohe, lo bira rei di un Reino ku lo  kambia mundu. (Isaias 9:​6, 7; Daniel 2:44) Lo e santifiká Dios su nòmber ora ku e eksponé e mentiranan di Satanas i despues destruí Satanas i tur su obranan. E Reino di Dios lo pone un fin na guera, malesa, hamber, i asta na morto. (Salmo 46:9; 72:​12-16; Isaias 25:8; 33:24) Ora bo pidi pa e Reino di Dios bini, bo ta pidi pa tur e promesanan akí bira realidat.

Hesus su palabranan ta indiká ku mes sigur ku Dios su boluntat ta kumpli den shelu, kaminda Dios ta biba, su boluntat lo kumpli na tera tambe. Ningun persona por a stroba Dios di kumpli ku su boluntat den shelu; einan, Dios su Yu a bringa kontra Satanas i su kompinchinan, i a tira nan abou na tera. (Revelashon 12:​9-12) E di tres petishon akí di e orashon modelo, meskos ku e promé dosnan, ta yuda nos pa keda enfoká riba loke ta mas importante: no nos boluntat, sino Dios su boluntat. Ta su boluntat semper ta hasi henter su kreashon felis. Asta e hòmber perfekto Hesus a bisa su Tata pa laga “no mi boluntat, ma di bo sosodé.”​—Lukas 22:42.

Ku esaki Hesus a mustra ku nos por hasi orashon tambe tokante nos nesesidatnan personal. Pues, no tin nada malu den hasi orashon na Dios tokante nos nesesidatnan di tur dia. En realidat, ora nos hasi esei, nos ta keda kòrda ku ta Yehova ta esun ku “ta duna tur hende bida i rosea i tur kos.” (Echonan 17:25) Beibel ta mustra ku e ta un tata amoroso ku ta sinti goso den duna su yunan loke nan tin mester. Pero, meskos ku un bon tata, lo e no kumpli ku e petishonnan ku no ta na nan bienestar.

Di bèrdat nos debe Dios? Nos mester di su pordon? Hopi hende awendia no ta komprondé mas kiko piká ta i ku e ta algu hopi serio. Pero Beibel ta siña nos ku piká ta e rais di nos problemanan di mas serio, pasobra esaki básikamente a kousa morto di hende. Debí ku nos tur a nase pekadó, nos ta peka frekuentemente, i nos úniko speransa pa un futuro duradero ta dependé di Dios su pordon. (Romanonan 3:23; 5:12; 6:23) Ta un alivio pa sa ku Beibel ta bisa: “Abo, Señor, ta bon, i kla pa pordoná.”​—Salmo 86:5.

Bo ta konsiente kon urgente i importante ta pa bo haña Dios su protekshon? Hopi hende no ke kere ku Satanas, “e malbado,” ta eksistí. Pero Hesus a siña hende ku Satanas ta un persona real, asta el a yam’é “prens di e mundu akí.” (Juan 12:31; 16:11) Satanas a korumpí e mundu ku e tin den su gara, i e ke korumpí abo tambe pa bo no forma un relashon íntimo ku bo Tata, Yehova. (1 Pedro 5:8) Sinembargo, Yehova ta hopi mas poderoso ku Satanas i ta un plaser pa E protehá esnan ku ta stim’é.

E resúmen kòrtiku akí di e puntonan prinsipal di Hesus su orashon modelo no ta kubri tur e kosnan ku nos por pidi den orashon. Kòrda, 1 Juan 5:14 ta bisa nos tokante Dios: “Si nos pidi kualke kos konforme su boluntat, e ta tende nos.” (Lèter skùin ta di nos.) Pues no pensa ku bo problemanan ta muchu insignifikante pa menshoná den orashon.​—1 Pedro 5:7.

Pero, kiko di e ora i lugá? Ta importá unda i ki ora nos ta hasi orashon?