“NGSEBECHEL a bas el merael engdi ngika el chad er a Sina a di kiei!” A Alexandra a rirengesii tia el tekoi er a ledengchokl er a bas, el mengiil el mo imuul er a ta er a beluu er a South America el mo er a tang. Me ngmlo metengel e milsa ta el chad er a Sina el ousbech a sesei el klemedengei er ngii er a tekoi er a Sebangiol el mesaod er a tekoi el dilubech el mo er ngii el mo er a bulis el oungerachel aika el basio. A Alexandra a mle teloi er a ongdibel er a Resioning er a Jehovah el tekoi er a Sina me ngkilengei el mo oliuid a tekingel ngii el chad.

Ngii el chad er a Sina a dilu el kmo ngmle legal resident engdi ngar er ngii a chad el mla ruchorech a babilengel me a ududel. Ngika el bulis a dimlak loumerang er ngii er a kot e dirrek el ulemdasu el kmo a Alexandra a mle teloi er a ureor el olterau er a rechad el mo sibai. Nguaisei, engdi uriul e ngika el bulis a mlo oumerang a tekingel ngika el chad er a Sina, engdi ngdirk mle kirel el harau a blals e le ngdimlak a babier el lolab. Ngdimlak a ududel me a Alexandra a milsang a 20 el kluk. Ngika el chad a kmal mlo ungil a rengul me ngdilu er a Alexandra el kmo ngmo msang a kuk klou er a 20 el kluk. Me a Alexandra a millekoi er ngii el kmo ngdimlak losiik a mo omeksullel, e ngbai mle soal el olengeseu e le ngmle melemalt el tekoi. Ngmilsa ngika el chad a bebil el babier el mlengai er a Biblia e dilu er ngii me bo losuub a Biblia el obengterir a Resioning er a Jehovah.

Ngkmal ungil a rengud sel derenges a chouaika el omeruul el mocholt el mo er a rechad el diak dodengelterir. Ngulterekokl a rechad er a rokui el klechelid me tirke el diak a klechelid er tir a meruul el uaisei. Kau ke kongei el mo meruul er a chouaisei el tekoi? Kede semeriar er tia el ker e le Jesus a dilu el kmo: “Ng bai klou el deurreng a dorous er a dolai.” (Rellir 20:35) Ngdirrek el ngar er a tekoi er a science, e a remesuub a tekoi a mla metik el kmo a dorous e ngungil el kired. Ka me bo dosaod er tiang.

A betok el tekoi el mla duubech a olecholt el kmo a deurreng me a dorous a blechoel el dmak el oureor. A apostol el Paulus a milluches el kmo a “Dios a betik a rengul er ngikel dmeu a rengul el melenget.” Ngmillekoi el kirir a Rekristiano el tir a millenget el mo olengeseu er a rekldemir er a klaumerang. (2 Korinth 8:4; 9:7, BT) Me a Paulus a dimlak lolekoi el kmo te mirrous e le tir el mle dmeu a rengrir. E ngbai dilu el kmo te mle dmeu a rengrir e le tir el mirrous.

Nguaisei, a doltirakl er a ta er a omesuub, e a dorous a “ngar ngii a lerellii er a no er a bdelud el kirel a deuil a rengud, me a deleuill er kid me a rebebil, me a klaumerang er kid er a rechad el ngii a omotech er a reng.” A lmuut el ta er a omesuub a melekoi el kmo “ngmo klou a deuil a rengul a chad sel lenguu a udoud el msa ta er a chad er a bai lousbech er ngii el kirel.”

Ngmla ta el molatk el kmo, a blekerdelel a klengar er kau a uchul me ngdiak a kmal sebechem el meruul er ngii? A mera er ngii, kid el rokui a sebeched el  mo melechesuar a deurreng sel ‘le deu a rengud el melenget.’ Sel lungil a moktek er kid, e ngdiak el klou a belkul a klungel a udoud. A ta el Sioning er a Jehovah a milluches el mo er tirke el uleltobed er tia el babier el kmo: “Ngdimlak a kmal sebechek el melenget er ngii er a Blil a Ongdibel er aika el mereko el rak. Engdi a Jehovah el Dios a mla meskak a kuk betok er aike el kbilsang. . . . Kom kmal mesaul er tia el techall el sebechek el melenget. Ngmeskak a deurreng.”

Nguaisei engdi omerous a diak di lolutk el kirel a udoud e lemerekong. Ngar er ngii a lmuut el bebil er a rolel e ngsebeched el merous.

A Biblia a kmo: “A chad el bekokuii a ngar ngii a klungiolel er ngii, e ngdi chad el meringel a tekingel a di ngii el melemall er ngii.” (Osisechakl 11:17) A rebekokuii el chad a bekururau e kongei el mengoit a temir me a klisichel a bedengir me a bltkil a rengrir el kirir a rebebil. A chouaitia el rolel a klengar a mo uchul a klungiolir, e a ta er ngii el klungiaol a ungil er a klisichel a bedengir.

A omesuub a ochotii el kmo, tirke el melenget a temir el olengeseu er a rebebil a diak a kmal ringelel a bedengir e diak leblechoel mo mechitechut a rengrir. Te bai kmal mesisiich a bedengir. Tirke el ngar er ngii a meringel el secherir el ua multiple sclerosis me a lechub e ng HIV a dirrek el mo mesisiich a bedengir sel lorous. Ngdirrek el mla mocholt el kmo tirke el mle chad er omelim el rrom el melenget a temir el olengeseu er a rebebil a diak leblechoel el mo mechitechut a rengrir e dirrek el kekerei a techellir el lmuut el mo melim a rrom.

Tiang a uaisei e le “uldasu el kirel a klechubechub, me a blekerurau, me a blekokuii a rullii a chad el mo diak lolatk a uldasu el mengitechut.” A omerous a dirrek el sebechel rullii a chad el mo diak leblechoel el ouedikel a rengul e mo er iou a blood pressure er ngii. Ngdirrek, tirke el mlad a becherir a mereched el mo mechelaod a rengrir sel sekum e te mo olengeseu er a rebebil.

Me ngulterekokl el kmo a omerous a mo ungil el kirem.

A Jesus a milengelechel er a rultirakl er ngii el kmo: “Bo bekerurau el mor a re chad ma Dios bo le bekerurau el ekor kemiu. Ng ulterekokl el kmal mo bekerurau el ekor kemiu me ng mo oitel a ikel lomeskemiu el mor sel cherrungel el telkelel a sebechiu el ngmai. Ele sel olkael el mousbech er ngii el kirir a re chad isei a bo lousbech er ngii a Dios el kiriu.” (Lukas 6:38) Me sel morous e a rechad a mo oba omereng el saul e mo bekururau. Me a omerous a melisiich er a kltarreng me a ungil deleuill.

Tirke el mesuub a deleuill er a rechad a miltebengii el kmo, “tirke el blechoel el meruul a ungil el kirir a rechad a rulleterir a rechad el mo meruul er a osisiu el tekoi.” Nguaisei, “a donguiu el kirel a mengasireng el olechotel a blekokuii a rulleterir a rechad el mo bekururau.” Me a doltirakl er a ta er a omesuub, “e a derta el chad el ngar er a ta el network a ngar er ngii a lerellii er a rebetok el chad, el bebil er tir a diak el kaodengei.” Me a ta el olechotel a blekururau a sebechel el rulleterir a rederta el  chad el ngar er a ta el basio el mo meruul er a osisiu el tekoi. Kau ngsoam el kiei er a chouaisei el basio? Nguaisei, ngmo uchul a klou el klungiaol a lsekum a rebetok el chad a mo bekururau.

A ta el olechotel tia el tekoi a mla er ngii er a beluu er a Florida el ngar er a beluu er a Merikel. A rebebil el Sioning er a Jehovah a ullengeseu er a rudam er tir el miltemall a belurir er a mesisiich el eolt. Me sera longiil a klekedellel tia el blai el kirir el omekbeches er ngii, e te milsa blil a ta el tonari el mla metemall a fence er ngii, me te kilengei el mo meruul er ngii. Ngii el tonari a uriul e ngmilluches el mo er sel klou el obis er a Resioning er a Jehovah e dilu el kmo: “Ak mera el oba klou el omereng el saul. Te ta er tirke kot el ungil a blekerdelir el chad el kudengelterir.” A omereng el saul er ngii a uchul me nguldurokl a udoud el mo olengeseu er a urerir a Resioning er a Jehovah el lulsaod er ngii el kmo ngkmal mengasireng.

A omesuub er a science a mla metik el kmo, “a rechad a ulebeob el sorir el olengeseu er a rebebil.” Ngdirrek el melekoi el kmo, “a rengalek a meruul a ungil el mo er a rebebil er a uchei er a bo lomuchel el mengedecheduch.” E ngera uchul? A Biblia a onger el kmo, a rechad a ulebeob el “okesiul a Dios” me te olab a blekerdelel.​—Genesis 1:27.

A ta er aika el mengasireng el blekerdelel a Jehovah el Dios el Ngike el Milebid, a blekururau. Ngii a uchul a klengar er kid me a rokui el tekoi el meskid a deurreng. (Rellir 14:17; 17:26-28) Ngsebeched el mo medengelii a Demad el ngar er a eanged me a moktek er ngii el kired el oeak a omesubed er a Tekingel el Biblia. Tia el babier a dirrek el ouchais el kmo a Dios a mla kutmokl a tekoi el mo uchul a deuil a rengud er a ngar medad el taem. * (1 Johanes 4:9, 10) Me a Jehovah a bekururau e kid a ulebeob el okesiul a uchul, me sel doukerebai er Ngii el mo bekururau, e ngungil el kired e dirrek el mo uchul a deuil a rengul.​—Hebru 13:16.

Ke dirk melatk er a Alexandra, el dulsaod er ngii er a uchei? Me ngera dilubech el mo er ngii? Me alta ta er a chad el ulebengterir el ngar er a bas a dilu er a Alexandra el kmo ngdi mle song er a ududel, engdi ngika el chad er a Sina a miltik er a resechelil el mla er sel basio el bo el stob er ngii a bas, me te di mle mereched el msa ududel. Ngike el chad er a Sina a dirrek el riruul aike el ledilu er ngii a Alexandra e mlo omuchel el mesuub er a Biblia. Me ngkmal mle dmeu a rengul a Alexandra er a lluut el mesang er a uriul er a edei el buil er a klou el ongdibel er a Resioning er a Jehovah el tekoi er a Sina er a beluu er a Peru. Me ngika el chad a uluuetkeu er a Alexandra me tirke el ulebengkel el mo omengur er a blil a blengur er ngii el olechotel a omereng el saul el mo er ngii.

A dorous e dolengeseu er a rebebil e ngmo uchul a klou el deurreng. Nglmuut el mo klou a deuil a rengud a lsekum e ngmo sebeched el ngosuterir a rechad el mo medengelii a Jehovah el Dios, el Ngike el Uchul a rokui el ungil el tekoi! (Jakobus 1:17) Kau ke oldeu a rengum er a klungiaol el mngai e le kau el merous?