A KMAL ileakl el sengk a kirel rullid el mo olecholt er a omereng el saul. A Jesus a ulechotii a klungel a ultutelel tiang er a uriul er a lomekungil er a reteruich el chad el silecher er a kmal mekngit el rakt el dimlak a kerul er seikid el taem. A ta er tirka el chad a mlo “klou a ngerel el oldanges er a Dios.” Me a Jesus a dilu el kmo: “Te mle truich el chad a mo ungil; te ngar ker tirkel tetiu?” (Lukas 17:12-17) Ngera klubeled er tiang? Ngkmal beot er kid a obes a sulir a rechad el me er kid!

Ngdiak a mo uai a olubet e le ngkot el ngarbab er a rokui el sengk. Me a leuaisei, e ngera ke mo rullii el kirel tia el tekoi el Dios a mla kutmeklii el kirem?

• Bo modengelii Ngike el Uchul tia el sengk. Alta e ngmla meketmokl a olubet engdi tia diak el belkul a kmo kede rokui el mo kiei el diak a ulebengelel. Ngar er a nglunguchel a Jesus e ngdilu el kmo: “A diak a ulebengelel klengar a belkul a kmo, bo lodengelkau el di ta el meral Dios, e bo lodengelii a Jesus Kristus el ngikel mulderchii el mei.” (Johanes 17:3) A lsekum a chad a dilu er kau el kmo ngmla er ngii a ulsebelii a klengar er kau er a omkekerei, e ngdiak el soam el mo medengei el kmo ngika ngtecha el chad e ngera uchul me ngulsebelii a klengar er kau? A Jehovah el ngii a uchul a olubet a soal a obo modengelii e lebo er ngii a deleongel er kau  el obengkel. A Biblia a kmo: “Molekeed er kemiu er a Dios, me bo lekeed er kemiu.”​—Jakobus 4:8.

• Molecholt er a klaumerang el kirel a olubet. “Ngikel oumera er a Ngalek oba diak a ulebengelel klengar.” (Johanes 3:36) Ngmekerang a omolecholt er a klaumerang? Ngkirel mocholt el ngar er a omeruul. (Jakobus 2:17) Ngua ngera el omeruul? A sengk a mo kloklem a lsekum e ke kongei el nguu. Me ngkirem el kongei er a olubet. Ngoeak a ngera el rolel? Mosuub el kmo ngua ngera el rolel a klengar a lekengei er ngii a Dios, e motireklii. * Moluluuch el mo er a Dios me lousubes a kngtim e bo leklikiid a ukltkem. E bo lulterekokl a rengum el kmo tirke el rokui el oumerang er a olubet a mo kiei el diak ulebengelel el ngar er a budech, me a ulekerreu, e mo ungilbesul a klengar er tir!​—Hebru 11:1.

• Bo er a Chedaol Belsoil er a kodellel a Jesus. A Jesus a kiltmeklii a tekoi el mo omeklatk er kid el kirel a olubet el tenget. Me a losaod el kirel a Chedaol Belsoil, e ngdilu el kmo: “Moruul er ngii el kirel omeltkiu er ngak.” (Lukas 22:19) A Resioning er a Jehovah a mo mengedaol er a kodellel a Jesus er a April 11, 2017 el ngii a Ongeru el Ureor er a uriul er a ngeltel a sils. Tia el ta el sikang el prokuram a mo mesaod er a belkul a kodellel a Jesus me a rolel e ngmo uchul a klungiaol er chelechang me a ngar medad. Tia el mlo merek el rak e te mle bekord el 20 el miliol el chad a dilak el mengedaol er tia el sils. Aki kmal outkeu er kau el me teloi er kemam el olecholt a omereng el saul el kirel tia el kot el ngarbab el sengk el mla er a Dios.