A rebetok el miliol el meliuekl er a beluulechad a oumerang el kmo, a Kurismas a tanziobi er a Jesus Kristus. Engdi kau, ngmla ta el molatk er tirke el mle kot el Kristiano el tir a kmal mle kmeed er a Jesus el kmo te milengedaol er a Kurismas me a lechub e ngdiak? E dirrek, kau ke medengei a omesodel a Biblia el kirel a tanziobi? Sel bo dodengei a nger er aika el ker, e kede dirrek el mo medengei el kmo a Rekristiano ngkirir el mengedaol er a Kurismas, me a lechub e ngdiak.

Me a kot, e a Biblia a diak ta el losaod a omeruul el tanziobi el kirel a Jesus, me a lechub e ngii di el chad el mle blak a rengul mesiou er a Dios. Ngbai ngar er ngii a Bades el mesaod er a reteru el chad el mirruul a tanziobi er tir, e tirkang a dimlak longull er a Jehovah el Dios el ngii a oubabier er a Biblia. E aika el eru el tanziobi a mlo uchul a mekngit el tekoi. (Genesis 40:20; Markus 6:21) E a doltirakl er a Encyclopædia Britannica, e tirke el Kristiano er a irechar a ulemtok a ngii di el “siukang el kirel a omengedolel a tanziobi.”

A Biblia a diak losaod el kmo ngoingerang e ngmilechell a Jesus. A McClintock me a Strong’s Cyclopedia a mesaod el kmo: “A sils er a cherellel a Kristus a diak el sebeched el metik er ngii er a N[ew] T[estament] me a lechub, e ngii di el ker.” Me a lsekum a Jesus a mle soal a rultirakl er ngii a bo longedaol er a tanziobi er ngii, e ngulterekokl el rirellii a kmung ngerang me bo el sebechir el mo medengelii a sils er a cherellel.

A ongerung, e a Biblia a diak losaod el kmo a Jesus me a lechub a ngii di el apostol er ngii a milengedaol er a Kurismas. E a doltirakl er a New Catholic Encyclopedia, e a omengedolel a Kurismas a mle kot losaod er ngii “el ngar a Chronograph er a Philocalus, el Roman almanac el lengilai aika el tekoi er ngii el mileketmokl er a 336 [C.E.].” Me ngbleketakl el kmo ngmle uriul er a lemecherrungel a Biblia, me a lmuut el betok el rak er a uriul er a lengar tia el chutem a Jesus. A McClintock me a Strong a melekoi el kmo, “a omengedolel a Kurismas a dimlak el meketmokl lokiu a Dios, me a lechub e lemlengai er a N[ew] T[estament.” *

A Jesus el kmal Ungil Sensei a milsterir a rultirakl er ngii a bleketakl el ulekrael el kirel aike el soal el bo loruul, e aikang a llechukl er a Biblia. E a omengedolel a Kurismas a diak luldimukl er ngii. El di ua sensei er a skuul el diak el soal a rengalek er a skuul a loruul a tekoi el engelakl er a ulekrael el mloterekokl er tir, me ngdi osisiu, a Jesus a kmal diak el soal a rultirakl er ngii a bo ‘lengelakl er a llechukl el rolel a tekoi’ el llechukl er a Chedaol Biblia.​—1 Korinth 4:6.

Me a lmuut el tang, ngar er ngii a chimo el klou a ultutelel el tekoi el ble lodengelii a Rekristiano er a irechar el ngii a omengedolel a kodellel a Jesus. A Jesus a ulechotii er a redisaiplo a temel e te mo mengedaol er a kodellel, e dirrek lulechotii er tir a rolel e te meruul er ngii. Me aika el bleketakl el ulekrael me a ulterekokl el sils er a kodellel a llechukl er a chelsel a Biblia.​—Lukas 22:19; 1 Korinth 11:25.

Me chelechang e kede mla suubii el kmo a Kurismas a omengedolel a tanziobi, e a Rekristiano er a irechar a dimlak loltirakl er tia el klsuul el rolel a omengull. Me a lmuut el tang, a Biblia a diak a ta el losaod el kmo a Jesus me a lechub a ngii di el chad a milengedaol er a Kurismas. Me ngokiu aikang, e a rebetok el miliol el Kristiano el meliuekl er a beluulechad a mla oterekeklii el kmo a Rekristiano a diak longedaol er a Kurismas.