Teytakunaqa wamrankuna allita rurayänampaqmi willapäyänan. Y hörataqa hasta piñapäyänanmi. Tsënö kaptimpis, allikunata rurayänampaqpis yachatsiyänanmi, tsënö rurayaptinqa wamrankuna manam pantayanqatsu.

Kanan witsan teytakunaqa, wamrankunata llakitsita mantsarmi piñapäyantsu y imatapis alli rurayänampaq yachatsiyantsu. Peru kuyakoq teytakunaqa, wamrankuna allita rurayänampaqmi yachatsiyan. Y mana allita rurayaptinqa piñapäyanmi.

Pamëlam kënö nin: “Wamrantsikkuna winarir alli nuna kayänanta munarqa allita rurayänampaqmi yachatsinantsik. Y mana allikunata rurayaptinqa piñapänantsik. Mana tsëqa timonninnaq barcunömi lluta ëwayanqa”.

Ninqëkita rurë. Wamrëki mana cäsukuptinqa, ima pasanampaq kaqta cläru rikätsi. Y cäsukuptinqa, “allitam rurarqunki wamrallä” nï.

Cristïnam nin: “Kanan witsan wamrakunaqa manam cäsukuyantsu. Tsëmi wamräkuna cäsukuyaptin ‘kushishqa kanqäta’ nï. Y tsëta ruraptïqa, allikunata rurayänampaq niptï, shumaqmi wiyakuyan”.

BIBLIACHÖ YACHAKUNQANTSIK: “Imatam nuna murïkan, tsaq tsëllatam seganqapis” (Gälatas 6:7).

Shumaqllapa yachatsi. Wamrëkita piñaparqa edäninta y imata rurashqa kanqantaraq alli rikë. Imatapis mana alli rurashqa kanqampita piñapaptiki o willapaptikiqa, willapanqëkiqa yanapanqam. Celularninllata mana qawaräkunampaq mandashqa këkaptiki mana cäsukuptinqa celularninta pakapuri. Tsënö kaptimpis, ama imatapis ruraptinllaqa pasëpa wanuytaqa yacharitsu.

Wendelmi kënö nin: “Puntataqa rikëta tïrä wamrä musyëkar o mana musyëkar mana cäsumashqa kanqantam. Mana allita rurayaptinqa wamrantsikta piñapänantsikmi, peru mana musyëkar rurashqa kaptinqa yachatsinantsikmi”.

BIBLIACHÖ YACHAKUNQANTSIK: “Teytakuna, ama wamrëkikunata piñatsiyëtsu, tsënöpa pëkuna shonqunkunachö mana llakikuyänampaq” (Colosensis 3:21).

Kuyakoq kë. Wamrëkikuna mana allikunata rurayaptin shumaqllapa willapaptikiqa, mana alli rurayanqampitam yachakuyanqa y willapanqëkitam cäsukuyanqa.

Danielmi kënö nin: “Wamräkuna imatapis mana alli rurayaptinqa, tsë kutiyaq allikunata rurashqa kayanqantam yarpätsï y tsërëkur kushishqa kayanqätam nï. Mana alli ruranqanta altsarqa, kushishqa kanampaq kaqta y noqakunaqa yanapayänäpaq kaqtam nï”.

BIBLIACHÖ YACHAKUNQANTSIK: “Kuyakoqqa pacienciakoqmi y ankupäkoqmi” (1 Corintius 13:4).