CASAKUSHQAKUNAPAQ
2 Ishkëkikuna yanapanakuyë
¿IMA NINANTAN?
Kikinkunapura yanapanakoq casädukunaqa, imëka avion manejaqkunanömi kayan. Manam kikinkunallamantsu yarpäyan, tsëpa rantinqa, ishkankuna alli kayänampaqmi yanapanakuyan.
BIBLIACHÖ YACHAKUNQANTSIK: “Tsëmi, ishkaqnatsu kayan, sinöqa juk ëtsallanam” (Mateu 19:6).
Cristofermi nin: “Casädukuna alli kawakuyänampaqqa ishkankunam yanapanakuyänan”.
¿IMANÖTAN YANAPAMANTSIK?
Mana yanapanakoq casädukunaqa, problëmata altsayänampa rantinmi kikinkunapura piñatsinakuyan. Tsëmi imallapis pasakuriptin mas problëmaman chäyan.
Alexandram nin: “Majantsikwan alli kawakunapaqqa yanapanakunantsikmi. Nunäwan noqa mana yanapanakurqa juk wayichö juntu täraqnöllam kayäman. Y juntu täraqnölla karqa, imatapis rurarqa munayanqämannömi rurakuyäman”.
¿IMATATAN RURANKIMAN?
KËKUNAMAN YARPË:
¿Tarinqëki qellëqa qamllapa kanqantaku ninki?
¿Warmikiwan o qowëkiwan mana kanqëki höraraqku kushishqa kanki?
¿Warmikipa o nunëkipa familiankunawan alliku kayanki?
WARMIKIWAN O NUNËKIWAN PARLANËKIPAQ
¿Imachötan ishkëkikuna alli yanapanakuyanki?
¿Imachö yanapanakuyänëkipaqtan kallpachakuyänëki?
¿Imatatan rurayankiman ishkëkikuna mas yanapanakuyänëkipaq?
KËKUNAM YANAPASHUNKI:
Casädukuna imatapis juntu apayanqanman yarpärishun. ¿Imataran rurayanman juntu apayänampaq, y juknin juknin mana contranakuyänampaq?
Japallëkilla imatapis ruranëkipa rantin majëkiwan yanapanakuyänëkipaq kallpachakuyë.
Ïtanmi nin: “Imapitapis masqa familiachö alli y kushishqa kawakunapaqmi kallpachakunantsik”.
BIBLIACHÖ YACHAKUNQANTSIK: “Ama kikikikunapa biennikikunallataqa ashiyëtsu, sinöqa wakinkunapa bienninkunatapis” (Filipensis 2:3, 4).