Bibliai, hebreomanda néfesch shimira, shinallara griegomanda psykjé shimira ñucanchi shimima pasachisha alma ninchi. Hebreo shimii “samaj” nisha nin, griego shimii “causaj” shinallara “runa” nisha nin. a Chimanda alma an intiru causaj, huañushca huasha aichamanda imaras mana llucshin espíritu cuinta shu partii causasha catingaj. Ricushun imasna Biblia chita yachachin.

•   Jehová punda runara rurashcai, Biblia nin Adán “runaga causaj alma tucungaj shamuca” (Génesis 2:7, Biblia Textual). Cai intindichin Dios Adanda mana shu almara cuca, maspas pai shu causaj alma tucungaj pactaca.

•   Biblia ricuchin, almaga huañushca runara apina ushan shinallara tarbana, micunara micuna, leygunaras casuna ushanmi (Levítico 5:2; 7:20; 23:30; Deuteronomio 12:20; Romanos 13:1). Iyarishun, cai tucui cosasgunara causaira charij runalla rurana ushan.

¿Almaga causasha catinzhu?

 Mana, almaga huañuna ushanmi. Ashca Bibliamanda textoguna shina ricuchin. Caibi huaquin ejemplogunara ricushun.

•   Biblia nin: “Uchara ruraj alma, huañungami” (Ezequiel 18:4, 20, La Biblia de las Américas).

•   Maican israelita runa atun uchara rurajpi, Diospa Ley nica: “Chi alma pitishca”, “tucuchishca” ana ashcara (Éxodo 12:15, 19; 31:14, Reina-Valera, 1909; Levítico 7:20, 21, 27, Biblia de Ferrara). Shinallara La Biblia de las familias católicas nishca, Levítico 19:8 textoi nin: “Chi almaga huañuna angami”.

•   Maican Bibliamanda textogunai shu huañushca runamanda rimangaj munasha nin: “huañushca alma” (Levítico 21:11, nota; Números 6:6, nota). Ashca Bibliaguna cai textogunai “huañushca aicha” shinallara “huañushca runa” nijpi, hebreo shimii Bibliaga “alma” (néfesch) nin.

Almaga maicambi causai an

 Bibliai alma shimi maicambi nisha nin, causai. Shu ejemplo, Job 33:22​pi “alma” (néfesch) shimira “causai” shimihua pariju an. Chimanda, huañunalla aj runaunamanda rimasha, Biblia ninmi paihua “alma” huañunalla ashcara (Éxodo 4:19; Jueces 9:17; Filipenses 2:30).

 Alma shimi ima ashcara yachana yanapanmi maican Bibliamanda textogunara alira intindingaj. Shu ejemplo, Génesis 35:18 nin, shu huarmimanda alma “llucshisha” rishcara, Torres Amat Biblia chi textoi nin: “alma paimanda llucshiuca”. Cai shimiunahua intindichina munan cai huarmihua causai tucurisha riushcara. Chiraigu maican Bibliaguna cai textoi quillcanushca, huarmi ‘puchucai samanara chariushcara’ (La Biblia Latinoamérica, 2011).

¿Maibira quiringaj callarinuca alma mana huañuj ashcara?

 Cai quirina mana Bibliamanda an, shinajpi ashca religionguna chita quirinun. Cai quirinara ñaupa griego runauna charinuca. Diccionario enciclopédico del Cristianismo nin: “Ñaupa griego runauna quiringaj callarinuca alma mana huañuj ashcara, paiguna quirinuca runa aicha (sōma) almamanda (psychḗ) chicanyachishca ashcara. Shinajpi, Biblia yachachin aicha almahua shujlla ashcara”.

 Dios mana munanzhu runauna quirinuchu alma mana huañunara, Biblia chita mana yachachinzhu, chiraigu nin: “Ricuichi ama pihuas cangunara umachichu yachana shimiunahua, yanga umachina shimiunahuas, runa yachaimanda” (Colosenses 2:8).