Ali gustu cuintashcauna Jehová Diosmandami shamun, cushi Dios ashcamanda. Chiraigu pai munan ailluuna cushi causanuchu (1 Timoteo 1:11). Jehová Diosllara casarachisha callarichica. Casarashami yayauna paiguna huahuaunara ali cuirana ushanun. Shina rasha ailluuna cushi causanunga. Jesusta catijcuna casarana huras leyguna mandashcara pactachinami anun. Chiraigu registro civilbi casaranami anushca. Leapai Lucas 2:​1, 4, 5.

Yaya Dios ¿imara nin casaranamanda? Dios munanmi shu cari, shu huarmi casarasha, huañungagama causanuchu. Jehová Dios mana munanzhu, casarashcauna shuj huarmihua, shuj carihua tacarichu (Hebreos 13:4). Jehová Dios chijninmi divorciarinara (Malaquías 2:​16). Shinajpis, caris o huarmis shuj huarmihua, shuj carihua tacarijpi, culpara mana charij huarmi o cari divorciarina ushan. Divorciarishca huasha, munashaga, cutin casarana ushan. Leapai Mateo 19:​3-6, 9.

Diosga cariras, huarmiras rurashca, paigunapura casarashca ucui yanaparinuchu (Génesis 2:​18). Cariga aillu ucui uma cuinta an. Chiraigu, paihua aillu ministishcara cungahua tarbanami an. Shinallara paihua aillura Diosmanda yachachina an. Astaumbas, paihua huarmira llaquishcamanda mana pailla aj cuinta iyana an. Casarashcauna llaquinusha, respetanusha causana anun. Shinajpis, paiguna uchayuj ashcamanda pandarinungami. Shina tucujpi paigunapura perdonanara yachanami anun. Perdonanara yachashallami paigunapura cushi causanunga. Leapai Efesios 4:​31, 32; 5:​22-​25, 33; 1 Pedro 3:7.

Casarashcauna problemagunara charishas ishquindipura cuintanusha, llaquinusha, cuiranusha catina anun (1 Corintios 13:​4, 5). Diospa Shimi mana ninzhu, problemagunara charisha carira o huarmira ichusha rina an nisha. Leapai 1 Corintios 7:​10-​13.

Jehová Dios munanmi, huahuauna cushi causanuchu. Chiraigu Yaya Dios huahuaunara yachachin imasna causanara, shunguyuj tucusha mas cushi causangahua. Shinallara Yaya Dios munanmi, yayauna camachishcara uyasha, huahuauna sabiru tucunuchu (Colosenses 3:​20). Astaumbas, Yaya Dios munanmi paita, paihua Churi Jesustas sirvisha maltauna cushi causanuchu. Leapai Eclesiastés 11:9–​12:1; Mateo 19:13-​15; 21:15, 16.

Yayauna, canguna huahuaunama micunara, churarinara, maibi causanaras cuna anguichi (1 Timoteo 5:8). Chiguna ministishca ajpis, Diosta llaquinuchu, pai mandashcara pactachinuchu huahuaunara mas yachachina anguichi (Deuteronomio 6:​4-7). Shinallara, yayauna Yaya Diosta llaquina anguichi. Canguna llaquishcara ricushami, huahuaunas Diosta llaquinunga. Shinallara yayauna Bibliara yachachijpi, huahuauna ali iyaira apinunga. Leapai Proverbios 22:6; Efesios 6:4.

Yayauna canguna huahuaunara, ali huahua angui, alira rurashcangui nisha cushiyachina anguichi. Shina rashas, huahuaunara camachina, huaquimbi libachinas anguichi. Camachijpi, libachijpimi huahuauna manali ruranamanda caruyanunga (Proverbios 22:15). Libachina ashas, mana ashcara piñarisha, mana yapajta libachina anguichi. Leapai Colosenses 3:21.

Jehovahuaj testigoguna ashca librogunara llucchinushca yayaunara, huahuaunaras yanapangahua. Chi librogunai camachishcaunaga Bibliamandami an. Leapai Santiago 1:25.