Huahuamanda pacha sachai tiashcaunara ashcara gustahuaca. Ashca cuti ñuca ailluhua pasiangaj ricanchi sachama yacu cuchaunama, Jyväskylä llacta mayambi tiashcara Finlandia partii. Shinallara animalgunara ashcara gustahuan. ¡Huahua ashcai tucui allcuunara, misiunara ujllarina munacani! Ña iñaushcai ashcara turbarica imasna runauna animalgunara turmindachishcara chiraigu shu organizacionma animalgunara difindingaj llutaricani. Chibi ricsicani shuj runaunara ñuca cuinta iyashcara.

Animalgunara difindingaj campañagunara ruraj acanchi. Runauna yachanuchu quillcaunara cusha callegunai puricanchi caparicanchi cai animalguna cara catunaunahua, laboratoriogunahua cuntra rimangaj. Shu organización animalgunara difindingaj rurarcanchi. Ñucanchi iyaira difindingaj huaquimbi yapajta rurashcauna rurarcanchi chiraigu apuunahua llaquiunai urmacanchi. Huaquimbi ñucara caudsayachisha carcelbi churanuca.

Shinallara shujta tiaj llaquiunamanda turbaricani chiraigu Amnistía Internacional, Greenpeace organizaciongunama llutaricani paigunara ashcara yanapacani. Astaumbas llaqui pugri yarcai charij runaunamanda tarbacani.

Shinajpi timpu pasashca huasha riparacani ñuca cai mundura mana turcana ushashcara. Huaquimbi ichilla macanunaunara ganasha, mas atun llaquiuna mirarisha catiushcara. Ricucani imasna manali rashcaunallara cai mundui tiajpi mana pis tucuchina munashcara. Sinticani imaras mana rurana ushashcara.

Mana yanapana ushashcamanda ashca turbaricani chiraigu Diospi Bibliai iyaringaj callaricani. Ñaupa Jehovahuaj  testigogunahua estudiacani paiguna llaquinamanda agrasishca sintiricani shinajpi chi timpui mana puruntushca acani ñuca causaira turcachingaj. Cuna shuj tunu iyaira charicani.

Ñuca Bibliara mascasha leangaj callaricani. Ñuca shungüi tiaj nanaigunaras yanapaca. Ashca textoguna animalgunara ali cuirangaj animashcara leacani. Proverbios 12:10 nin: “Ali raj runa [...] animalgunara cuiran”. Shinallara intindicani Yaya Dios mana culpa charinzhu cai mundu llaquiunamanda. Chi randi, ñucanchi llaquiuna miranuca runauna Jehová Diosta mana casushcamanda. Ñuca shunguma pactaca yachangaj imasna Jehová Dios ñucanchira llaquishcara chapaisiqui shunguras ricuchishcara (Salmo 103:8-14).

Chi timpui shu quillca undachingaj cai ¿Qué enseña realmente la Biblia? nishca libromanda tupasha cachacani. Chi huasha shu Jehovahuaj testigoguna visitasha Bibliara yachangaj munangui nisha tapunuca. Ari rimasha, tandarinaunama ricani paiguna Reinomanda yachana huasima. Ansa ansa Bibliamanda sirtu yachachishcauna ñuca shunguma pactanuca.

Biblia ashca turcaigunara rurangaj yanapaca. Tabacura chupana yapajta upinas saquicani, ñuca ricurinara alichiricani ñuca imasna rimanara shinallara imasna apuunara ricushcara (Romanos 13:1). Maspas ñuca manali rurashcaunara saquicani caigunai ashca pandaricani.

Mas shinzhimi aca cai difindij organizaciongunara Jehová munashca cuinta ricungaj. Mana uctalla turcaricani. Pundaibi manali cuinta ricucani paigunara saquingaj. Shinajpi intindicani Diospa Reinolla cai tucui runaunara yanapana ushashcara chiraigu tucui shunguhua ursaricani shuj runaunara yachachisha yanapangaj (Mateo 6:33).

Ñuca activista runa ashcai runaunara ishqui muntun cuinta ricucani aliuna, manaliuna, manaliunahua cuntra tucucani. Cuna Biblia yanapahuaca cai milli chijnina saquingaj ursarini tucui runaunara llaquingaj (Mateo 5:44). Cai llaquina ashca tunuunai ricuchini. Diospa Reinomanda ali gustu cuintashcaunara yachachisha. Ashca cushi sintirini ricusha cai tarbana cushi ganaslla causangaj yanapan shinallara runaunara sirtu chapanara cushcara.

Turmindusgunara Jehovahua maquii saquingaj yanapaca cuti ganaslla sintiringaj. Sirtu quirini pai tucuira Ruraj mana saquingachu animalguna, runauna turmindarisha catinuchu shinallara ñucanchi sumaj gustu Allpa tucuchishca achu. Paihua Reinohua ñallami tucui runauna huajlichishcaunara alichinga (Isaías 11:1-9). Cushi ani cai sirtu rimashcaunara ricsishcamanda shinallara runaunara cai rimashcaunai quirinuchu yanapashcamanda. Ñuca ña mana munani cai mundura turcangaj.