Shu punzha Jerusalembi Jesús paihua Yaya Jehovamanda rimaushcai ricuchica chi timpui panda religiongunara pushajcuna llullajcuna ashcara (Juan 8:12-30). Jesús rimashca yanapan Diosmanda runauna quirishcauna sirtu o mana sirtu ashcara yachangaj. Pai nica: “Canguna ñuca shimiunara pactachisha causausha, sirtu pacha ñuca yachachishca runauna tucunguichimi. Sirtu shimira yachanguichimi. Cai sirtu shimi cangunara lugaryachingami” (Juan 8:31, 32).

“Canguna ñuca shimiunara pactachisha” Jesús rimashcai ricuchica imasna yachana ushanchi shu quirishca sirtu o mana sirtu ashcara. Diosmanda canda yachachinujpi tapuri: “¿Cai yachachishca Bibliamanda shinallara Jesús yachachishca cuintachu an?”. Apóstol Pablora uyaj runauna cuinta rurai, paiguna Bibliara ali yachaj anuca Pablo rimashca sirtu o mana sirtu ashcara yachangaj (Hechos 17:11).

Callari temai rimashca Marco, Rosa, Raimunda Jehovahuaj testigogunahua Bibliara yachanuca. Chita rurana ¿imasnara paigunara yanapaca?

Marco nin: “Bibliara yachachij Testigo tucui huras Bibliahua ñuca, ñuca huarmi tapuigunara cutipaca. Ansa ansa Jehovara llaquingaj callaricanchi shinallara ñucanchi casarashcai mas cushi angaj yanapaca”.

Rosa nin: “Pundallai iyacani Biblia runaunamanda iyai quillcashca ashcara Dios pita an ricuchingaj. Shinajpi huasha Bibliara yachausha ñuca tapuigunara cutipashca tucuca. Cuna tucui shunguhua quirini Jehová sirtu pacha tiashcara, shinallara paihuajpi quirina ushani”.

Raimunda nin: “Yaya Diosta mañacani paita ricsingaj yanapahuachu. Chi huashalla ñuca cari ñucas Bibliara yachangaj callaricanchi. ¡Jehovamanda sirtu shimira yachacanchi! Ima tunu Dios ashcara yachashcamanda yapa cushi acanchi”.

Biblia Diospa shimi ashcamanda yachachin Diosmanda sirtu shimira, ricuchin pai ali, llaquij Dios ashcara. Shinallara Biblia ñucanchira yanapan “pai ñucanchima cuyashcara ricsingaj” (1 Corintios 2:12). Can Bibliara yachasha intindingui imarasha Yaya Dios allpara runaunaras rurarca, shinallara yachangui shamuj punzhaunai Yaya Dios ima rurangaraushcara. Caimanda mas leana munasha internetpi www.mr1310.com/quw ricungui “Bibliamanda yachachishcauna > Bibliamanda tapuiguna” nishca botongunai nitingui. Chibi shuj Jehovahua testigohua Bibliara yachangaj mañana ushangui. Bibliara yachasha riparangui Yaya Diosta sirtu llaquina ushashcara.