Nashtis te phenas godo. Makar de mia borsh le manush ramonas kopi andal kopi ande rhartii kai chorhavonas, kana chitos le ramomata purane ai e Biblia shai las sama ke phenen sa iek fialo.

 Arakhle but rhartii purane katar e Biblia. Uni anda gadala rhartii nai sa iek fialo, pala godo shai phenas ke kana kerenas le kopi, univar le manush atsadionas. But anda godola vorbi chi parhuvenas o suato katar e Biblia. Numa arakhle uni suaturia kai thode le mursh de dumut de anume te parhuven so kamelas te mothol e Biblia. Aida dikhas dui prame:

1.   Ande uni Bibli purane ando 1 Iovano 5:7 phenel: “Ke trin marturia si ando rhaio: O Dat, E Vorba ai O Swunto Duxo: ai sa le trin si iek” (E Lashi Viasta). Numa si rhartii kai chachimasa phenen ke godola suaturia nas andel rhartii chache la Bibliake, thode les polme. a Pala godia, ande but Bibli kai si agies ai kai shai pakias amen ande lende nai godola suaturia.

2.   O anau katar o Del si mia dati andel rhartii purane katar e Biblia, numa ande but Bibli ankalade o anau le Devlesko ai thode “Gazda” vai “Del”.

 Agies si but rhartii purane la Bibliake, pala godia, shai das po gor te avela iek Biblia mothol o chachimos. b So phende le manush sikade kana dikhle sa kakala lila? Shai pakias amen ande Biblia kai si amen agies?

•   Iek manush sikado kai bushol William Henry Green phendias pa le Ramomata anda e shib hebrea (vi akharen len Antiguo Testamento): “Shai pakias ke chi iek prama kai kerdiaspe de dumut phenel o chachimos sar e Biblia”.

•   Iek mursh kai busholpe Frederick Bruce kai zhanel but pa e Biblia phendias kako pa le Ramomata anda e shib griega: “Si but prame kai sikaven ke o Nuevo Testamento chacho lo, mai but de sar so ramosarde aver manush prinzharde kai ramonas, ai pa lende khonik chi mothol ke jojade”.

•   O Frederic Kenyon iek manush kai zhanel but pa le rhartii purane katar e Biblia phendias ke “suako manush shai lel iek Biblia ande pesko vast ai te mothol chachimasa ke si les e Vorba le Devleski. Nakhle but borsh ai le bare prame kai sikavel e Biblia chi parhudile”.

•   Le judiuria ai le kristianuria kai kerenas kopi chi garavenas kana o foro le Devlesko atsadiolas (Números 20:12; 2 Samuel 11:2-4; Galatiana 2:11-14). c Ai mukle ande Biblia kana o Del shinelas kris pe pesko foro kana chi pakialas lesko mui ai kana sikavenas ginduria kai nas katar o Del (Oseas 4:2; Malaquías 2:8, 9; Mate 23:8, 9; 1 Iovano 5:21). Kana kakala mursh kerenas kopi chache anda e Biblia sikade ke sas chache ai ke sas lenge but pala e sunto Vorba le Devleski.

•   Pala sa so dikhliam, nai chaches ke o Del lias sama mishto te na jasavol peske suaturia? (Isaías 40:8; 1 Petri 1:24, 25, E Nevi Viasta ai O Psalmo). d O Del meklias so mothol ande Biblia te azhutil le zhenen de dumut ai de akanara (1 Korintiana 10:11). Pala godia, savorhe shai las lako mishtimos, “so godi sas ramome mai anglal si te sicharel amen te avel ame e rhavda, ai zor kai del E Vorba le Devleske te sai avel ame ando ilo kodo pachamos kai azhukeras” (Romanuria 15:4).

•   Kana o Jesus ai peske disipluria denas duma pa le Ramomata anda e shib hebrea, von pakianas chachimasa ke godo sas chacho (Luk 4:16-21; Le Apostolengo 17:1-3).