Utwigoro abantu bagize two kuzana amahoro kw’isi nta co twavuyemwo kandi nta co tuzokwigera tuvamwo kubera imvo zitari nke:

•   “Umuntu agenda, si ivyiwe kuyobora intambuko yiwe.” (Yeremiya 10:23) Abantu ntibaremanywe ubushobozi canke uburenganzira bwo kwitegeka, akaba ari co gituma batazoshobora gushika ku mahoro arama.

•   “Ntimushire ivyizigiro vyanyu mu ndongozi z’abantu; nta muntu ashobora kubakiza. Iyo bapfuye, basubira mu mukungugu; uwo musi imigambi yabo yose irahera.” (Zaburi 146:3, 4, Good News Translation) Abakuru b’ibihugu, mbere n’ababa babitumwe n’imvo nziza kuruta, ntibashobora gutorera umuti wamaho ibintu biteza intambara.

•   “Mu misi ya nyuma hazobaho ibihe bitoroshe kandi bigoye kwihanganira. Kuko abantu bazoba ari . . . inkazi, badakunda iciza, abaguranyi, intumva, abivyimvya.” (2 Timoteyo 3:1–4) Tubayeho mu “misi ya nyuma ” y’iyi si mbi, aho usanga hiraye inyifato zituma bitoroha kuronka amahoro.

•   “Haragowe isi n’ikiyaga, kuko Shetani amanutse kuri mwebwe, afise ishavu ryinshi, azi ko afise igihe gito.” (Ivyahishuwe 12:12) Umwansi w’Imana ari we Shetani yarakororewe mu micungararo y’isi agumizwa ng’aho, akaba atuma abantu bigana agatima kiwe k’ubunyamaswa. Mu gihe akiri “umutware w’iyi si,” ntidushobora kwigera tubaho mu mahoro.—Yohani 12:31.

•   “[Ubwami bw’Imana] buzojanjagura ubwo bwami bwose [burwanya Imana] bubuherengeteze, yamara bwobwo buzohangama gushika ibihe bitagira urugero.” (Daniyeli 2:44) Ubwami bw’Imana buzohaza icipfuzo dufise co kuba mw’isi irimwo amahoro arama, si intwaro y’abantu izobigira.—Zaburi 145:16.